Informashon di Obispado di Willemstad (di dos parti)

8. Nos ta yama bonbiní na p. Emanuel, SVD na St. Maarten for di luna di mart 2008; P. Morrison La Porte na Kòrsou i P. Toti Fuentebella na Aruba despues di nan estudio den eksterior. Bon biní i nos ta hopi kontentu ku boso presensia!
Nos ta yama danki na P. H. Nooyen, O.P. i P. S. Braham, O.P. na Kòrsou i P. Tony Peralta na Aruba ku ta bai laga nos. Masha danki pa tantu aña gastá na bienestar di nos Diósesis.

9. Nos ta animá nos seminaristanan Curtis Meris i Sendric Simon ku a risibí e ministerio di Lektornan i ta bai bek na Seminario di Trinidat pa kontinuá nan estudio, e di tres aña di Teologia i Ludceny Kirindongo ku ta sigui su estudio di Filosofia na Medellín,Colombia.

10. Situashon di santananan katóliko.
Entretantu e proseso di evaluashon di e santananan na Kòrsou a resultá den un rapòrt i estudio serio pa logra un konsepto pa un manual. Tur esaki a keda analisá un bes mas pa tur komishon i fundashon i e dokumentunan adaptá awor a bai Boneiru kaminda dia 26 di yüli lo reuní ku fundashonnan/komishonnan pa kompartí e proyekto i apliká e manual.

11. Biennan inmóvil di nos Diósesis (tereno, edifisio, etc).
Dia 28 di mei 2008 maneho di e parti importante aki tambe a haña un struktura nobo. Nos a lanta un fundashon pa asina por yega mas fásil na e fondonan nesesario. Nos tur sa ku mantenshon ta karu, sigur ora e edifisio a bai hopi atras. Meta di fundashon ta sòru pa mantenshon, tambe buska fondonan, i konsehá riba tur e responsabelnan di e biennan inmóbil di nos Diósesis.
Un di e promé pasonan ta pa yega na un lista di urgensia pa tur isla, i despues un internalisashon kompleto di tur tereno i edifisio.
Tambe lo bini un manual ku kombenionan pa mantenshon di misa, pastorí i otro edifisionan.

12. “Duc in Altum” na Kòrsou i Aruba.
Riba 22 di yüni pasá tabatin na Kòrsou entrega di sertifikado na mas ku 40 studiante ku a kaba nan estudio ku éksito i esaki a sosodé riba 4 di yüli na Aruba pa otro grupo di 30 studiantenan einan. Den tur dos evento di graduashon tabata tin un ambiente positivo ku dinamismo pa sigui forma nan mes i ofresé nan talento pa nos Iglesia lokal.

13. Nos katedral.
E trabounan di restourashon di Katedral ta bayendo mas lihé den e luna aki di yüli. E parti pafó ta kasi kla: dak, fèrfmentu, bentana. E parti paden tin mas detaye pa finalisá: ta kabando ku fèrfmentu di presbiterio (parti banda di altar); nan a pega kasi tur e granit na e muraya i pilarnan; falta instalashon di lus; pasa e mashin na e flur kompleto; e bankinan ta na Bon Futuro kaminda nos presunan ta skur i barnisá nan; falta drechamentu di òrgel i sonido. Nos ta spera ku pa kabamentu di sèptèmber renobashon di katedral lo ta kla. Pero e re-apertura ofishal lo ta 23 di novèmber na konklushon di Aña di Hubileo di Oro.

14. Drechamentu di òrgelnan.
Tres òrgel a keda renobá: Janwe; Brievengat i Suffisant. Awor na e parokianan aki ta keda e responsabilidat pa paga mitar di e kosto di e drechamentu, manera nos a stipulá; Parokia di Brievengat ta moviendo hopi bon; tin un komishon sentral di òrgel ku Dr. Keli na kabes ku ta supervisá periódikamente pa mantenshon di kada òrgel.

15. Evenementunan importante den Iglesia, Region di Amérika Latino i Karibe. Dokumentunan relevante: dia 24 di ougùstùs, Diósesis di Paramaribo lo selebrá su Hubileo di oro tambe; Nos a abri e aña di e Hubileo di Apòstel San Pablo (29 yüni 2008 -2009); den luna di òktober e Sínodo di obispunan ku e tema Palabra di Dios den bida i mishon di Iglesia, lo tuma lugá na Roma.

Nos ta pidi Dios su bendishon i protekshon di Mama Maria Inmakulada, patrona di nos Diósesis pa duna nos e selo apostóliko i kurashi pa nos sigui “rekordá pasando ku gratitut, selebrá presente ku entusiasmo i mira futuro ku speransa”.

Informashon di Obispado di Willemstad (promé parti)

Nos tur por a tuma nota di e impakto positivo di e preparashon pa nos Aña di Hubileo i nos determinashon pa yega na un Mishon 2008 -2011. Hopi inisiativa a start mas organisá i esaki ta trese kuné e nesesidat di informá otro pa asina nos tur keda na altura di aktividatnan importante den nos Diósesis.
Pa medio di e karta di informashon aki mi ke trese algun notisia serka boso, i esaki ta duna mi e oportunidat di yama tambe un i tur danki: klero, religioso i laikonan, pa e kontribushon asina balioso pa bienestar i progreso di nos Diósesis.

1 Aña di Hubileo

Nos Hubileo di Oro ta den su di ocho luna i nos por wak bek riba aktividatnan hopi positivo ku kulminashon bunita, manera nos enkuentro diosesano di tur nos saserdotenan den òktober di 2007; un aktividat importante di informashon riba e dokumentu di Aparecida ku a tuma lugá riba tur isla; nos Misa di Apertura (Fiesta di Kristu Rei 2007), nos Misa Krismal ku Hubileo di Saserdotenan: e selebrashon di e fecha di 50 aña, 28 di aprel, na Kòrsou i tambe riba e otro islanan.

Awor nos tin nos dilanti:
a. Pre-konferenshanan;
b. Simposio riba Doktrina sosial di Iglesia
c. Konferensha Diosesano ku Mishon 2008 – 2011
d. Klousura di nos Aña di Hubileo i alabes re-apertura di nos Katedral i komienso di Mishon 2008 – 2011.
e. Eksposishon Diosesano (dokumentu- potrètnan- ophetonan históriko).

2. Klousura di nos Aña di Hubileo.

Ya ku e restourashon di nos Katedral a tuma mas tantu tempu ku loke a keda planifiká, nos ta kere ku ta mihó kombiná su re-apertura (wak punto 14) ku Klousura di nos Aña di Hubileo (23 di novèmber 2008). Lo tin solushonnan práktiko pa hasi e kantidat di hende ku por partisipá, mas grandi posibel.

3. Pre-konferenshanan i Konferensha Diosesano Mishon 2008-2011

Pa prepará nos Konferensha Diosesano ku ta kuminsá dia 16 di òktober i kaba dia 18 di òktober, nos ta tene pre-konferensha riba kada isla.
Saba ta esun promé ku ta start dia 18 di ougùstùs.

5. Resultado di enkuesta i entrevistanan ku aporte di tur parokia i promotornan di aña di hubileo. Nos a haña un resultado hopi positivo kaminda nos a logra di alkansá i superá e kantidat nesesario. Na e komishon di enkuesta nos danki pa nan trabou, pero tambe na boso tur ku di un òf otro manera a kontribuí na éksito di nos enkuesta.

6. Hubileo di Parokianan: fiesta patronal di Parokia den kada isla te na fin di nos Aña di Hubileo.

20 di ougùstùs San Bernardo Kralendijk - Boneiru
23 di ougùstùs Santa Rosa St. Rosa - Kòrsou
11 di sèptèmber Bírgen di Coromoto Antriol – Boneiru; Charo - Kòrsou
1 di òktober Santa Teresita Wishi – Kòrsou; San Nicolas - Aruba
4 di òktober San Fransisko di Asis Oranjestad – Aruba; Fuik – Kòrsou
7 di òktober Reina di Santísimo Rosario Katedral Pietermaai - Kòrsou.
9 di òktober San Luis Beltran Rincon - Boneiru
13 òktober Birgen di Fatima Dakota - Aruba
28 di òktober San Hudas Tadeo Zuid Bonam - Kòrsou.
3 di novèmber San Martin de Porres Seru Fortuna - Kòrsou
7 di novèmber San Willibrordo San Willibrordo - Kòrsou
11 di novèmber San Martin de Tours Phillipsburg - St. Maarten
23 di novèmber Kristu Rei Brasil - Aruba
Ta rekomendabel pa stimulá nos parokianonan pa e delegashon bai fiesta di otro parokia spesialmente den nos Aña di Hubileo.

7. Youth Rally
Maske e kantidat di hóbennan tabata limitá (mas òf ménos 80), nos tin ku bisa ku e kalidat di e enkuentro tabata hopi altu ku un resultado masha positivo pa e hóbennan ku a partisipá. E desafio grandi ta keda awor pa e hóbennan mes huntu ku e gruponan hubenil i parokia pa mantené e kandela di Spiritu Santu bibu. Mayoria di nan ta lidernan den nan grupo hubenil, ku kier animá otro hóbennan den nan parokia i gruponan. Na ora di despedida di e Youth Rally, nan a manda un mensahe pa tur otro hóben i adulto di nos Diósesis. Laga nos kompaña nan. Masha Pabien!

Huntu ku IKD di Kòrsou i e hóbennan, nos ta preparando algun orientashon riba preparashon pa apertura di aña eskolar 2008 – 2009) pa medio di un Kampana ku ke promové balornan positivo durante henter aña pa asina kontrarestá na un manera positivo e parti negativo (kriminalidat, violensia verbal i físiko, falta di komunikashon i di rèspèt) ku ta asotando nos komunidat spesialmente na skol i den famia.

DI BINTI DJADUMINGU SIKLO A

Promé Lektura : Isaias 1, 6-7
Salmo : Salmo 67, 2-3. 5-6
Di dos Lektura : Romanonan 11, 13-15. 29-32
Evangelio : Mateo 15, 21-28


Hesus ta sali di e teritorio hudiu i ta bai na e teritorio di Fenicia, i ei a sosodé algu ku lo a trese kambio den hinter e relashon entre Dios i hende.
E protagonista e biaha aki ta un muhé gentil: e tabata di fenicia (ta yama gentil e persona ku no ta di rasa hudiu). E motibu pa aserká Hesus no ta pa nada otro sino pa pidiE, pa suplikE, pa E kura su yu muhé gravemente malu na kama.
Pa por komprondé e Evangelio aki ku profundidat ta sufisiente bisa ku hudiunan di e tempu ei tabata kere ku únikamente nan, esnan di rasa hudiu, lo a keda salbá. Dios a bini pa nan i tur sobra, esnan gentil, lo tabata di rasa inferior ku lo no a haña salbashon ni konsuelo divino.
Hesus, un biaha mas, ta bini pa kibra skemanan ku tabata reina ofresiendo sanashon i salbashon na tur esnan, hudiu òf gentil, ku ta akseptá e obra ku Dios ta hasi den su bida. Por ta ku nos mentalidat di awendia no ta kapta ampliamente tur loke e tabata nifiká, na tal momentu, e kiebro ku komportashon di Señor a trese den tal situashon.
E Evangelio ta kuminsá ku un komparashon un poko konfuso, e ta kompará e muhé ku un kachó. Entre semitanan un di e pió insultonan ta di yama hende kachó.
Tabata desgrasia di un miembro di famia ku a hiba e muhé aki na e enkuentro ku Kristu. Na promé momentu Señor ta hasi manera e ta surdu frente di e muhé aki i no ta kontest’é ni un p’ié palabra. Silensio di Hesus ta dilanti gritunan di e muhé ta konfundiente.
¿Kuantu biaha den bo bida kasi gritando bo a roga na Señor i bo tabata haña impreshon ku Dios ta keda ketu…? Silensio di Dios ta duelbo den bo bida ? Kon Dios ta papia ?
E muhé ta bisa: “Señor, yudami!” Ki súplika mas grandi ora rekonosé den Hesus e Dios ku por yuda!
Hopi bia ora nos ta kana riba kaya nos ta topa hende ku ta pidi nos yudansa, kisas algu di sèn, por ta un mirada, kisas un sonrisa òf par palabra simpel komo saludo…¡ Esta miserabel nos a bira pa loke ta trata humanidat !
E muhé ta insistí. Nos sa ku no tur orashon akseptá ta orashon kontestá. Tin persona ku inklusive ta kere ku e aparente silensio di Dios ta indiferensia dilanti mundu i su problemanan. Pero esaki no t’asina. Mester deskubrí kon Dios ta papia den nos mundu pa por komprondé kiko E ke bisa nos.
Hesus ta laga e muhé warda largu, den realidat e ta poniend’é na prueba grandi ku únikamente fe profundo por aprobá.
Den e mama aki yen di doló pa sufrimentu di su yu muhé nos ta haña hopi elemento ku ta sirbi nos pa nos kaminda kristian di awendia. Un pagano ta duna nos lès magnífiko di e manera kon nos mester aserká Dios i kon trat’É.
Den e muhé nos ta deskubrí:

1. Amor: e tabata pagano pero e tabata stima su yu muhé. Kuantu bia nos ta pensa ku paganonan di awe no ta stima ni ke esnan di nan!

2. Fe den djE: el a konfia den djE sin bèrgwensa ni miedu.

3. Un fe ku e tabata adorá: el a kuminsá pa siguiÉ, pero el a kaba na rudia dilanti di djE. El a kuminsá ku hasiendo petishon na djE i el a kaba hasiendo orashon.

4. Gran perseveransia: un i otro bia e muhé tabata insistí dilanti Señor i esnan huntu kuné i no a stòp te ora el a haña loke e tabata deseá. Su gritunan a transformá den silensio agradesidu.

Hesus ta kaba atmirando e fe di e muhé ei ku a demonstrá mas bon kalidat: sabiduria, humildat, bondat i kariño, pasenshi… pero Señor t’a sa bon ku tur esaki tabata produkto di su fe.
No nos tur komo kreyente tin e mesun nivel di fe ni e mesun madures spiritual. Nos no tin ku ansha esun mas débil ku nos den fe i no eksihí di dje meta ku, pa awor akí, e no por alkansá. Kuantu rabiamentu i intrankilidat nos lo spar nos mes si nos mira otro komo ruman i no komo nos disipel! Dios a hasi nos ruman di nos rumannan, nunka pa ta nan hues.
Tin kristian ku ta asina preokupá pa e dògma, pa e doktrina pa e puresa di e formanan ku nan ta lubidá, kisas ku demasiado frekuensia, di e puresa di kurason, i di e forma aki loke nan ta eksigí den nòmber di Dios nan ta desakreditá ku nan bida.
Nos ta haña impreshon ku esun ku no a komprondé amor di e mama aki no ta komprondé ken Dios ta … I na mes momentu ei, su yu muhé a keda kurá.