Pader Bouman ta regresá Hulanda dia 28 di desèmber próksimo

Pader Bouman a nase na Hulanda 4 di yüli 1929 i a keda ordená komo saserdote dia 25 yüli 1959.
El a bini na Kòrsou sèptèmber 1961 pa despues bai traha na Oranjestad, Aruba i despues na Bonaire kuater aña
Na 1971 el a bira e promé pastor di Koraal Specht.
El a kuminsá ku su parokia den kura di skol i tur djadumingu el a instalá su misa den kura
Na tur manera el a buska fondo pa traha e misa aki i a logra tambe .
Tambe e tabata traha komo aalmoezenier den prison.
Despues el a bai Aruba atrobe komo pastor di Brasil i pastor di Dakota.
Pa su trabou el a wòrdu kondekorá komo Ridder di Oranje Nassau.
For di 1999 e ta biba den kas di Sentro Pastoral na Aruba i for di aya el a duna hopi asistensia na diferente parokia na Aruba i un bia pa aña el a bini durante un luna pa asistí na Misa di Santa Ana aki na Kòrsou.
Djadumingu 28 di desèmber e lo regresá Hulanda na unda e ta bai biba na Voorschoten den un konbentu di Sùrnan Dominicanonan na unda algun pader ta biba kaba.
For di aya e kier duna asistensia na diferente komunidat di Antiano i Arubianonan na Hulanda.
Pader Bouman ta un hende ku su kurason a keda aki na Antia i Aruba.
Su amor, su fe i dedikashon ta un ehèmpel pa hopi di nos.
Nos ta deseá pader Bouman un tempu agradabel i hopi forsa in salú na Hulanda.

DI KUATER DJADUMINGU ATVÈNT SIKLO B

Promé Lektura : Samuel 7, 1-5. 8b.12. 14a.16
Salmo : Salmo 89, 2-5. 27-29
Di dos Lektura : Romanonan 16, 25-27
Evangelio : Lukas 1, 26-38


Nos ta riba e di kuater djadumingu di atvènt i nos ta topa ku e figura sentral di atvènt ... Maria. Ta den Maria, di forma privilegiá ta personifiká e disposishon nesesario pa risibí Señor den su binida.

San Lukas ta kompartí ku nos e storia aki di e enkuentro entre Dios i e ser humano. E kuenta lo a parse un diálogo simpel entre Maria i Angel Gabriel. Sinembargo, nos sa ku no ta asina. Tabatin un pueblo ku tabata sperando ya mil aña riba e momento aki i pakiko no bis’é, hinter kreashon tabata spera un dia e enkuentro ku su Kreador. Di manera ku e diálogo aki ta un enkuentro mashá spesial ora ku Dios a disidí ku ta tempu no únikamente di papia ku e ser humano sino di enkarná su mes i hasi su mes pa e ta presente entre nos.
Nos ta topa ku tres personahe den e kuenta aki: Angel Gabriel, Maria i Dios (e Tata ku ta manda e Yu, e Yu ku ta enkarná, i Spiritu Santu ku ta realisá e enkarnashon). Ta parse interesante reflekshoná riba e personahenan di Maria i di Dios.
Maria ta aparesé komo esun ku ta atento na bos di Dios. No tabata fásil rekonosé Dios su bos den e Angel i ménos aseptá e mensahe. Pa bunita ku e pasashi aki por parse nos, pa Maria no tabata fásil komprondé kon e por tabata na estado sin konosé un hòmber, kiko tabata nifiká ku e yu ei lo tabata e Yu di Dios, kon e lo a kuminsá bisa Hosé i su mayornan esaki… hopi duda lo mester a pasa den kurason di Maria. El a skucha, el a konfia i a pone su bida den man di Dios: “laga sosodé ku mi loke ta bo boluntat”. Bendishoná sea Maria kende ku su konfiansa a permití nos gosa di presensia di Dios mes entre nos.
Di otro banda, nos ta topa ku Dios. Dios no tabatin pakiko enkarná pa salba nos. Den su infinito sabiduria e tabata por a haña mil forma pa trese salbashon pa nos… e por a aparesé predikando den desierto, sin nesesidat di enkarná su mes i pasa hinter bida entre nos, e por a manda un gran profeta ku lo a hasi e salbashon aki presente… posibilidatnan tabata hopi, sinembargo, Dios ta skohe pa hasi su mes un di nos. For di e enkarnashon, Dios ta biba entre nos, e ta kana ku nos, e ta komprondé nos perfektamente pasobra el a biba manera nos, el a gosa, sufri i muri manera nos pa asina un dia nos por resusitá manera E a hasié. Bendishoná sea Dios, ku no únikamente a krea, kuida i stima nos, sino ku awor a hasi su mes un ku nos i ku esaki… a salba nos!

For di dia ku Dios a enkarná i a bira hende den persona di Hesus di Nazaret, mundu ya no ta igual, pues for di e momento ei nos ta gosa di e presensia real di Dios mes ku a krea nos i a yama nos pa biba den amor. Komo kristian nos tin e gran tarea di hasi esaki presente. Ningun otro religion ta papia di un presensia manera esaki. Ta un tesoro ku komo kristian nos no por deskuidá òf lubidá ku tantu téknika di merkadeo konsumista ku ta kita nos atenshon. ¡Dios ta ku nos! Esaki ta e berdadero goso di Pasku. Kon hasi e Bon Notisia aki , e echo aki presente den nos bida?
Maria ta un bon ehèmpel pa kumpli ku e mishon aki. Maria a aseptá e reto di engendrá, kuida i eduká e yu di Dios mes. Tarea nada fásil pero ku Maria a aseptá ku goso i riba tur kos ku konfiansa pleno den nos Señor. Laga nos pensa unda Dios ta den nos bida ... : den mi pareha, mi mayornan, den mi yunan… den esun ku mester di mi presensia, di mi tempu, di mi plaka òf di mi abilidatnan… den hopi direkshon i di hopi manera, Dios ta sigui hasi su mes presente i ta sigui pidi nos, pa segun ehèmpel di la Bírgen Santísima nos asept’é , akohé i stim’é.

Laga nos prepará nos mes pa biba e Pasku aki, purifikando nos kurason di tur egoismo, di konsumismo ku ta hasi nos bashí, di odio ku ta stroba nos di stima òf di e indiferensia ku ta hasi imposibel pa nos pa aktua. Dios ta ku nos! Esaki ta nos Bon Notisia. Laga nos risibié ku un kurason generoso manera Maria a sa di hasié den humildat di su persona.