DI KUATER DJADUMINGU ATVÈNT SIKLO A

Promé Lektura : Isaías 7:10-14
Salmo : Salmo 24:1-2, 3-4, 5-6
Di dos Lektura : Hakobo 1:1-7
Evangelio : Mateo 1:8-24


Mateo ta aksentuá figura di Hosé den nasementu di Hesus mas ku esun di Maria, manera Lukas a hasié. Esaki ta Sali na kla pa medio di esnan na kende e evangelio di Mateo ta dirigí, e komunidat hudiu-kristian. Sinembargo, bayendo den direkshon di Hosé ta permití nos reflekshoná riba importansha di Hosé den enkarnashon di e yu. Mayoria bia nos ta reflekshoná riba e disponibilidat di Maria pa risibí Hesus den su seno na ora di pronunsiá e palabranan asina profundo i: “laga sosodé den mi segun bo santa boluntat ”. Sin embargo, Hosé tambe tabatin ku duna su kontesta pa Hesus por a nase entre nos. Nos ta mira ku Dios no ke pa Hosé ta un simpel “padrasa” di Hesus, sino pa ela asept’é komo un berdadero Tata.

Enkarnashon no ta sin mas un akto dibino ku a imponé riba hende. Den Maria, Dios tin e delikadesa di warda riba akuerdo di pareha di Nazaret, Hosé y Maria. Di tal forma Hesus ta fruta di e “diálogo” mas perfekto entre Dios i hende, fruta di duna oidu na e Palabra di Dios i di obediensia di parti di e esposonan . Únikamente asina Dios lo por a enkarná su mes i salba nos siendo “Dios ku i entre nos”.

Por último, pa esnan ku no ta komprendé dikon skritura ta yama e salbador Emanuel i Hesus e Verbo Enkarná , mi ke splika lo siguiente. Hesus ta nifiká “Dios ta salba”; por sierto e mesun nòmber ku Josué, personahe ku a introdusí e pueblo di Israel na e tera primintí siendo susesor di Moises. Si Hesus tabata e Mesias, nos salbador, su nòmber ta deskribí esaki perfektamente, e ta “Dios den kende nos a salba”. E nòmber Emanuel ta deskribí mishon di Hesus, ke men, e forma pa medio di kua nos mester a ser salbá. Hesus a salba nos pasobra ela hasi presente “Dios entre nos”. E mes ta Dios ku nos; Hesus a hasi Dios presente den su mes persona i di e manera aki ela salba nos. Por lo tantu Hesus (Dios ta salba) i Emanuel (Dios ku nos) ta papia di e mesun persona.

Pasku di Nasementu ta serka, ta falta dos dia pa nos ta selebrando e nasementu ٌhistóriko di Hesus i presensia di Dios entre nos. Kon nos tin ku prepará nos mes p'esei ? Den e Evangelio nos ta mira ku Dios no por biba entre nos sin nos konsentimentu. Hesus mes no a enkarná sin aseptashon di Maria i Hosé. E dianan aki generalmente nos ta pasa ” ”asina okupá” ku nos ta lubidá por kompletu di sinta skucha Palabra di Dios, pa rekonosé su presensia den nos bida i por lo tantu permití nos mes , bisa ” sí ” na Dios den nos bida i den nos famia.
Enkarnashon di Dios entre nos tabata un echo históriko ku a sosodé mas di dos mil aña pasá. Sin embargo, ora ta Pasku, no únikamente nos ta selebrá esaki, sino tambe nos ta rekorda ku Hesus ta sigui biba entre nos i ku goso nos ta spera su próksimo i último binida. Asina ta, si E ta sigui biba entre nos, kon risibié den nos famia e Pasku aki? Solamente ku regalu i fiesta ? Dios tin mester di nos silensio, di nos oidu, di nos orashon. Tin hopi okashon ku ta yama nos na kombershon, e desòrdu ku nos tin den nos bida, famianan ku ta habri for di otro, parehanan separá òf pasifikamente nua ku otro “, yunan alehá òf lubidá di nan mayornan, enfin, hopi situashon kaminda nos a laga Kristu un banda i ku nos no a deseá pa e enkarná entre nos “pasobra e ta molostiá nos”.
Ku goso di e Pasku aki sea sinsero i profundo i no solamente basá riba algun regalu i kuminda. Ku e lo yena nos ku goso pa kontemplá Hesus presente den nos bida, den nos famia i ku e lo yuda pa no pèrdè speransa di por kontempl’é tambe den nos sosiedat.
Laga nos biba e dianan aki di Pasku “ku Hesus”. Ku E lo no ta un invitado straño den nos reunionnan ni den nos bida.