DI TRES DJADUMINGU ATVÈNT SIKLO A

Promé Lektura : Isaías 35:1-6a, 10
Salmo : Salmo 146: 7-10
Di dos Lektura : Hakobo 5:7-10
Evangelio : Mateo 11:2-11


E situashon ku e teksto ta pone nos dilanti lo ta algu paresidu na lo siguiente: Hesus a kuminsá ta prediká pafó di e sírkulonan di Huan Boutista, kaminda ela kuminsá; su fama a krese di dia pa dia pa medio di su remarkabilidat i su sabiduria. Den mes tempu, Huan Boutista ku a kai será i no tabata mira su liberashon pronto. Pero problema tabata ku Huan, ku algun skema di Tèstamènt Bieu, a anunsiá un Mesias di violensha, ku lo a bini ku harka na man”, i Hesus no tabata aktua di tal manera, sino e tabata kura enfermonan i tabata proklamá hustisia i pas pa esnan oprimí. Ta p'esei Huan ta puntra: “ Ta Abo ta esun ku tin ku bini?” Huan no a komprendé bon dikon e kambio di modelo aki.
Hesus no tabata ke diskutí riba e figura di Mesias, pasobra esaki tabatin interpretashon múltiple inkluso kontradiktorio. Ta p'esei Hesus ta papia mas bien di e Reino di Dios, òf di e reinado di Dios entre hende. Pa atendé ku esaki e ta hasi uso di figuranan di Tèstamènt Bieu, konkretamente di Isaías. Papiando di ku siegunan tabata mira i esnan mankaron tabata kana i predikando e Bon Notisia na esnan pober, Hesus tabata pone su akshonnan den relashon ku loke e profeta Isaías a anunsiá (e promé lektura di awe). E práktika aki den Isaías lo tabata señal di e presensia di Dios entre su pueblo. Ta p'esei , interpretando e kontesta di Hesus, nos lo por bisa ku E ta buska pa hasi mas kla presensia di e reinado di Dios, mas ku proklamá su mes komo e Mesias.
E pregunta ku por surgi serka nos awe ta lo siguiente: únikamente hasiendo milager ta hasi Reino di Dios presente? Pasobra si tabata asina, nos lo por a afirmá ku nos ta leu di e Reino. Pero danki Dios no ta esaki ta e mensahe di Hesus. Pa E, e milagernan ku e tabata hasi tabata un forma di introdusí di nobo na sosiedat tur esnan ku tabata
ekskluí, lubidá, rechasá den su tempu. E tempu ei , un enfermo tabata un persona rechasá pa Dios i por lo tantu di sosiedat. Ta p'esei , ora E tabata kura nan, Hesus tabata purba laga nan mira ku Dios tabata ku nan, ku E no tabata rechasá nan, sino ku E tabata stima nan i tabata reintegrá nan den sosiedat. Asina ta ku lo por sigui hasi milager miéntras ku nos no ta laga nos ser hibá pa mekanismonan sosial ku ta ekskluí algun di sierto privilegio. Di tal manera e hende pober hopi bia ta privá di bon edukashon, òf ta konsiderá e pididó di limosna komo persona “no deseabel” ora mir’é riba kaya.; hende muhé no por okupá puesto di tuma desishon (hopi biaha) i esnan inkapasitá no tabatin moda di subi metro ni mayoria medio di transporte públiko pasobra esaki ta masha karu” si tene kuenta kuné.. Esaki tabata e hendenan ku Hesus a trata na reintegra den e bida sosial ku su milagernan.
Ta Parse ku loke Hesus ta buska ta “kaba ku strukturanan di violensia”den sosiedat, aplikando strukturanan di komprenshon, toleransia y rèspèt mas amplio na libertatnan i limitashon di otro kosnan. Pero ta kere ku hopi biaha nos ta komprondé poko malu, pues nos ta pensa ku tur hende ta kere, i ta aktua manera nos ta hasié. Esun ku no ta hasi di tal forma , nos lo“ekskluí” di nos horizonte di relashon. Nos a komprimí e mensahe di Hesus den algun práktika religioso, tin biaha asta ekskluyente, i nos a laga afó tur e forsa sosial ku ta impliká aseptá ku plenitut mensahe di e Reino.

Tin un frase dje profeta Isaías ku parsemi ta iluminá hopi e siñansa final di e evangelio aki: “Mi pensamentu no ta di kompará ku boso pensamentu, ni boso kaminda no ta esun di mi” (Is 55,8). Kua ta e imáhen di e Reino di Dios ku nos ta poseé? Si
nos kompar’é ku loke Hesus ta presentá na nos awe, nos ta haña semehansa? E salbador, a bini, i a keda ku nos, esaki ta loke nos ta selebrá dia di Pasku di Nasementu. Pero, nos lo ta kapas di rekonosé si nos lo topa kuné di frente? Laga nos buska pa konfrontá nos kriterionan ku e kriterionan di Hesukristu.
Laga nos buska pa kibra ku strukturanan di eksklushon, ku aktitut di rechaso ku nos ta biba komo sosiedat i den nos famia. Laga nos sigui prepará pa yegada di nos salbador transformando nos vishon di salbashon segun kriterionan ku Evangelio a presentá na nos awe.