Eksistensia di Dios

Tin hende ku ta duda den eksistensia di Dios, òf simplemente ta neng’é; nos kisas ta hasi esfuerso pa konvensé nan di ku Dios ta eksistí; kisas nos no lo logra.Dikon nos lo no logra? Pasobra Dios no ta eksistí òf pasobra nos no sa na demonstrá su eksistensia?Tin ku bisa mundu ku Dios ta eksistí, no tantu ku argumentu, ku obra; nos tin ku presentá un Dios bibu; porfin, manera E ta.Den tur loke nos ta mishi kuné, nos ta pone e marka di Dios; den tur loke nos ta bisa, nos ta mustra algu di Dios; den tur loke nos ta hasi, nos ta biba Dios... i pronto otronan ta mira e markanan aki di Dios, nan lo skucha e sonidonan di Dios, nan lo sinti e presensia aki di Dios.I lo sobra argumentunan; manera e mucha ku mester di argumentu pa stima su mama, hende ku no mester di nan pa kere den Dios ni pa stim’é.