Djaweps Santu: E Misterio Di Duna Bida, Dunando Bida

Riba Djaweps Santu Hesus a tuma e pan, a kibr’é i a partié entre nan tur. Komo ku Dios ta riku, pero riku den generosidat pasobra El a duna nos tur kos p'asina nos atministr’é. Ta p'esei e no repartí kos straño. Ela a hasi su mes pober mei mei di pobernan i ku e pan ku E tin den man E ta desididu na parti i repartí tambe su propio Kurpa i Sanger. No tin mas ku e bida ku ta bati den su bon kurason i den su wowonan enamorá...
Hesus ta duna tur loke E tin, hasta su bida, pasobra E ta stima. Su kompromiso ku bida lo determiná na stima hasta e último konsekuensianan... Aki mi ta pensa riba tantu tata i mama ku ta hasi meskos. Hòmber i muhé ku no ta pensa di un forma egoista riba nan mes i ta biba pa otronan; pa e famia, pa e yunan..Kuantu di nan ku ta asumí den tur kos konsekuensia i kompromiso pa duna bida partiendo nan mes i repartiendo nan mes manera un pan.
E gesto aki di Hesus di tuma e pan, partié i kompartié ta sintetisá spesialmente tur e sentido di su bida. Ta manera si E lo a bisa ku asin’aki ta mi bida i asina e bida di boso mester ta. Esaki ta amor i ningun otro kos. E amor ku ta duna bida na otronan. Ta manera si E lo ta bisa: risibí komunion huntu ku mi ta di ta dispuesto na biba di e manera aki... manera un pan partí i repartí dor di amor.
E dunamentu aki di bida dor di parti su mes, di Hesus i di tantu hende, únikamente por wòrdu komprendé dor di fe. Solamente fe ta halsa nos na e amor mas grandi aki kaminda muhénan manera Mama Teresa i tantu otro, maske nan no tabatin nan propio yu, ta gasta nan bida p'asina otronan por biba mihó.
E misterio ku nos ta selebrá Djaweps Santu tin di aber ku esaki, ku e misterio di duna bida entregando bo propio bida, partiendo bo mes i repartiendo bo mes manera un pan. Pero na e misterio aki nos ta agregá un misterio masha grandi: e pan aki tumá dor di mannan di Hesus Yu di Dios, ta transformá dor di Su palabranan den Su propio Kurpa i Sanger pa bida di mundu. Un pan di bida por sierto masha spesial.