DI SINKU DJADUMINGU DI PASKU DI RESUREKSHON

Promé Lektura : Echonan 6, 1-7
Salmo : Salmo 33, 1-2. 4-5. 18-19
Di dos Lektura : 1Pedro 2, 4-9
Evangelio : Huan 14, 1-12


E djadumingu aki nos lo por bisa ku ta un dia di revelashon tokante Hesus, ta un djadumingu Kristológiko. Saliendo for di dos intervenshon di e apòstelnan, Hesus ta revelá na nos su mishon komo Mesias i su ser mas íntimo di Yu perfektamente uní na e Tata. Dilanti di e pregunta di siguimentu, kier men, dilanti e duda di kon alkansá loke E a alkansá, Hesus lo identifiká su mes komo e Kaminda, e Bèrdat i e Bida. Ta dikon Hesus ta hasi esaki? Ku poko palabra Hesus ke bisa e bèrdatnan mas importante ku e disipelnan lo tin ku rekordá. Pues laga nos mira di kiko kada un di e realidatnan aki ta rekordá nos:
Hesus ta e KAMINDA: esaki ta rekordá nos for di humildat di e pesebre den kua el a nase, pasando den su aktividat profétiko di pordoná piká, kura esnan malu di salú, rekohé esnan rechasá, asta yega na loke lo a bini despues di e último sena: entrega total i salbadó di su bida. Esaki ta e kaminda ku Hesus a marka den direkshon di e Tata; ta p'esei e ta bisa nan: “ i ya boso konosé e kaminda pa yega na e lugá kaminda ami ta bai”.
Hesus ta e BÈRDAT: ora el a proklamá esnan pober , esnan ku hamber, esnan persiguí bienaventurá; ora e mustra nos e kara berdadero di Dios komo “Abba” o sea komo Tata; ora e denunsia inhustisia i proklamá un liberashon; ora riba tur kos ora E mustra nos e “berdadero hende” ku nos ta yamá na ta: ... ser humano pleno, liber, koherente, entregá.
Hesus ta BIDA: pasobra E tabata prinsipio di hinter kreashon; E a rebibá speransa definitivo pa humanidat; den djE hende a sinti di ta hañando un forma nobo di biba; unda ku E lo a pasa E bida tabata generá , ora E kura, pordoná, liberá, etc. Pero riba tur kos Hesus ta bida ora Ela resusitá, pues ku esaki E ta vense morto i ta proklamá su mes komo Señor di bida.
Despues di e rikesa di e testimonio aki di Hesus, Felipe, aparentemente sin por komprondé loke Hesus tabata bisando, lo a pidié: “Laga nos mira Tata i esaki pa nos lo ta sufisiente.”. A parse ku e apòstelnan lo a komprendé tiki òf nada di tur loke Hesus a revelá na nan, ta p'esei Hesus ta riska di hasi un afirmashon klarísimo riba su mes: “Ken ku a mira Mi, a mira e tata tambe”. Ke men, esun ku ta sigui mi Kaminda i ta biba mi Bèrdat lo yegá na Bida ku plenitut den enkuentro ku e Tata. Felipe tabata konosé Hesus, e tabata atmir’é i tabata siguié, pero nunka a komprendé ta ken e tabata siguiendo. Talbes e tabata mira den Hesus un gran lider religioso, un maestro di Lei, e libertador di Israel. Sinembargo, e no tabata por mira den Hesus e mesun Yu di Dios, ikono di e Tata.
Kuantu kaminda i bèrdat nan ta presentá na nos komo ofresementu ku ta hiba nos na bida? Hedonismo komo búskeda di plaser sin responsabilidat, plaka komo kaminda sigur pa yega na felisidat, éksito komo úniko kaminda di realisashon, mentira komo forma di gana atenshon i egoismo komo kaminda mas sigur pa desaroyo personal. Ta parse ku e kaminda di solidaridat, di simplesa, di kompromiso, di bèrdat , di responsabilidat i amor no ta yama nos atenshon tantu. Awor laga nos buska bèrdatnan relativo, ku ta akoplá na nos plannan; bèrdatnan na midí i si ta posibel ku nan sea negoshabel.
Lo no t’asina ku nos a hasi nos mes kaminda, bèrdat i bida na lugá di sigui Hesukristu?

E siman aki nos por kana nos kaminda, nos bèrdat i nos bida den persona di Kristu. E ta midí di hinter nos bida, dilanti di djE nos tin ku konsentrá nos manera di biba.