SOLEMNIDAT DI KURPA I SANGER DI KRISTU

Promé Lektura : Deuteronomio 8,2-3, 14b-16
Salmo : Salmo 147, 12-15, 19-20
Di dos Lektura : 1 Korinto 10, 16-17
Evangelio : Huan 6, 51-58


Nos ta drenta den mundu di Dios: Nos tin un Tata nobo, un shelu nobo, un Palabra nobo, un alimento nobo, un bida nobo...
Awe e Palabra ta hala nos atenshon riba e alimento di shelu. E alimentunan ku huntu ku e awa ta loke na mod’e papia ta mantené nos físikamente bibu ; pero nos sa bon ku nos bida no ta formá únikamente pa nos konstitushon físiko frágil. Miéntras kuminda i awa ta mantené nos kurpa nos sa ku den nos interior tin otro realidat ku mester di alimento pa yuda nos krese.
Eukaristia ta e mihó medio ku nos tin pa alimentá i konserva nos bida divino. Kurpa i sanger di Kristu ta nos promé fuente di bida eterno.
Eukaristia ta okupá lugá sentral di nos fe. Hopi bia nos ta haña e pregunta si ku nos komo katólikonan ta konsiente di e realidat aki ku kada be di nobo nos ta selebrá den nos misanan. Iglesia ta habri; hende ku ta bai partisipá na Misa ta drenta. Ta kuminsá ku kanto di entrada. E saserdote ta kuminsá e ritual i esnan presente ta kontesta realidatnan grandi ku hopi biaha no ta adaptá na bida diario.

Laga nos hasi un rekorido di nos Eukaristia.
Nos ta bai Misa no únikamente pasobra nos tin "e obligashon" òf " deboshon". Nos ta bini pasobra ta Señor mes a yama nos. Nunka pensa ku ta di mes bo ta kana bai misa. Ta Señor ta esun ku ta kombidábo. Promé ku kuminsá, meditá esaki den bo kurason: " Señor atami pasobra ABO a yama mi."
Nos ta kuminsá den nòmber di Dios Tata, Dios Yu i Dios Spiritu Santu. Mester pone enfasisi riba Santísima Trinidad.
Mi ta konfesá ku mi ta pekador. Mi ta mira mi realidat relashoná ku DIOS i ku otronan. Mi sa ku mi bida semper ta invitá pa krese for di mi miseria i no for di mi superioridat.
E Palabra. E Palabra ta yega ku su bisturí spiritual. E por habri mi paden sin destruími. Dilanti di dje únikamente ta keda alabansa ku ta sali di mi kurason i di mi boka.
Mi ta kere ku tur fe di Iglesia. Iglesia no ta nunka un lokalidat privá. Iglesia ta patria di alma.
Ofrenda. Ku pan i biña mi ta presentá na Señor mi propio bida pa haña alimentashon.
Pan i biña. Nos ta dilanti di Hesus ku nan ta duna nos kada be di nobo. Ta un sensashon straño di miseria i grandesa ku ta kontra otro. Mi miseria ta mi mes bida. Grandesa ta Dios mes ku nan ta dunami atraves di Iglesia.
Orashon. Mi ta lanta mi mannan i mi alma. Mi mester resa i pone dilanti Dios mi bida i pidié pa nunka mi apartá mi mes di su presensia.
Lamchi di Dios. E momentu di kuminda spiritual ta aserká. Ta duna mi pasobra mi ta asept’é.
Komunion. Eukaristia ta un misterio di komunion. Risibí grandesa di Dios den nos propio fragilidat. Grandesa ku ta yuda bo deskubrí Dios komo Tata i otronan komo ruman.
Pero Eukaristia ta algu asina íntimo ku no por kombertié den algu intimista. Mi ta aserká pa risibí Kristu i komulgá kuné pero no pa hasi un akto mekániko i simpelmente un akontesimentu sosial. Mi ta aserk’E pa mi bida yena ku su presensia. Mi bida ta sali pafó, i ta topa ku otronan den difikultat i intrankilidat di bida. Mi no sa si otronan lo nota ku mi tin Kristu den mi. Mi no sa si e tabernakel ta ei kaminda mi ta biba i ta relashoná mi mes ku otronan?
Kua ta e tèrmometer ku ta komprobá ku e alimento di Kristu ta yena mi bida? Ora mi tin hamber di señor den mi bida di tur dia .... hamber di bèrdat di bida.... di amor i di entrega
Di generosidat i di kariño di parti di e bon DIOS.
Kua ta e tèrmometer pa komprobá ku entrega di Kristu ta alimentá mi di bèrdat?
Ora mi ta kapas pa stima otronan sin midí , espesial esnan mas debil i den nesesidat. Si mi ta kapas di mira den otronan e Señor Resusitá ta ora ku hinter e energia eukarístiko a asimilá den mi bida.
Únikamente for di amor i entrega ta e manera ku nos por yega mas serka pa risibí kurpa di Kristu pa despues hib’é den e tabernakel di nos bida pa esnan ku no ta aserká Iglesia. Bida di kada katóliko mester ta manera un tabernakel movibel, un tabernakel digno i solidario ku doló i speransa di nos mundu, únikamente di tal manera Señor lo bira mas visibel pa hendenan di nos tempu.
Abo ta un bon tabernakel di Dios?
Próksimo bia ku bo ta bai Misa i ora ku e saserdote bisa "Laga nos lanta nos kurason..." pensa bon loke bo ta bai kontestá...