DI NUEBE DJADUMINGU SIKLO A

Promé Lektura : Deuteronomio 11,18. 26-28
Salmo : Salmo 31, 2-4. 17. 25
Di dos Lektura : Romanonan 3, 21-25a. 28
Evangelio : Mateo 7, 21-27


Hasi boluntat di Dios ta realisá loke ta agradá E. Hesus no ta pidi palabra, sino ku e ta spera hecho di nos , ke men demonstrá ku loke nos ta papia ta hiba den práktika. Esun ku kumpli boluntat di Dios ta esun ku di bèrdat ta biba e Evangelio. Hasi boluntat di Dios ta praktiká loke Dios ta gusta, loke ku ta di su agrado. Ora nos ta stima un hende nos ta buska pa hasi e loke ku ta hasié felis. Na mes tempu, debí na ku Dios ta stima nos, su felisidat ta ku nos ta deskubrí bida den plenitut, no un felisidat superfisial, sino e berdadero felisidat, ku ta konsistí den yega na ser nos mes. Esaki ta hiba nos na e di dos sentido di e ekspreshon “boluntat di Dios”: ku ta hasi referensia na e plan grandi, na e proyekto di Dios pa humanidat. Dios a krea nos pa nos ta felis. Mayornan ku ta stima nan yu di bèrdat tin ekspektativa relashoná ku nan. Nan ta deseá pa e yunan desaroyá tur nan kapasidat, nan ke pa nan hasi uso liber di nan donnan p’asina nan transformá den adulto. Esaki ta ainda mas sierto den kaso di Dios. E ta deseá nos felisidat. Dios su proyekto no ta pa anulá nos libertat, sino un invitashon pa nos libertat sea utilisá plenamente ku meta di kada bia ta mas segun su imáhen, kapas pa stima i sirbi e ruman, ku ta e kaminda mas direkto pa e felisidat ku nos tur ta buska.
Nos komo hende a ser kreá pa felisidat. Esun ku ta plenamente felis di bèrdat tin e derecho di bisa su mes: “mi a kumpli ku boluntat di Dios riba e tera aki”. Tur esnan ku ta hustu, tur esnan santu, tur esnan ku a hasi bon tabata felis di bèrdat. Hesus sa ku Dios ta su Tata, ku ta deseá lo mihó p’E i pa mundu, apesar di e aparensianan kontradiktorio. Ta p'esei na Getsemaní i riba krus e ta pone su mes den man di Tata i ta bisa “Bo boluntat sea hasí”. E ta konfia den Dios i ta e konfiansa aki ta esun ku ta dun'é forsa pa asumí sirkunstansianan difísil. Hopi no ta komprondé loke ta nifiká e súplika di e Nos Tata “Bo boluntat sea hasi na tera komo na shelu”. Inklusive tin hende ku ta salta e palabranan aki, keriendo ku Dios ta bai manda kos malu pa nos. Vattimo, den su buki “Kere esun ku ta kere”, ta puntra ta dikon ta eksistí e kustumber di bisa
“ sea loke Dios ke”, únikamente ora ku di bèrdat algu ta bai malu i no, por ehèmpel na ora di gana den di loteria.
Konstruí nos bida riba Baranka firme, ku ta Kristu. Den nos bida ta eksistí un kontradikshon. Di un banda, e oferta ku e sosiedat den kua nos ta biba ta hasi na nos ta di un forma di bida ku ta presentá kómodo i atraktivo den nos wowo i ku ta duna kulto na “biba manera bo ke”. Di otro banda, e kaminda ku Dios ta ofresébu, un kaminda ku ta eksigí pa bandoná e “ami” na fabor di “abo” i ku, ademas, no ta ser komprendé pa esnan ku ta rondó di bo. Ora skohe pa sigui e kaminda di Evangelio bo mester ta dispuesto pa laga lòs i entrega bo mes na bo rumannan. E renunsia aki ta inútil si bo bib’é komo sakrifisio ku bo tin ku hasi pa haña un lugá den shelu. E tin sentido únikamente for di e amor i for di un kombershon profundo ku ta hiba bo na hasi e balornan ku Hesus a proponé bira di bo. Por haña felisidat únikamente ku lealtat, edifikando nos edifisio spiritual riba e baranka firme di e amor di Dios. Hesus no ta primintí un bida sin prueba, Hesus ta primintí ku si ta konstruí e kas riba e baranka anto lo e keda para no opstante di bientu fuerte i mal tempu. Nos bida lo keda firme t’e na fin di tempu, si nos edifiká riba siñansa i amor di Kristu. Leu di djE lo ta un kas ku nan ta konstruí riba santu i konsekuentemente lo por basha abou dilanti inkonsistensia , kalamidat, mal gustu i kontrariedat di bida, e lo por bai pèrdí entre trastorno inmenso i mal raisnan ku mundu eksterno ta duna nos i ta laga nos keda kada be di nobo ku set i asta por ta ... ruiná. Felisidat di hende por redusí t’e na ruina, pero si nos konstruí konsiente riba e Baranka apesar di kontrariedat, desilushon, frakaso, duda, doló, desepshon, amargura, skuridat, inhustisia etc. nada ni ningun hende lo tumba nos.

Ku plaka nos por:
Kumpra kama, pero no soño.
Buki, pero no kultura.
Kuminda, pero no apetit.
Adòrno, pero no bunitesa.
Kas, pero no hogar.
Remedi pero no salú.
Luho pero no simpatia.
Dibèrtishon, pero no felisidat.
Un krusifiho, pero no un Salbador.
Un misa, pero no shelu.
I kòrda ku loke plaka no por kumpra, Dios ta duna nos riba kada dia , sin kobra!