DI DIESNUEBE DJADUMINGU SIKLO A

Promé Lektura : Reinan 19, 9a. 11-13a.
Salmo : Salmo 85, 9a-14
Di dos Lektura : Romanonan 9, 1-5
Evangelio : Mateo 14, 22-33


Lo tabata di tiki importansha pensa ku loke ta mas importante di e storia aki tabata e milager di kana riba awa, i ku únikamente pa esei Hesus a ser proklamá komo Yu di Dios. No ta únikamente e kanamentu riba awa, sino hinter e proseso ku e pasashi aki ta konta nos lo por a siña di dje.
E orashon di Hesus promé ku kualke evento ku "lo revelá" algu importante di djE òf di su Tata ya ta karakterístika su forma di aktua (e boutismo, e transfigurashon, e orashon di Nos Tata, su mes krusifikashon i morto). Esaki ya ta duna nos kuminda pa pensa ku e ta buska pa revelá un aspekto importante di nos fe.
E mal tempu ku ta menasá e barku no tabata algu straño pa e disipelnan ku tabata piskadó òf tabata biba serka di laman, pero loke nunka nan lo a imaginá nan mes tabata di mira Hesus kanando riba e mal tempu , ku outoridat , doño di e situashon. Su sklamashonnan riba su karakter di fantasma òf imaginashon, i e sklamashon di Hesus " boso no spanta, ta Ami", ta kòrda nos riba e aparishonnan di Hesus resusitá; komosifuera na e momentu ei e gloria di Hesus lo a manifestá su mes i ta p'esei e disipelnan no a rekonos’é bon.
Despues ta bin e sorprendente sklamashon di Pedro: “Señor, si t’Abo, mandami kana bin serka bo kanando riba awa.” ku si mi mester kana riba awa bini serka Bo”. Pedro ainda no tabata sigur ku ta Hesus i di tur moda el a pidié algu imposibel: "kana riba awa". Aki Pedro ta hasi un berdadero akto di fe ku despues e demas disipelnan lo kompartí ora nan sklama : "En bèrdat, Abo ta E Yu di Dios". Esaki ta e mensahe sentral di e storia: e akto di fe di e disipelnan ora a sklama ku Hesus berdaderamente tabata Yu di Dios.
E sklamashon aki di Pedro di ke bai serka Hesus a ser kontá únikamente pa Mateo i ku esaki e evangelista ke ilustrá pa nos kon ta biba e akto aki di fe:
Promé: e akto di fe ta konfiansa apsoluto den Palabra di Dios. Boso ta kere ku Pedro (hinter un piskadó) por a pensa ku e lo por a kana riba awa? Si e hasié anto ta pasobra ku e ta skucha bos di Hesus ku ta bis’é: "bini".
Di dos: e akto di fe ta konfia ku un hende no ta kana únikamente riba su forsa. Dikon Pedro tabatin miedu? Pasobra el a pensa ku e lo no por a hasi loke e tabata hasiendo, i ora el a sinti "e awa na su ènkel" el a duda di su mes i di Dios, i a kuminsá ta senk.
Di tres: Dios ta e úniko ku por saka nos for di nos krísis di fe. Pedro no a bira pa mira e barku òf su amigunan, sino Hesus.

E eksperensia aki di Pedro i e disipelnan ta siña nos ki importante ta pa skucha Hesus mei mei di “e mal tempu ku nos ta bibando den nos bida. Ora nos ta pasa den momentunan difísil nos no ta mira Hesus na ningun banda, nos ta sinti miedu i skuridat dilanti di e imposibilidat di haña forsa òf lus pa Sali di situashonnan ku nos ta bibando. Sinembargo, awe nos ta skucha Hesus ku ta siña nos ku E semper lo ta ku nos i t’e asta mei mei di mal tempu” e ta kombidá nos pa kana bin serka djE; ku fe, ku speransa poné den su palabra i no den nos forsa, ku e sertesa ku E lo ta yamando nos pa duna testimonio di su presensia mei mei di nos difikultatnan.

Pedro, tabata piskadó, i e tabata sa ku e no por a kana riba awa. Sin embargo, ku konfiansa den Hesus el a hasi “asta loke tabata imposibel”. Nos talbes ta pensa ku nos no por ku e situashonnan den kua nos ta bibando, ku ta imposibel pordoná kasá òf famia, ku ta imposibel kuida e persona ku ta malu òf ta mashá kabesura, ku ta mas ayá di nos forsa pa hiba nos yunan riba e kaminda di Dios. Sinembargo, awe nos ta skucha un “bos”, nos ta skucha esun ku ta Palabra di Dios, ku ta bisa nos “BIN”. Kana riba awa, tribi na pordoná, pa tin pasenshi, pa mira mas ayá di bo forsa, pa konfia den Mi. Únikamente ku nos wowo bon fihá den Señor i nos esfuerso sinsero nos lo por sali viktorioso di e tormenta.

Ban pensa e siman aki riba e proyekto, situashon òf desishon ku nos no tabata ke asumí pa motibu di miedu, pa falta di klaridat òf di forsa. Skuchando bos di Kristu ku ta yama nos pa siguiE “den e mal tempu”, laga nos tribi dal e promé paso den direkshon di loke Hesus ta pidiendo nos.