DIA DI TUR DIFUNTO

Promé Lektura : Yob 19, 1 23-27
Salmo : Salmo 27, 7-8b. 13-14
Di dos Lektura : 1Korintonan 15, 51-57
Evangelio : Huan 5, 25-29

Di e solemnidat di Tur Santu nos ta pasa rápidamente na Konmemorashon di Fielnan Difunto. Nan ta dos fiesta serka di otro pero diferente. Tur Santu ta keda un tiki leu di nos. Santunan ta siertamente esnan ku a bai nos dilanti riba e kaminda di fe, hòmber i muhénan ku a duna tur kos den nan kompromiso ku Evangelio. Pero nos ta demasiado kustumbrá di mira na pia di altarnan i na murayanan di nos iglesianan. E fiesta di awe, sinembargo, ta hiba nos na terenonan mas familiar. E difuntonan ta nos difuntonan, nan ta nos famianan, nos amigunan. Nan tin kara i bos i nos tin rekuerdonan di nan. Na hopi lugá meskos ku aki tin e tradishon riba e dia aki di bishita santananan, drecha grafnan di nos famianan i hasi un ratu di orashon...

Di loke ta leu nos ta pensa riba loke ta serka. E difuntonan ta figuranan leu. Den algun sentido ni sikiera nan ta santu. Na promé lugá, pasobra nan no ta kanonisá. I, na di dos lugá, pasobra nos konosé nan lo sufisiente pa sa di nan kosnan bon i di nan kosnan malu. Pero, lo mas importante ta ku nos ta uni nos na nan lasonan afektivo, lasonan di kariño òf lasonan familiar. Ku nan nos a krese, nos a siña na biba, a kompartí kas, preokupashon i alegria. I awe nos ta sinti nan ousensia. Na prinsipio, ora nan a bai, e bashí tabata ku nos no por a wanta. Awe el a bira mas grandi –tempu ta kura tur kos–. Pero e ta sigui einan, manera un lei ineksorabel. Nos tur tin ku bai. Morto ta yega na nos tur. Pero ora e yega na esnan di nos , nos ta keda manera gòlpiá dor di un orkan inesperá. E lasonan ku tabata uni nos ta kibra direpente i e doló ta kibra e kurason.
Awe ta un dia pa tur doló, skondí den fondo di nos baul dor di paso di tempu òf dor di trabou i otro okupashonnan ku kua nos ta distraí, ta sali na superfisie. No tin ku nenga e doló. Morto, den kualkier di su manifestashonnan semper ta laga nos den estado di shòk..

E fe ku ta brota di e doló
Pero nos kreyente ta biba bida for di e perspektiva di fe. I ta p’esei tambe nos ke biba morto for di fe. E último añanan aki nos a bai diferente entiero, sivil i religioso, den kua e orador di turno a papia hopi di ku e difunto tabata sigui biba i lo a sigui biba pa semper “den nos memoria”. No ta esaki den kua esnan ku ta sigui Hesus ta kere. Pa kuminsá, pasobra nos ta konsiente di kon delegá nos memoria ta. I, mas importante, pasobra nos ta kere ku Hesus a resusitá entre mortonan. Esaki ta e piesa klave di nos fe. Hesus ta biba i nos ta biba kunE. E “lo transformá nos kurpa humilde” (promé lektura). “Nos lo mira Dios, mi mes lo mir'é”, Yob ta bisa den e promé lektura. Esaki ta nos fe. No ta kumbiní lubid’é ni aseler’é di loke ta fundamental. Nos difuntonan ta biba. Nos ta spera di e mizèrikòrdia di Dios ku nan ta bibu i den su presensia, ku Dios lo a tuma nan den su reino di bida den plenitut.
Esaki no ta kita e doló. Fe no ta transformá morto den un momento sin doló pa esun ku ta muri òf pa esnan ku ta rondoná nos. E separashon ta sigui siendo brutal. E temor na lo deskonosí, e miedu pa laga esnan ku stima nos i nos ku stima nan, tur esaki ta hasi nos daño, e ta kibra nos paden, e ta laga nos yora. Pero laga nos hisa nos wowonan na Dios i, mei mei di nos doló, nos afirmá nos fe, laga nos bisa ku bida tin sentido mas ayá di e morto aki, ku Dios no por laga nos bandoná su kreashon pa desaparishon.
Awe nos ta hasi memoria di nos kerido difuntonan. Esnan mas serka, esnan ku kua nos ta kompartí bida, esnan ku nos tabata stima ku amor sinsero, esnan ku tabata nos amigunan, ta bini na nos memoria. Den fe, nos ta kere ku nan ta bibu, ku nan a nase na un realidat nobo, na un bida mas pleno i felis. Nos no sa masha bon kon e bida aki ta. Pero di nos Dios Tata nos sa ku nos no por spera nada malu. Nos tin ku pasa dor di morto, dor di un pashon-pasku semper kompliká i difísil. Nos tin ku nase na e bida nobo i ta p'esei nos mester muri na esaki. Nos ta drenta den lo deskonosí pero, manera semper, di e Dios di Hesus, Dios di mizèrikòrdia i di tur konsuelo, Dios di Bida i no di morto. E Dios den kua nos a pone nos konfiansa i nos speransa.