Promé Lektura : Isaías 61, 1-2a. 10-11
Salmo : Lukas 1, 47-54
Di dos Lektura : 1Tesalonika 5, 16-24
Evangelio : Huan 1, 6-8. 19-28
E siman aki e Palabra ta aserka nos na Huan Boutista, un di e figuranan mas importante den istoria di nos fe. Su grandesa ta yega na tal ekstremo ku den Beibel mes (den Hechonan 19, 3-4) ta konta nos ku Pablo a topa ku algun "disipel" ku no tabata sa nada di loke a bini despues di boutismo di Huan… Pa nan boutismo di Huan tabata lo máksimo. Nos sa ku inkluso tabatin algun sekta di e époka ku a alsa Boutista na lugá di e propio Mesias.
Ta dikon Huan Boutista ta asina importante?
E no a hasi milager, a lo ménos ku nos ta na altura di dje. E no tabatin un bida ekstenso di predikashi. E no tabata fundadó konsiente di ningun kredo…
Kiko ta anto ta loke a hasié SER grandi?
Nos ta ku kere ku ta dos elemento fundamental ta revelá na nos e importansia de e hòmber aki:
- Santidat di su bida ta reflehá den e konstante obediensia na Dios, obediensia na boluntat di Dios.
- E rekonosementu di bèrdat komo forma de evangelisashon i di siguimentu di e Mesias. E no tabata esun ku mester a bini…
A lo largu di istoria nos mester komprobá kon hopi persona enkargá ku evangelisashon a atribuí na logronan optené. Dios ta bira pa nan un medio, no e fin. Pa e personanan aki ku ta buskando mas e mérito propio ku grandesa di Dios, nan lo ta mas interesá pa nan keda bon, ku pa e hendenan aserká Señor. I Huan ta bini pa kibra e skemanan egoista i antikristian aki. Un persona ku ta evangelisá ta grandi ora e ta kapas di ta kaminda ku ta kondusí na Dios. Esaki ta loke Huan a bisa i a hasi.
Tin persona ku ta purba evangelisá, pero usando únikamente nan kriterio. Nan ta kere ku evangelisá ta di hasi loke nan ta bisa ku mester hasi. Nan ta pensa ku kere den Señor ta pa tur hende tin mesun kriterio ku nan i mesun punto di bista. Esaki no ta asina. Evangelisá ta hasi pa hende ta kapas pa pone nan wowo den Kristu, no den e evangelisadó…
- Kon ta ku bo tarea di evangelisadó ?
- Kua ta kriterio ku un outéntiko evangelisadó mester tin?
Den Huan Boutista nos ta haña un fe dinámiko, butá den wega. E no ta buska lembelansa ni grandesa.
Nan ta aserk’é i puntr’é ta ken e ta. Su bida tabata un interogante pa esnan ku tabata konos’é. E promé fase di tur evangelisashon ta di spièrta pregunta, nesesidat di reflekshonnan tokante dikon tal persona ta manera e ta. Si e ta un berdadero evangelisadó e kontesta lo bai semper dirigí na Hesus.
Nan a hasié diferente pregunta i e ta kontestá:
- "Ami no ta e Mesias". Den e époka ei no tabatin e mínimo idea tokante kon e Mesias sperá lo mester tabata, Huan lo por a gara na kualkier di nan… E Boutista ta rechasá tur referensia ku nan lo por a dun’é komo Mesias.
-"Abo ta Elias?". E hudiunan tabata kere ku, promé ku e Mesias lo a bini, Elias lo a bolbe na Tera pa ta su mensahero i prepará mundu pa risibié. Speshal e lo a bini pa resolvé tur malkomprondementu. E lo a disidí ken tabata hudiu i ken nò; e lo a reuní famianan ku tabata den enemistat. Kreensia den binida di Elias promé ku e Mesias ta bini den Malakias 4,5. Huan ta kontesta ku e No ta Elias tampoko.
-"Anto, ta abo ta e profeta ku mester a bini?" Na kiko nan tabata referí ? Den e époka ei nan ta kere ku Isaías òf Yeremías lo a bolbe ora e Mesias lo a bini. E idea aki di e profeta primintí ta bini den Deuteronomio 18,15. Huan tampoko ta e profeta sperá ei. Ningun di e preguntanan aki tin kontesta satisfaktorio.
Ta ken Huan Boutista ta anto?
E no tabata mas ku un bos ku tabata yama pueblo pa prepará kaminda pa binida di e Rei.
E otro kuestion ku nan ta plantia ta riba outoridat ku e tin pa batisá.
E boutismo ku nan tabata praktiká e tempu ei no tabata pa israelitanan, sino pa e prosélitos, o sea, esnan pagano (esnan ku no tabata di rasa hudiu), ku tabata prosedente di otro rasa, pueblo i religionnan i a kombertí den e fe di Israel. Nunka tabata batisá un israelita; ya e tabata pertenesé na pueblo de Dios komo nan tabata desendiente di Abraham i a ser sirkunsiá. Pero e paganonan mester a keda labá pa medio di boutismo. Huan tabata hasi ku e israelitanan loke únikamente mester a hasi ku e paganonan. E tabata sugerí ku e pueblo eskohí tambe mester a risibí limpiesa.
Na rais di su outoridat pa batisá e ta hasi un deklarashon di humildat komparabel ku e momentunan estelar di sernan humano di kende nan alma ta ankrá den Dios. E ta bisa: "Mi ta batisá boso ku awa, pero tin Un ku boso no konosé mei mei di boso; E ta esun ku ta bini despues di mi. Ami ni sikiera ta digno pa bùk i lòs feter di su sandalia.”
Lòsmentu di feter di sandalia tabata obligashon di katibu. Tabatin un dicho rabíniko ku ta bisa ku un disipel lo mester tabata dispuesto pa hasi tur kos pa su maestro, no únikamente kita su sandalianan…
Mishon di Huan tabata únikamente prepará e kaminda.
Mensahe di Huan Boutista ta:
E Mesias ta bini. Eliminá tur loke ta stroba pa por risibié. Arepentí di boso pikánan p'asina E por bini i reina riba boso komo Rei.
Geen opmerkingen:
Een reactie posten