PASKU DI NASEMENTU 2008

Solemnidat

Promé Lektura : Isaias 9, 1-3. 5-6
Salmo : Salmo 96, 1-2. 16-18. 22
Di dos Lektura : Tito 2, 11-14
Evangelio : Lukas 2, 1-14


Awe nos ta selebrá ku Dios a hasi su mes un di nos, el a bira hende. Esun tabata lus i tabata biba den eternidat, a aserká skuridat i a forma parti di nos istoria. Kon ta hasi selebrá e echo aki sin fe? Fe ta permití nos kere den Dios, rekonosé su presensia bibu entre nos, eksperensiá su amor infinito ora papia ku nos no ya no pa medio di profetanan sino atraves di su propio Yu. FE a hasi nos yu di Dios! Bendishoná sea fe ku ta permití nos selebrá Pasku i ku esaki nos propio nasementu den bida di Dios.

Sinembargo, Pasku no ta selebrá solamente loke a pasa dos mil aña pasá. Pasku ta habri nos pa speransa ku ta anunsiá na nos próksimo binida di nos salbador. Pasku ta nifiká spera semper un mihó bida, un mihó aña, spera ku goso e viktoria definitivo riba nos sufrimentu i nos pikánan pa por gosa plenamente di presensia di e amor di Dios. Pasku ta habri nos kurason pa un speransa ku mundu no por duna nos, ta anhelá e pas ku únikamente Dios ta duna nos i e goso ku su presensia ta trese pa nos.

Huntu ku fe i speransa, Pasku ta habri pa nos e amor infinito di Dios pa nos. No ta nos forsa a alkansá esaki, tabata Dios den su mizèrikòrdia ku tabata ke “alkansá nos” na nos. Amor a bira karni i a biba entre nos. Kon no keinta nos kurason pa e amor aki ku a bira un ku nos? Lo tin un skina humano ku Dios no a abarká ? Hamas! Dios a bira plenamente humano i ku esaki a kapasitá nos pa ta divino, pues nos a bira yu den e Yu. Esaki ta e amor na kua nos ta yamá pa biba. Pasku ta sende den nos deseo pa kompartí e amor aki ku nos a risibí, den rekonosé e amor aki den nos ruman i selebr’é ku tur festividat posibel.

Pasku ta invitá nos pa rebibá nos fe, nos speransa i nos karidat. Kon esaki lo afektá nos den nos bida diario?

Asina manera nos ta rekonosé ku ta imposibel selebrá Pasku sin fe, di mesun manera ta imposibel selebrá presensia di Dios den nos bida sin dje. Kon nos por trata nos famia den amor di Kristu, si nos no ta permití nos fe yuda nos mira un proyekto divino den dje i no únikamente relashonnan humano ku tin bia ta difísil? Fe, ta duna nos kapasidat pa selebrá presensia di Dios no únikamente ora ta Pasku, sino hinter nos bida, pues “Dios a bini na nos” via di nos mes. Nos lo ta kapas pa rekonos’é e Pasku aki?

Di e mesun manera, mira nos bida sin e speransa kristian ta bai bèk na un seri di viktoria i frakaso ku poko sentido pa nos realisashon integral. Speransa di Pasku ta permití nos mira nos bida ku optimismo, poniendo nos konfiansa i nos goso den Señor i no únikamente den nos esfuerso. Esaki ta duna nos libertat, pas i riba tur kos ta permití nos biba e
kompañamentu di Dios den nos istoria personal i familiar.

E karidat kristian, esun ku ta bai mas ayá di relashonnan ku ta kumbiní, esun ku ta duna sin spera di risibí, esun ku nos ta biba ku spontaneidat i ta duna nos libertat total; e karidat aki ku nos a risibí di e Salbador, ta e karidat ku e yuchi ku a nase na Bètlehèm a trese pa nos. Nos por kompartié ku esnan ku ta rondó di nos?

Esaki ta e Pasku berdadero, esun ku ta kòrda nos ku hinter nos bida nos a siña pa biba ku fe, speransa i karidat hasiendo di kada dia un selebrashon di nasementu di nos Salbador.