DI DOS DJADUMINGU SIKLO B

Promé Lektura : 1 Samuel 3, 3b-10. 19
Salmo : Salmo 40, 2, 4ab. 7-8. 8b-9. 10
Di dos Lektura : 1 Korinto 6, 13c-15a. 17-20
Evangelio : Huan 1, 35-42

Huan ta rekonosé Hesus komo esun ku mester a bini.
E Boutista a bini pa pone pueblo den kontakto no ku e mes sino ku Kristu. E a kuminsá okupá di dos lugá. Kada bia di nobo nos tin ku profundisá den e figura di Huan pa mira e kapasidat di interiormente laga lòs dilanti di Señor. For di e personahe aki nos por saka masha bon siñansa den nos mundu den kua ta fomentando kompetensia na lugá di kolaborashon, kon gana i okupá promé lugá a kosto di loke sea , riba duna servisio desinteresá…
Na sierto okashon , nos ta mira kon e afan aki pa sobresalí ta sali dilanti asta denter di aktividatnan kristian: esun ku hinter su bida a bin ta traha den parokia i ke pa tur kos pasa den su man… Esun ku hinter su bida a duna lès di katisashi i ta mira katekistanan nobo komo intruso.… E saserdote ku ta envidiá logro pastoral alkansá pa su kompañeronan… E religioso/a ku no ta kaba di akseptá sierto rumannan den komunidat…
Ta aspektonan di e tema ku Huan Boutista a sa di hasi ku perfekshon: sa kon pone su mes na di dos lugá pa di tal forma Dios okupá e promé lugá den nos bida i den bida di otronan. Hopi frakaso pastoral ta presentá pa e afan aki di protagonismo ku no ta kondusí na Dios sino na kurason será di e religioso falsu.
Nos mester tin wowo i kurason habrí pa sa ku sigui Señor no ta algu fásil, nunka esaki tabata asina. Siguidónan outéntiko di Hesus ta esnan ku ta pone É riba tur nan mes lucha interior i interes personal i egoismo. Lo demas ta bon intenshon…

Kiko ami ta buskando den mi bida kristian?
Kua ta mi propósito i metanan?
Kon Señor ta presente den mi bida?

Algun persona ta buska den fe kosnan ku fe no por ofresé. Tin hende ku ta yega serka buskando seguridat personal, miéntras ku FE ta duna nos un seguridat interior riská i semper yen di tentashon. Otronan ta buska pa hasi karera: di ta bon mirá, rekonosí i atmirá… Tin esnan ku ke haña den fe un sorto di pas, pero nan no ta tribi lucha ku nan mes. E pió lucha ku un persona por hiba ta e gueranan ku e tin ku e tin ku kombatí kontra su mes.
E disipelnan di Huan ta yama Hesus "rabi", ku literalmente den hebreo ke men "Mi grandi". Ta título di rèspèt ku nan tabata duna studiantenan i esnan ku tabata buska konosementu di nan maestronan i di hendenan sabí. Nos mundu ta yen di persona grandi ku, ku nan bida i nan obra ke duna dignidat na e ser humano, pero laga nos no lubidá nunka ku UN ser so ta nos outéntiko Maestro.
E persona ku ke ta disipel di Hesus no ta keda satisfecho ku un a palabra di pasado, sino ku e tin un enkuentro personal kun’E.
Bida kristian outéntiko ta e úniko realidat den eksistensia ku ta kuminsá yegando ya na e meta: na Hesus. Kristian ta esun ku a deskubrí Hesus den parti interior di su bida, i ya for di tal momentu , hinter su bida lo ta profundisá den djE. I Señor ta asina inagotable ku nos mester di un eternidat pa nos sigui sambuyá den djE.
Tin hende ku ta skucha papia tokante Hesus, papia di Hesus i nan ta papia ku Hesus, pero kisas nan no a eksperimentá den profundidat di nan kurason e forsa di tal enkuentro , di ei kurasonnan débil i dudoso.
E úniko enkuentro ku por transformá bida di un ser humano ta e enkuentro berdadero ku Hesus, di ei ku disipelnan di Huan a keda kuné djis despues di a topa kunE.
E Evangelio ta hasi referensia na e mirada di Hesus na nos; un mirada ku ta bai na fondo di bida, na e kurason. Hesus no ta mira solamente loke e persona ta na tal momento, sino tambe loke e por yega na ta. E ta mira den kada ser humano no únikamente loke tin den aktualidat, sino tur loke e por yega na ta si e akseptá na kontra kuné i sigui’É.