DI SEIS DJADUMINGU SIKLO B

Promé Lektura : Levítiko 13, 1-2. 44-46
Salmo : Salmo 32, 1-2a 5. 11
Di dos Lektura : 1 Korinto 10, 31-11, 1.
Evangelio : Marko 1, 40-45

E promé lektura ta pone kla pa nos ku e fèrmidat “lepra” (asina nan tabata yama kualke malesa di kueru) tabata afektá e persona por lo mínimo den tres aspekto: for di ora ku a skucha ken tabata malu e mester a aserka un saserdote pa ser deklará “impuru”, nos por tuma nota di e aspekto religioso di e fèrmidat; despues su karakter sosial ta manifestá su mes ora e persona keda “ekspulsá” di e komunidat t’e ku ora e bira bon, i ademas di tur esaki, e hende malu tabata karga ku su malesa físiko. Di tal manera e persona tabata mira su mes rechasá pa Dios, pa medio di komunidat i tabata karga dolónan di su enfermedat. Ta ki bida òf speransa e persona ei lo tabata por tin?
Ta p'esei , den e Evangelio ku nos ta skucha riba e djadumingu aki, Hesus ta mustra salbashon presisamente den e tres dimenshonnan aki: e leproso ta eksperensiá salbashon ku Hesukristu a otorgá esaki na dje promé ora el a kur’é, pero mas ku tur kos, ora el a pon’é bèk dilanti di Dios i dilanti di komunidat. Esaki ta e salbashon ku Hesus ta bin trese pa nos, un salbashon ku ta konkretisá su mes den pas i goso pasobra a rekonsiliá ku Dios; ademas di un salbashon ku ta re integrá nos den komunidat.

Riba dia di awe, ta ken ta biba marginá den nos sosiedat? E ansianonan ku hopi bia ta lubidá den nan kas òf na kas di ansiano ; muchanan ku no tin akseso na edukashon ni na un hogar digno; e beibinan ku ta keda asesiná den barika di nan mama; enfermonan di AIDS; òf loke hopi komun, esnan ku tin sierto marka den nan karakter (pasobra nan ta tímido, nan inseguridat, nan forma straño di aktua, su personalidat introvertí). Tur esnan ku ta sklama pa salbashon ku Hesus a bin pa trese. Pero pa e salbashon aki manifestá su mes, mester di kristiannan komprometí ku a eksperensia salbashon personal i ku ke kompartié ku otronan. Hopi bia, ora nos ta sinti nos mes sigur i stabil, nos ta lubidá ku tin hende ku mester di nos, pasobra podisé nan no ta pasando den un período asina bondadoso manera esun di nos. Einan ta kaminda nos mester biba nos fe; einan ta lugá pa reklamá salbashon di Kristu. Nos tur mester konsiderá nos mes mensahero, mensaheronan di salbashon, i e salbashon aki no ta yega tantu pa medio di palabra sino pa medio di hecho, hecho ku ta mustra integrashon, gesto ku ta ekspresá akseptashon, i aktitut ku ta promové unidat. Esaki ta salbashon, esaki ta e mensahe di Kristu na nos tur.

E siman aki, laga nos biba mas sensibel ku personanan ku generalmente nos ta ignorá ; por ta nos no ta hasi nan ningun daño pero tampoko nos ta stima nan manera Kristu ta stima nan. Únikamente asina nos lo ta dunando Gloria berdadero na Dios ku nos bida, manera san Pablo ta pidi nos den e di dos lektura. (I Kor 10,31)