DI SHETE DJADUMINGU SIKLO B

Promé Lektura : Isaias 43, 18-19, 21-22. 24b-25
Salmo : Salmo 41, 2-5. 13-14
Di dos Lektura : 2Korinto 1, 18-22
Evangelio : Marko 2, 1-12

Den mayoria di e milagernan ta e propio personanan ta esnan ku ta sklama, esnan ku ta supliká i esnan ku ta perkurá pa sanashon. E Evangelio di awe ta demonstrá nos e pobresa total di un ser humano ku ni sikiera por aserká Hesus riba su mes forsa. Nan tin ku hib’é, transportá pa amigu- òf famianan, pero e final ta meskos ku pa esnan ku riba nan forsa propio ta sklama pa sanashon.
Hesus ta proklamando su mensahe ora ku e keda interumpí den forma abrupto pa e paralítiko i su kompañantenan. E enfermo ei probablemente no tabata buskando e mensahe sino kura i ta pa e motibu aki el a topa ku Dios.
E Palabra ta bisa ku ora Hesus a mira "e fe ku nan tabatin" tantu e enfermo komo su ayudantenan, E ta dirigí su mes na e enfermo i ta bis’é: "bo pikánan ta pordoná". E afirmashon aki awe por parse nos un poko straño. E ta bai buskando salú i loke Hesus ta hasi ta pordon’é su pikánan.
Laga nos pone e tema den su konteksto.
Den forma nesesario hudiunan tabata relashoná piká ku sufrimentu. Pa nan si bo ta malu òf strobá pa hasi algu tabata konsekuensia di piká. Si un hende tabata sufri tabata pasobra el a hasi piká. Pa e hudiunan, un enfermo tabata un hende Dios tabata rabiá. Inkluso awe tin hopi hende ku e idea aki, nan ta kere ku fèrmidat ta fruta di algu malu ku nan a hasi i na ta bisa kosnan manera "…ami no a hasi nada malu pa Dios ta manda e fèrmidat aki p’ami …"
Piká i fèrmidat tabata inseparabel pa mentalidat di tal époka. Kualke hudiu lo tabata di akuerdo di ku pordon di piká tabata kondishon ku ta kana dilanti di sanashon.
Atrobe Hesus ta kibra un skema, E ta pordoná e piká p'asina e kura realisá den plenitut; pero pordoná piká tabata kualidat eksklusivo di Dios. Ta Dios so tabata esun ku tabata por a pordoná piká, i ta p’esei maestronan di lei a akus’é di blasfemia. Blasfemia tabata ser kastigá ku tiramentu di piedra: Lv 24,16.
Den nos mundu di awe tambe ta eksistí hopi ser humano kargadó di malesa: físiko, moral, sosial… Kada un di nos por habri parti di e dak ku ta separá hopi hende di Dios i hasi ku ta produsí e enkuentro entre Dios i e ser humano heridá pa diferente malesa. Kon nos debil portadonan di fragilidat, lo por habri e burakunan den e dak pa e enkuentro ku Señor?

Manteniendo fe den nos bida, loke sea ku sosodé, Perkurando pa e konfiansa den Dios no tambaleá dilanti di nos propio debilidatnan. Si ami ta debilitá otronan lo kai ku mi. Si ami hundi otronan lo no alkansá e meta…

Ku orashon i akshon. Resa ta partisipá den intimidat di Dios, SA kuantu e ta stima nos i KON e ta stima nos. Aktua ta pone na obra loke Dios ta deseá p’ami i pa otronan.

Kargando peso di otro, no komo un bònder pisá di maldat —di piká— di e otro, sino komo un apoyo den debilidat di esun débil. Ta di sosten pa otro ta nifiká ku nos tambe mester di sosten den un hende; únikamente asina por karga tantu peso.

Esnan ku a hiba e paralítiko a hasi tur kos i mas. Nan tabata kreativo den nesesidat, nan a yena nan mes di konstansia i nan tabata masha insistente. Esaki por ta e aktitut básiko di kualke proseso di evangelisashon.
Ta normal ku semper nos ta kontra ku estorbo pa hiba otro serka Hesus.
Hesus ta kura e enfermo i despues di e milager tin un akto ku por pasa nos forbei. E Palabra ta bisa ku e enfermo "a kohe su kama i a sali bai den presensia di tur hende." Kohe e kama aki mashá bon por nifiká asumí pasado, e mesun pasado di sufrimentu i soledat. Komo ser humano tin hopi kos di pasado ku ta paralisá nos, ta kobardiá i ta tolondrá nos. Ta kosnan ku ta hasi nos infelis. Aseptá pasado ya kurá ta mira loke a pasa sin doló. Kuantu sufrimentu sin fecha di vensementu ta eksistí den hopi ser humano!
Únikamente esun kurá ku asumí su pasado por hisa su kama i kana pasa riba kaminda di DIOS. Si ántes e kama —e pasado— tabata esun ku tabata sostené su parálisis, e ta awor e bida kurá ku ta mantené su rekuerdonan.
Nunka nos mester lubidá ku salbashon ku Hesus ta trese pa nos ta salbashon ku ta kubri tur dimenshon di e persona: pasado, presente, sintimentu i bida sosial…