DI KUATER DJADUMINGU DI KUARESMA SIKLO B

Promé Lektura : 2Krononiko 36, 14-16. 19-23
Salmo : 137, 1-6
Di dos Lektura : Efeso 2, 4-10
Evangelio : Huan 3, 14-21


Ya nos ta riba e di kuater djadumingu di kuaresma, falta únikamente dos siman pa Siman Santu kuminsá i lekturanan di e djadumingu aki ta presentá nos motibu prinsipal di tur e susesonan aki: E amor di Dios pa su pueblo. Manera e promé lektura ta bisa nos, Dios nunka ta bandoná su pueblo, E semper ta kumpli ku su promesa; i san Pablo ta bolbe rekordá esaki: “mizèrikòrdia i amor di Dios ta masha grandi”. Laga nos analisá teksto di e Evangelio.
E evangelio aki ta un parti di e diálogo entre Hesus i Nicodemo. Den e versíkulonan promé ku e evangelio di awe, Hesus ta papia ku Nicodemo di bida eterno, bida nobo di e Spiritu; pero Nicodemo ta kuestioná Hesus “kon esaki por ta?”. E kontesta ku Huan ta pone den boka di Hesus ta impaktante. Ora e ta hasi e komparashon di e Yu di hende ku e kolebra di bròns den desierto ku a sirbi e israelitanan pa salba nan mes di e mordé di e kolebranan, Hesus ta pidiendo ku pa biba e bida nobo di e Spiritu mester kere den esun krusifiká komo berdadero Yu di Dios.

Huan ta pidiendo su komunidat pa nan kontemplá Esun krusifiká i rekonosé den djE e Yu di Dios entregá pa medio di su Tata. Ta krus ta prinsipio di nos salbashon. Den dje Huan ta pidi nos rekonosé e amor ku Dios tabatin pa nos, su mizèrikòrdia i bida ku pa medio di esaki Ela duna nos. Kere asina den e Yu di Dios ta nifiká drenta den relashon ku “e SER krusifiká”. NO ta algu ku ta ku rasonamentu so por komprondé, kere den djE ta nifiká laga su amor afektá nos. Asina ta , esun ku no ta kere, ke men, esun ku no ke tin relashon ku Hesu-Kristu Morto i Resusitá, lo no por biba e bida nobo di e Spiritu.

E oferta di Dios ta un realidat bisto. E a stima nos na mil manera atraves di siglonan, i su manifestashonnan tabata hopi. Dios nunka lo bandoná un yu di djE, nunka E lo laga un hende sin e mantel di su amor, nunka E lo nenga un pordon. Es mas, Dios a stima su pueblo asina tantu ku su mes yu a bini pa proklamá nos su amor i su mizèrikòrdia. Sinembargo, e oferta divino aki tin un limitante, nos fe. Ke men, si nos komo hende no ta akseptá tal amor, si nos no ta dispuesto a biba segun e bida ku Hesus a siña nos, si nos no akseptá pa relashoná nos ku un Krusifikado; tur su amor i su esfuerso pa guia nos na e bida berdadero ta keda opstakulisá.

No sa pakiko hendenan di awendia tin asina tantu miedu pa kere den Dios? Nan tin miedu di pèrdè nan libertat , ora ku e amor di Dios lo hasi nan kompletamente liber; nan tin miedu di pèrdè nan ophetividat , ora ku ta Dios ta fuente di tur Bèrdat; nan tin miedu di komprometé nan mes, ora Dios a duna nan tur loke nan tin. Enfin, nos ta kere ku esun ku ta batisá i no ta disidí di biba su fe, ta pasobra e no a duna su mes kuenta ku Dios lo a salb’é i a yen’é ku su amor. Kere den Hesus ta un relashon di amor i no únikamente algun bèrdat pa memorisá òf algun misterio pa akseptá.

E siman aki ta bale la pena renová nos relashon ku Dios. Trata di hasi un “inventario” di tur e donnan, ku Dios a duna bo: bida, la famia, amor, amistatnan, fe, goso, pas, etc. I analisá bo kontesta, kon bo a kontestá na tur esaki ku Dios a regalá bo? Talbes lo tabata bon pa nos aserka Dios e siman aki pa yama danki i pidié pordon di nos ingratitutnan i di nos faltanan kontra nos rumannan.