DI TRES DJADUMINGU DI KUARESMA SIKLO B

Promé Lektura : Éksodo 20, 1-17
Salmo : 19, 7-10
Di dos Lektura : 1 Korintio 1, 22-25
Evangelio : Huan 2, 13-24

Nos ta kuminsá e di tres siman di kuaresma ku e “imágen” aki di e Evangelio di Huan. Kada pasashi ku e Evangelista ta konta nos ta bisa mucha mas di loke na simpel bista nos por lesa, ta p'esei nos ta yam’é imágen.

E pasashi di Hesus den tèmpel, ta kontá na kuminsamentu di e evangelio di Huan, miéntras ku demas evangelista ta konta esaki na final di e bida públiko di Hesus. Dikon? Pa por komprondé esaki, nos tin ku mira e konteksto; San Huan ta kuminsá su evangelio presentando e inougurashon di tempunan nobo, di tempunan mesiániko. Asina, e awa di purifikashonnan a kambia den biña di e Aliansa Nobo na e kasamentu di Kana; e Tèmpel i su sakrifisionan antiguo a keda transformá pa Kristu presentando E mes komo e Tèmpel Nobo kaminda Dios i Hende lo mester topa; i Hesus ta splika Nicodemo ku mester nase di nobo pa medio di Awa i Spiritu. Esakinan ta e tempunan mesiániko, di alabansa na Dios den Spiritu i Bèrdat, tempunan renobashon i purifikashon.

Hesus ta desaprobá e forma den kua e Tèmpel, komo lugá de enkuentro entre Dios y su Pueblo, a keda kombertí den un lugá di nogoshi, di inhustisia, di sakrifisio bashí i distanshamentu entre Dios i su Pueblo. Ta p'esei, e akshon di Hesus ta reflehá su mishon di ser un lugá nobo di enkuentro entre Dios i hende. Ya ritonan lo no ta bashí, ni murayanan di e Tèmpel di Herusalèm ku lo hasi Dios presente; awor Hesus lo ta e lugá ei di enkuentro, den DJE hendenan lo por kontra ku Dios, rekonsiliá kunÉ.

Hesus, ta limpia e tèmpel di Herúsalèm komo señal di renobashon ku El a bini pa realisá entre hende i Dios. Esaki tabata un echo di pasado; pero awor, nos tambe ta tèmpel di Spiritu Santu, i nos ta warda presensia di Dios mes den nos interior. Kon nos ta respetando e Tèmpel aki? Ya nos no a akumulá hopi “bendedó i kambiadónan di plaka” den nos interior ku ta buska pa hustifiká un relashon ku un Dios ku no ta esun di Hesukristu?
Ke men, ora nos a kustumbrá di biba sin pasenshi, ku karidat “selektivo” (na esnan ku ta kumbiní nos), krítika, mentira, mitar bèrdat, indiferensia pa esun den nesesidat, rabia, dependensia eksesivo na kos òf imágen sosial, ets. Bon, pues tur e realidatnan aki lo tabata nos negoshantenan, ku no ta permití nos biba un enkuentro pleno ku nos Señor.
Laga pa durante e kuaresma aki Señor limpia nos interior; por ta ku nos tin ku hasi algu di violensia ku nos mes pa legumai algun bisio, pero nan ta nesesario pa ser un Tèmpel bèrdadero kaminda hende por topa ku Dios.

E siman aki laga nos i intensifiká nos orashon, trata na hasi algun orashon ku nos no ta kustumbrá di hasi: un rosario, un bishita na Santísimo, misa den siman; buska algu ku ta sirbi nos pa rekonosé e bisionan aki ku nos ta karga i ku no ta laga nos reflehá di e amor di tata ku tin paden di nos. Pidi Hesus pa bini den nos tèmpel i purifik’é manera El a hasi ku esun di Herusalèm.