DJADUMINGU DI PASKU DI RESUREKSHON DI HESUKRISTU NOS SEÑOR

Promé Lektura : Hechonan 10, 34a. 37-43
Salmo : Salmo 118: 1-2, 16-17, 22-23
Di dos Lektura : Kolosensenan 3, 1-4
Evangelio : Huan 20, 1-9

Djasabra anochi ta selebrá e Gran Vigilia di Resurekshon. E ta e fiesta mas grandi di Iglesia; e ta e selebrashon di unda tur demas selebrashonnan ta tuma nan elementonan, ta p'esei nan ta yam’é “Mama di tur Liturgia”. I ta ku riba e dia aki, kristianismo ta selebrá e viktoria di Hesukristu riba piká i morto, e kumplimentu definitivo di e promesanan di salbashon di Dios i konfirmashon di e testimonio i di tur palabranan di Hesus di parti di Dios Tata.

E lekturanan ku nan ta lesa riba e anochi aki ta nuebe: shete lektura di Tèstamènt Bieu, un lektura di apòstel san Pablo i e Evangelio. Nos no ta pretendé di hasi un análisis di kada lektura pasobra esaki ta reflekshon i no un buki, lo úniko ku nos lo tabata ke menshoná ta ku e shete lekturanan aki ta un historia di amor, di promesa i speransa ku tin nan plenitut i kumplimentu den bida, morto i resurekshon di Kristu, fiesta ku nos ta selebrá awe.

E Evangelio ta konta nos di e promé anunsio di Hesukristu resusitá. Ta di nota ku e kuater evangelistanan tin un promé kuenta di e anunsio di resurekshon masha similar: den tur ta e muhénan ta esnan ku ta komprendé di ku Kristu no ta den graf i nan ta bai anunsiá esaki na e otronan; den e kuaternan aki ta un hóben òf angel kende ta esun ku ta anunsiá su resurekshon, i den tur nan ta anunsiá un futuro enkuentro na Galilea. Kiko esaki ta siña nos?

Ta opvio ku e muhénan no tabata spera pa topa ku e notisia aki, pues nan tabata bai hiba bálsamo pa drecha e kurpa; esaki ta laga nos mira ku resurekshon no tabata ser sperá dor di disipelnan di Kristu. Apesar di ku E a anunsiá esaki, e resurekshon a sorprendé tur hende. Di dos, Hesus no ke anunsiá su mes komo esun resusitá saliendo for di e graf bashí, pues e angelnan no ta pidi pa tur hende bai mira e graf bashí pa nan kere, sino nan ta manda tur hende pa Galilea pasobra Hesus lo bai “topa” ku nan einan. Ki punto importante esaki ta! Hesus no ta funda su resurekshon riba un graf bashí, sino den e enkuentro real i personal di su disipelnan kuné den su kondishon di esun resusitá.

Pakiko esaki ta asina importante? Bon, ta ku si e disipelnan a kere den Hesus resusitá no pa e graf bashí sino pa nan enkuentro personal ku Kristu bibu, e ora ei nos tin e kapasidat di biba e mesun eksperensia ku nan. Nos ta yamá no únikamente pa kere ku Kristu ya no ta den su graf, sino ku nos ta yamá pa biba un enkuentro ku Kristu bibu i resusitá. Esaki mester ta nos eksperensia komo kristian, una eksperensia di fe ku ta duna nos e sertesa ku Kristu no ta morto, sino ku E ta bibu i ta biba mei mei di nos.

Nos ta biba blo ta keha ku e mundu ku ta rondoná nos ta kada dia pió, nos ta rondoná di un kultura di morto, di un sosiedat egosentrista den hopi di su aktitutnan, materialista den su eskala di balornan i poko profundo den su idealnan. Aki ta pas un anunsio di Kristu resusitá? Klaro ku sí! Ta nos ta e kristiannan ku mester duna testimonio di e speransa di esun resusitá, di su anunsio kla i determinante: “ni morto, ni piká, ni sufrimentu, ni inhustisia tin e último palabra”; ta Kristu kende a vense nan i si nos ta dispuesto na sigui su kaminda, nos lo vense huntu kunÉ.

Kristu a resusitá! Esaki mester ta e anunsio ku ta mester resoná den lo profundo di nos kurasonnan tur e simannan aki. Kristu a resusitá, i nos ta testigu di esaki; pero, kon nos por ta testigu di esaki? Hasiendo ku esun ku ta sinti su mes “morto” (esun ku tin hamber, esun ku ta sinti su mes so, esun ku no tin di bisti, esnan prezu, esnan ku no ta sinti nan akseptá dor di ningun hende, e relashon ku mester di bo pordon, etc) ta haña bida den bo. Nos tin ku kambia di aktitut pa ku otronan, nos no por biba tristu, renkoroso i indiferente. Pasku di Resurekshon ta un tempu di alegria, di goso profundo, di karidat ekspresá, di solidaridat gososo; e sinkuenta dianan ku nos ta selebrá Pasku di Resurekshon, laga nos kambia di aktitut; laga nos bira pa mira esun den nesesidat, laga nos biba ku goso i pas, pues Señor a resusitá i piká a keda derotá. Laga nos ta testigu di e Lus ku Kristu Resusitá a brinda nos un dia manera awe!

Trata pa otronan sinti ku Kristu ta biba den bo; ku por ripará esaki den bo ánimo, den bo pas, den bo karidat konkreto ku esnan ku mas tin mester di esaki. Laga bo preokupashonnan un banda i okupá bo mes ku esnan ku mas tin mester di abo awe.