DI BINTISINKU DJADUMINGU SIKLO B

Promé Lektura : Sabiduria 2, 12. 17-20
Salmo : Salmo 54, 1-4. 6
Di dos Lektura : Hakobo 3, 16-4,3
Evangelio : Marko 9, 30-37


E Evangelio di awe ta pone nos dilanti di reflekshon riba dos tema masha importante den bida kristian: humildat i sirbishi.
Hesus ta aparesé kombersando ku su disipelnan ku no ta kaba di komprondé loke E ta bisando nan tokante Yu di hende. Nan no ta komprondé i tin miedu di hasi pregunta. Nan tabata pensa riba e reino di kua Hesus tabata papia ku nan den término simplemente humano. Señor ta tuma inisiativa i ta kontestá nan tokante nan preokupashonnan.
E promé kontesta ku Kristu ta duna ta referí na humildat.
Segun siglonan ta pasa por ta e loke ta nifiká ser humilde a kambia di su realidat original.
Asina nan tabata yama esun ku kompleho humilde, esun sin karakter, esun ku no a kaba di klara su mes interiormente, i tabata hasi referensia poniendo esaki kontra di esun ku tabatin su mes forma di ser i di pensa. Santa Teresa di Hesus tabata bisa ku "humildat ta e bèrdat", òf sea, ser humilde ta rekonosé nos mes dilanti Dios, dilanti nos mes i dilanti di otronan, tal manera nos ta, ku nos tragedia i miserianan, ku nos karisma i kualidatnan. Ken por duda ku San Pedro i San Pablo, personalidatnan mas ku fuerte, tabata personanan humilde? Sigur nan tabata pasobra nan a pone nan mes dilanti Dios tal i manera nan tabata i Dios a duna nan kontesta pa nan bida, transformando nan for di paden.
E disipelnan ei tabata programando nan futuro ambishonando puestonan haltu den e reino ei ku Hesus lo a trese, pero awor e Maestro ta plantea na nan otro tipo di ambishon. Na lugá di ambishon di ku lo hasi tur kos pa nan E ta eksponé na nan e ambishon pa hasi kos pa otro. Loke e disipelnan tabata deseá, na lugá di ser un medio pa gana preferensia den su reino, únikamente tabata sirbi pa e reino aki lo no yega.
E mundu ku ta toka nos na biba riba dje no ta lugá kaminda ta defendé humildat; lo bisa todo lo kontrario, djei un di e konfliktonan permanente ku e tipo aki di sosiedat kaminda esnan mas debil i esnan mas humilde ta esnan marginá. Nos komo kristian den e mundu di awe mester ta e mihó defensornan di esnan mas debil i indefenso, sin kere ku nos ta salbadó di ningun hende sino purbando ku di bèrdat tur hende ta konosé e úniko Salbador.
Kreyentenan den Hesus ta yamá pa ser humilde pa por sirbi. Ora komo kristian ta papia di "opshon preferensial pa esnan pober" nos no ta propagando literatura barata, sino nos ta konstatando presensia di Señor den esnan mas débil i sin poseshon.
E di dos yamada ku Hesus ta hasi na nos ta sirbishi na otro. Sirbishi desinteresá na otro,spesial pa esnan mas débil i pober di nos mundu. Nos tin ku siña laga nos egoismo i ambishonnan chikitu lòs pa komprendé e misterio di Kristu. E disipelnan tabata ke prestigio, rekonosementu humano i hasi karera, no sirbishi na otro.
Algun hende lo por bisa ku sierto rason ku "hende no meresé nada..." "... total... pa loke nan lo bai gradisíbo..." I por ta ku e afirmashonnan aki ta enserá algu di bèrdat, pero e kristian sa kiko e ta hasi i pakiko e ta hasié, i den e akshon aki e ta deskubrí boluntat i e amor di Dios den su bida.
E reino di Dios ta un reino di sirbidónan na otro. Kuantu bia den nos komunidatnan nos ta mira rumannan ku ta buskando rekonosementu humano pa nan tarea! Nan ta keda frustrá ora nan tuma nota ku dediká bida na otro no ta pa rekonosementu humano sino e profundidat dibino ku ta loke lo tin komo rekompensa.
Iglesia no mester parse strukturanan sivil, si e hasié anto e lo alehá e modelo di Kristu di su ser komunidat konvoká i yamamentu huntu di Hesus. Bèrdat ta ku den Iglesia lo mester tin un outoridat i un organisashon, pero e komportashon lo mester ta masha diferente na e outoridat mundano. Den e mundu di fe outoridat ta sirbishi.
Sirbi pa ser esun mas grandi, esaki ta un di e mensahenan mas importante ku Hesus a laga pa nos. Su ehèmpel a bai mas ayá, E no a hasi únikamente bon obra sino ku El a entregá su mes den e akshon mas grandi di sirbishi na otro i den su entrega nos ta alkansá salbashon.
Humildat i sirbishi, dos aspekto di amor na kua Dios ta kombidá nos. Komprondé den forma bibu e dos proposishonnan aki ta nifiká ku nos mester tin otro mirada pa mundu i pa nos. Mundu no por kambia e kristian. Únikamente Kristu ta esun ku por transformá nos .Kiko lo bo gana ku esaki ? No hopi kos material, ni prestigio, ni poder ni plaka, únikamente na final, den e último aeropuerto di bo bida, dos ruman mayó lo ta sperando bo... i Dios... lo demas lo no tin kasi ningun importansia...