DI DOS DJADUMINGU ATVÈNT SIKLO A

Promé Lektura : Isaías 11, 1-10
Salmo : Salmo 72, 1-2. 7-8 12-13. 17
Di dos Lektura : Romanonan 15, 4-9
Evangelio : Mateo 3, 1-12

Ta parse ku Mateo ta presentá na nos tres pintura trosé den otro. Ke men tres figura di UN ku tres imágen ku ta papia ku nos di mesun tema: preparashon pa yegada di e salbador. E personahe prinsipal, no ta aparesé, únikamente e ta ser menshoná indirektamente komo “esun ku ta bini patras”; pero kiko lo ta di Huan Boutista sin Hesus?
E promé pregunta ku ta bin dilanti ta: di kon papia di Huan Boutista? Di ki importansha e tabata ku e kuater evangelistanan ta menshon’é (algu ku únikamente ta sosodé na ora di pashon i di resurekshon)? Ta parse ku tabata un figura ku a marka Hesus fuertemente (pues Hesus mes lo papia di dje komo un hende ku ta mas ku un profeta Mt 11,9), ke men su predikashi, su bida, su anunsio di kombershon, e aserkamentu menasante di e entrada di Dios den historia ku E tabata prediká, tabata resoná hopi den Hesus. Echo ta ku Hesus lo a kuminsá su predikashi ku e mesun palabranan: “reino di Dios ta yegando, kombèrtí boso mes!” (Mc 1,15). E ora ei nos lo por a bisa ku Huan Boutista “a prepará” òf “a duna impulso” na e mesun Hesus pa lansa su mes pa prediká e Reino de Dios ku e tabata yamá pa establesé. Pa medio di tur esaki nos por vislumbrá importansha di Huan Boutista.
Awor, kua ta su mensahe? Básikamente, nos lo por ekspres’é asin'aki: kombertí boso mes, kambia di bida, revisá boso eskala di balornan, analisá boso testimonio, prepará boso kurason i boso bida pa risibí esun ku tantu nos a spera! I dilanti e anunsio aki, ta parse ku e lektura ta presentá na nos tres kontesta:
E promé kontesta ta di esnan ku aseptando e anunsio aki, a rekonosé di ta den nesesidat di un kambio i a bai “batisá”, ke men purifiká nan mes di nan faltanan. Ta kon NOS mester hasi esaki ? For di mucha a siña nos den katisashi e dies mandamentunan (ku por ta ni sikiera nos ta kòrda) i si e a bai bon pa nos, algun biaha nos ta risibí charla riba balor. Pero, mi ta kere ku awe lo ta lugá pa puntra nos mes, ¿for di ki skala di balor mi ta buska forma di yega na kombershon ? Ke men, si mi basa mi mes den loke sosiedat ta pidi di mi, mi por bisa: “mi no ta mata, mi’n ta hòrta, mi no ta kometé adulterio, mi no ta gaña ‘hopi’ ets. Pero, lo ta esaki ta e skala di balornan ku e Evangelio ta presentá na mi?
E di dos kontesta ta esun di e fariseo- i saduseonan: “Nos tin Abraham komo Tata ”. Esaki tradusí den nos tempu lo zona un poko manera asin'aki: “ mi ta batisá, mi ta bai misa tur djadumingu, mi ta duna limosna i mi ta konfesá den bes en kuando”. Ta riba esaki nos ta basa nos saminashon di konsenshi? Nos mester tene kuidou pa no buska den rito i aktonan di piedat algu pa trankilisá nos konsenshi ” òf un “aspirin”, pues nos lo tabata dunando sentido kontrali na e aktonan aki. Ku soberbia i seguridat “falsu” lo úniko ku nos ta hasi ta sera nos kurason pa eksperensha semper bai nobo di Dios, i ku ta liberá.. Nos mester riska liberá nos mes .... laga lòs pa por ta kolaborador, konstruktornan bèrdadero di Reino di Dios. E no mester di hende ku, buskando pa salba nan mes, ta kumpli ku lo mínimo. E Reino mester di hende ku sa ku nan ta stimá pa Dios i di nan mes ta sali i ta aportá ku tur kreatividat, tur nobedat, ku tur bida ku nan relashon kuné ta duna.. Reino ta di esnan ku ta disididu pa topa ku un Dios semper nobo, i no di esnan ku hañando un “fórmula” pa trankilisá nan konsenshi ta disidí pa keda stanká einan. Enfin esaki ta un kaminda ku mi ta kere ku hopi di nos falta pa ke akseptá, nos ta preferá siguridat di haf riba e aventura di laman ganchu.
E di tres kontesta, esun di Huan Boutista mes: “mi no ta digno pa kita su sandalianan”. Den e tempu ei tabata katibunan ku mester a kita sandalia i laba pia di nan shonnan; Huan ta pone su mes na posishon mas abou. Ken por pone su mes na mesun altura ku Hesukristu? Esaki no ta nifiká ku nos mester baha nos balor, pues Dios ke eksaktamente lo kontrali, ku nos ta balorá nos mes. Pero ta presisamente ora ku nos rekonosé loke nos tin i loke nos TA nos lo por aseptá e otro i respet’e, ku nos por stima i respetá, ku nos por habri nos mes pa Dios i pa su gratitut. Asina ta ku, Huan Boutista ta siña nos e di tres forma aki pa prepará nos mes: rekonosiendo e tesoro ku nos ta tin ku humildat i gratitut.

Den di dos siman di atvènt, nos lo por pensa den un di dos birtut pa desaroyá, distinto di esun di e promé siman. Talbes lo ta bon pa hasi un saminashon di konsenshi mas profundo, mas trankil, saliendo for di e lektura di e kapítulonan 5 pa 7 di Mateo. Kon nos lo ta preparando pa risibí nos salbador? Nos lo rekonos’é pa medio di skala di balornan ku nos ta bibando ?… E lo rekonosé nos komo su disipel? Atvènt ta espera gososo, pero pa e goso TA profundo, mester nase di nobo i SA ku nos ta stimá pa DIOS i ta fiel na su boluntat.