DI SINKU DJADUMINGU DI KUARESMA SIKLO A

Promé Lektura : Ezekiel 37, 12-14
Salmo : 130, 1-6
Di dos Lektura : Romanonan 8, 8-11
Evangelio : Huan 11, 1-45


Ki forma pa terminá nos preparashon pa Pasku di Resurekshon! Tur reflekshon ku nos tabatin riba Hesus : su viktoria riba tentashonnan, su kalidat di Yu di Dios den e transfigurashon, su proklamashon komo lus i awa ku ta duna bida; tur esaki lo no tabatin sentido, si Hesus lo no a vense morto. Si nos reflekshoná un momento nos por duna nos mes kuenta ku tur teoria òf práktika religioso ku ta buska pa libra hende, tur disiplina síkiko, físiko òf spiritual, tur intento di hende pa liberá hende di loke tin’é mará ta enfrentá e realidat insuperabel di morto. Ta p'esei ta asina importante e proklamashon ku Hesus ta hasi e djadumingu aki dilanti di su siguidó- i perseguidónan: “ami ta resurekshon i bida”. Den realidat Hesus no ta pidiendo pa nos kere den resurekshon komo un idea mas di hende por superá morto, mihó bisá, Hesus ta pidiendo pa nos kere ku E mes ta resurekshon i bida.

Tabata kerensha hudiu ku alma di morto tabata keda tres dia ta rondiá rondó di e kurpa, pero ku riba di kuater e tabata alehá su mes definitivamente. Awèl bon, maske tabatin bia ku el a resusitá personanan ku tabata parse ku ya nan a muri, awor E no tabata ke laga duda di ku Lázaro a muri, i ta p'esei e ta tarda un par di dia pa bai ku Marta i Maria. Hesus a proklamá dilanti Marta su bèrdat mas grandi, “E ... tabata bida mes”
Awor, ku su Palabranan e tabata pone su mes dispuesto pa prob’e, lagando Lazaro resusitá. Nos no por kere ku Hesus a resusitá Lázaro pasobra e tabata sinti hopi falta di dje, ni pasobra El a konmové dilanti di sufrimentu di otronan; pasobra Lázaro di tur manera a muri añanan mas dilanti. Definitivamente nos tin ku komprondé ku e milager aki ta un proklamashon ku ta papia pa su mes ... di ku Hesus a vense morto pasobra E TA BIDA mes.. Di e manera aki, morto no tin e delaster palabra pa esnan ku a kere den Hesus; mashá na lugá San Pablo ta bisa esaki den e di dos lektura: “si Kristu ta biba den boso, maske boso kurpa ta sigui di ta eksponé na morto a kousa di piká, su spiritu ta bibu a kousa di e akshon di salbashon di Dios”.

Resurekshon ta un echo ku nos ta eksperimentá den un tempu asina leu ku lo a parse di no por afektá nos den e bida di tur dia kaminda nos tin tantu otro kos ku ta preokupá nos. Sin embargo, fe den Kristu resusitá, no ta un hecho di futuro, ta un realidat di presente ku lo mester a afektá nos bida diario. Laga nos purba pensa riba nos famia: kuantu bia nos lo no a bisa Hesus: “si Bo a iluminá- mi, lo mi no a hasi tal òf kual kos”? Kuantu di nos no ta pensa ku nos relashon ku nos ruman òf ku nos tata ta morto? Ku ya tin “mas ku kuater dia” na nivel grado ku ta parse mihó bolbe nase ku restablesé e relashon. Den e famia ei, awe Hesus ta hasi su mes presente i ta puntra nan: “Boso ta kere ku Ami ta resurekshon i bida?”. Boso ta kere ku Hesus realmente ta duna nos e bida nobo ei ku ta vense morto i piká?
Únikamente ta falta pa nos aserka Hesus ku e FE di Marta, “mi ta kere Señor”.
Asina, nos fe den Hesus ta hiba nos pa biba intensamente for di e bida ku E a duna nos. For di e FE ku ta move seru, ku ta resusitá morto i ta transformá odio den pordon.
Laga nos skucha Hesus ku ta papia ku nos i ta bisa nos: “Lázaro, Pedro, Huan, Maria, Marta... Sali ei’fo ...”. sali di e piká ei ku bo no tabata por vense, di e situashon di adulterio, di bo konstante krítika, di bo sieges dilanti nesesidat di bo próhimo, di bo egoismo, di bo haraganería, di bo indiferensia òf di bo odio. Laga nos sali pa bida, pa
nos topa ku esun resusitá, ku esun ku berdaderamente ta duna nos sentido den nos bida sin engaño... sin mitar bèrdat.
Falta un siman pa nos drenta Siman Santu, kua relashon, kua situashon, kua piká mi ke presentá dilanti Señor p'asina ku E transform’é manera El a transformá bida di Lázaro? Laga nos hasi un propósito pa rekonosé e situashon pa den siman ku ta bin nos lo por present’é humildemente dilanti di Señor.