SANTÍSIMA TRINIDAT

Promé Lektura : Eksodo 34, 5-6. 8-9
Salmo : Daniel 3, 52-56
Di dos Lektura : 1Korinto 13, 11-14
Evangelio : Huan 3, 16-18

E Evangelio di awe ta kòrtiku pero masha profundo. Ta síntesis di e relashon di Dios ku sernan humano. E ta relatá e amor ku Dios tin pa hende i loke E ta hasi pa nos.
Awe nos ta selebrá solemnidat di Santísima Trinidad. Kiko ta e loke nos komo kristian ta ekspresá riba e fiesta aki ?
Nos ta kere den un solo Dios. Dios ta UN so, pero alabes e ta Tata, Yu i Spiritu Santu. Esaki no ta kompliká
un poko mas e realidat pa algun hende ku ya tin difikultat pa aseptá
eksistensia di Dios? Trinidad no ta motibu di mas konfushon na lugá di klaridat pa algun persona ku no ta komprondé nos fe? Dikon nos ku ta kristian ta papia di Trinidad?
Hopi ta preguntanan ku ta surgi den e realidat spiritual aki., pero ta hustamente e preguntanan aki ta laga nos mira ku e ser humano NO por a inventá Dios i formulá afirmashon asina kompliká. Kristianismo ta un fe difísil pa komprendé i biba? Sí ... i nò. Ora nos aserká ku meramente un kuriosidat intelektual, nunka nos no ta kaba di komprondé ku fe ta bai muchu mas ayá di e echonan teoriko aki ku ta bin dilanti. Si nos penetra den fe i si nos duné bida, ta e ora ei numa tur kos ta haña sentido den nos mente i kurason.


Nos komo kristian ta bisa ku nos Dios ta un Dios úniko den tres persona diferente i esaki ku nos ta formulá ku sierto simplesa lo yega na kompliká en grande ora ku nos purba na splik’é. Esun ku ta kere ta kompronde profundidat di e palabranan aki pasobra e ta biba nan. Esun ku ta purba komprondé sin fe, sin speransa i sin amor, nunka lo drenta den realidat di e afirmashon trinitaria aki.
Kon splika ku Dios ta UN i alabes Tata, Yu i Spiritu Santu? Por ta ku nos tin ku bisa ku den kada amor semper tin tres realidat òf suheto: un ku ta stima, un ku ta ser stimá i e amor ku ta uni nan. Den liñanan general esaki ta demostrá e realidat amoroso di Dios den su relashon ku hende.
E teksto ku Iglesia awe ta pone nos
dilanti ta manera un síntesis di e realidat di Dios i sernan humano. Hesus a bini pa salba nos pordonándo nos pikánan pa medio di e amor ku Dios tin pa nos. Ta bisa nos tambe ku Dios a entregá su úniko Yu pa nos salbashon.
Nos mundu asina outosufisiente por ta ku no ta atende ku e palabranan aki. Ta probabel ku algun hende ta kere ku no mester di salbashon, ku e mes ta e úniko protagonista di su historia i di su speransa. Pero bon nos sa ku esaki no ta asina. E ser humano mester di yudansa di Dios
pa ta realmente humano. E mester di su palabra, di su bida pa ta plenamente felis. Maske e mundu di awendia ta blèndu mi ku forsa strabagante di su proposishonnan, ta únikamente lus di Dios ta duna mi splikashon di falta di mi realidat humano. E proposishon ku Dios ta ofresé nos ta esun ku ta basá den amor.
Hopi kristian a instalá nan mes den un kondena permanente tantu pa nan mes komo pa otronan. Nan ta "profetanan di kalamidat". Nan anunsio di Evangelio no ta invitashon pa deskubrí e amor ku Dios tin pa nos, sino invitashon pa nos stima Dios. Komo hende nos ta stima esun ku stima nos. Si nan no anunsiá mi e amor ku Dios tin p'ami, ta masha difísil ku di un manera spontáneo mi por stima Dios. Tur predikashon i tur akto di evangelisashon semper tin ku kuminsá ku un pregunta: "Bo sa ken ta stima bo di bèrdat?" Tur pedagogia di kombershon simplemente lo ta profundisá den e realidat ku Dios ta stimabu.ta stima bo i bo kontesta personal pa tal amor ....Amor ta paga ku amor...!!!...
Hesus ta habri porta di e amor di Dios pa hinter humanidat. E no ta kondena ningun hende sino ku e ta hasi intento pa kura personanan heridá pa piká i pa bida... Kada be ta haña mas e impreshon ku bida ta manera un barku grandi riba kua hinter humanidat ta nabegá, i ku apsolutamente tur ser humano mester ta tapando e skrefnan kaminda sufrimentu i falta di speransa ta pasa drenta.
Nos tur ta nabegá den mesun laman di eternidat. Huntu nos ta den e mesun boto. di bida. Ser kristian ta tin siguridat di ku Dios tambe ta nabegá ku nos, E no a laga nos so ni desampará.
Dios stima mundu...... Nos stima mundu? Mundu ta e bon kreashon di Dios ku sernan humano i nos a keda enkargá di bai ta ahusté na nos antoho. Kon ta e presentashon ku nos ta hasi di Dios na otronan i na nos mes? Ta trata di un Dios ku ta stimaBO apesar di bo piká- i miserianan personal òf ta un hende ku ta kondena bo sin piedat...? Nos ta anunsiadonan di e Dios ku ta stima òf nos a krea un Dios chikí ku ta kastigá otronan? Kiko ta inspirá bo anunsio di Kristu: amor òf miedu...?