PROMÉ DJADUMINGU ATVÈNT SIKLO B

Promé Lektura : Isaías 63, 16b-17. 19b; 64, 3b-8a
Salmo : Salmo 80, 2a-3b. 15-16. 18-19
Di dos Lektura : 1Korinto 1, 3-9
Evangelio : Marko 13, 33-37

Nos ta kuminsá e djadumingu aki di Atvènt ku ta nifiká “esun ku ta bini, òf esun ku mester bini”, i ku esaki Liturgia ke yuda nos pa prepará nos mes pa risibí esun ku “tin ku bini”, kier men Kristu Glorifiká. Ta p'esei durante e tempu aki nos ta reflekshoná promé riba e promesa di e di dos binida di Kristu, i den un di dos momentu nos ta meditá riba Enkarnashon di Dios ku a sosodé dos mil aña pasá. Pues laga nos mira kon e lekturanan di e djadumingu aki ta prepará nos.

Den e promé lektura nos ta skucha profeta Isaías sklama na Dios, pidiendo pa e bini bèk ; e profeta ta bisa: “Bolbe, pa amor di bo sirbidónan” i mas despues “Señor, Abo ta nos Tata; nos ta e klei i Abo ta modelá nos”. Ku e palabranan aki nos ta mira kon Isaías ta rekonosé Dios komo orígen di e hende i fuente di tur sentido, i ta sklama pa su regreso pasobra sin su presensia e Pueblo a pèrdè tur speransa pa alkansá felisidat.

Ku e idea aki laga nos analisá e Evangelio di e djadumingu aki. Den e Evangelio aki nos ta rekonosé dos personahe: e doño di kas i e pòrtir. E doño, ku ta representá Dios, a sali i lo regresá algun dia, ora ku ménos e pòrtir ta sper’é (nifikashon di anochi) i e tarea di e pòrtir ta pa kuida e kas p'asina su hefe lo hañ’é ta realisá e tarea ku el a enkarg’é kuné. Nos ta kere ku aki ta haña dos tema masha interesante pa meditá ariba. Di un banda e realidat ku nos tur ta poseé den nos interior, un deseo, un anhelo di Dios (nos Tata) ku ta laga nos sklama di hopi manera “bini Señor”; i di otro banda, e promesa di Dios ku sigur lo bini, pues e ta fiel na su Palabra i algun dia lo e bini bèk pa realisá e union definitivo aki entre Dios i hende. Ta p'esei Hesus ta pidi nos: “sea alerta”, pasobra boso no sa “kon” ni “ki ora” Señor lo bini pa yena boso ku su bida i amor.

Ta parse nos masha interesante meditá e siman aki riba e deseo aki di transendensia i di felisidat ku nos tur ta poseé i ku hopi biaha nos ta trata di sasia di forma masha alehá di esun di Dios. Kuantu biaha nos ta kana yen di trabou, yen di aktividatnan di dibertishon i estudio pero bashí i ku falta di pas interior! Ta di unda e bashí ei ta bini ku tur e aktividatnan ei no por yena? Dikon ta interesá nos mas pa yena nos ku rekonosementu di hende na lugá di yena nos di Esun ku por sasia nos set di amor? Nos ta mira tambe hopi persona buskando den naturalesa, den yoga, den suerte, i den hopi otro realidat e satisfakshon di transishon di e deseo interior aki , pero nos ta kere ku nan ta keda kòrtiku si nan limitá nan mes na esakinan. Tin den nos tur un anhelo ku ta sklama na nos kreadó, “Bolbe serka nos”; laga nos meditá bon riba esaki., pasobra di esaki atvènt ta trata, esta pa reflekshoná riba nos vokashon pa biba den union perfekto ku Dios. Únikamente den deskanso pleno nos bida, únikamente den dje nos lo haña sosiegu, únikamente den dje nos lo haña plenitut di pas, di amor i di goso.

Laga nos kòrda ku nos ta únikamente pòrtir di e kas, ku e doño lo bini bèk un dia p'asina nos dun'é kuenta di nos trabou. Kisas nos a hiba un bida desordená i ta p'esei nos ta deseá ku ta mihó e doño di kas no bini? Nos mester ta prepará, pasobra na kualkier momentu e lo bin.

Laga nos meditá e siman aki kon nos ta bibando e deseo aki di topa ku Señor; laga nos rebibá nos kompromiso ku “e doño di kas”; e ta biniendo, kiko nos a hasi ku loke el a konfia na nos kuné? Mas ainda, nos ta prepará pa risibié?
Laga nos kuminsá nos atvènt renobando nos deseo di risibí nos Señor, esaki ta e mensahe di Señor pa e promé siman.