DI SINKU DJADUMINGU DI PASKU DI RESUREKSHON

Promé Lektura : Echonan 9, 26-31
Salmo : Salmo 22, 26b-27. 28 i 29. 31-32
Di dos Lektura : 1Huan 3, 18-24
Evangelio : Huan 15, 1-8


Hesus a bisa ku lo por rekonosé su disipelnan pa medio di nan fruta i awe E ta rekordá nos ku e úniko forma efikas i berdadero pa duna fruta ta di keda den djE.
Keda den Kristu ta nifiká mantené bo mes den kontakto konstante kuné pa medio di su múltiple formanan di presensia: Palabra, bida, eukaristia, amor...
Tin persona ku ta atmirá un Hesus total i eksklusivamente humano: e Hesus revolushonario, radikal, entregá,... pero tur e aspektonan aki no ta mancha ni muchu ménos trese kambio na e kara outéntiko di Dios. Ora nos profundisá den intimidat ku e Maestro nos ta deskubrí ku nos bida no ta keda únikamente den atmirashon steril sino ku e ta kombertí den un impulso di bida. Skucha batimentu di kurason di Dios pa hiba e kalor i e amor ei pa mundu, eseinan ta fruta di esnan ku ta keda den Hesus.
"Duna fruta" ta biba bida di un disipel outéntiko.
Fruta di e kristian no mester ta den "hasi kos" òf ta " trahadó hopi aktivo di Evangelio". Hopi bia nos ta yena nos mes ku okupashon pastoral pensando ku den nos agènda super okupá nos ta dunando fruta kristian. Por ta ku un agente pastoral ta pasa hinter dia masha okupá, òf ku e ta traha trabou sosial fruktífero , pero ta di e frutanan aki Hesus ta papia ku nos?
Duna fruta segun Hesus no ta hasi trabou pastoral papiando so.Sin duda un persona ku ta tuma Evangelio na serio sigur lo entregá su mes de forma pashoná pa plama e palabra. Fruta di Hesus ta hiba e persona na su enkuentro. Pastoralmente ta un referensia impresindibel di sa ku duna fruta den Señor ta aserka nos mes i keda den Dios p'asina otronan por topa i aserká Dios.
Nos ta keda satisfecho ku hasimentu di kos ku e mihó intenshon, pero Bo a puntra bo mes algun bia kuantu persona a aserká Dios danki na bo union i bo trabou den Señor?
Tin agentenan pastoral ku ta bira tristu pasobra nan no "ta mira resultado" di nan trabou, ta komo sifuera e frutanan no ta sali na kla. Nos ta pensa ku un mentalidat basta materialista i ta kere ku kaminda nos no ta mira no ta eksistí fruta. Esnan ku ta pensa asina lo spar nan mes hopi tristesa si nan duna nan mes kuenta ku loke Dios ta bin ta hasi parti paden di un persona bo no ta mira, pero e ta kria rais den skuridat i den profundidat di kada kurason. Pensa ku fruta ta solamente loke ta mira parti pafó ta empobresé akshon di Spiritu Santu aktuando den kada un di e akshonnan ku nos hasi den nòmber di Señor.
Kada persona ku ta keda den Hesus tambe por hasi loke Señor a hasi. Relashon di e kristian ku Dios ta di un amistat profundo i
sinsero ku ta pa kompartí ku otro.
E frutanan no ta solamente pa esnan ku ta rondó di nos. Tambe nos serkania ku Señor ta produsí den nos kosecha abundante di e amor ku Dios tin pa nos. Si nos sembra bon den nos kurason nos lo tin tambe fruta den dje pa repartí ku otro.