DI DOS DJADUMINGU SIKLO A

Promé Lektura : Isaías 49, 3. 5-6
Salmo : Salmo 40, 1. 3a. 6-9
Di dos Lektura : 1Korintio 1, 1-3
Evangelio : Huan 1, 29-34


Di boka di Huan Boutista e teksto di San Huan ke ekspresá e fe ku e promé kristiannan tabatin den Hesus. Pa nan Hesus tabata: e Lamchi di Dios; e Salbador ku ta kita piká no únikamente di Israel sino di mundu; e Kristu òf esun ungí pa Spiritu Santu; finalmente Hesus tabata e Yu di Dios. E ta e sirbidó na kende Isaías tabata referí den e promé lektura den ken Dios ta manifestá su gloria, den ken E lo a reuní su pueblo i esun ku E lo a hasi lus di nashonnan.
Tur e títulonan aki ku nos ta skucha awe di Hesus no ta “títulonan di realesa ” òf “frasenan poétiko” tokante e persona di Hesus. E títulonan aki ta deskripshon di e persona i bida di Hesus. Nan ta su biografia i su legado pa tur esnan ku tabata ke siguié. E komunidat kristian di e promé desenionan tabata sa ku nan no tabata kere den lider rebelde mas, sino den e mesun Yu di Dios, esun ungí pa e Spiritu ku a hasi salbashon pa tur pueblo riba tera real.

Den ken nos ta kere awe? Kon nos lo deskribí Hesus den nos dianan? Hesus lo pasa pa ser únikamente un “bon konsehero spiritual”? Un ruman inkómodo ku únikamente ta husgando nos pa loke nos a hasi malu? Nos lo por a bisa ku únikamente E ta un ser iluminá ku ta tira lus riba nos manera di kombibí komo ruman? Lo ta ku Kristianismo ta únikamente un “trankilisadó di konsenshi” òf pió ainda e opio ku ta pone pueblo drumi ku su rito- i resamentu manera algun hende lo a pretendé di deskribí?
Awendia ta eksigensia di e kristian pa tin e eksperensia di loke Huan Boutista ta bisa nos: Ami a mir’E i mi ta duna testimonio ku ta E ta e yu di Dios!”
Talbes esun ku aserká Hesus komo istoriadó òf komo un lektor kurioso di Biblia lo por konfundí Hesus ku un hòmber mas entre nos. Pero esnan entre nos ku a aserká Hesus ku fe, sa ku E ela eksistí promé ku nos tur, ku E ta e Lus di nashonnan, e Sirbidó di Dios ku a ser mandá pa salba nos di nos inkapasidat pa alkansá Dios, pa rekonosé den e ruman di stima nos den forma inkondishonal. Nos mester kere den Hesus i mir’É komo Hesus. E ta e Kaminda berdadero, Bèrdat i Bida. Kuantu kaminda nan ta proponiendo na nos awendia?. E tiki esfuerso, e plaser egoista, e pida ko’i kome nesesario, e mitar bèrdat , e kompromiso ku Dios “ora ku ta sinti esaki nesesario”, separashon ku ta papia pa yega n’e, seksualidat den pelíkula i novela komo algu normal, aborto “legal”, ets. Ta esakinan lo ta e kamindanan di Kristu, e kamindanan ku ta papia e bèrdat i ta promové bida? Lo ta esaki ta e forma di duna testimonio di nos fe den Hesus komo nos salbador, komo e Lamchi di Dios enkarná, esun ungí pa e Spiritu i e Yu di Dios?

Nos ta den siman di orashon di unidat di kristiannan ku a kuminsá dia 18 di yanüari. Laga nos uni pa resa pa pas i union entre pueblonan. Laga nos resa na Hesus pa pas i buska pas den nos sirkulo di famia, ta testimonionan ekselente di nos fe i nos speransa den Hesus, e Kristu, e Yu di Dios.