DEDIKASHON DI BASÍLIKA LATERANENSE

Promé Lektura : Ezekiel 47, 1-2. 8-9. 12
Salmo : Salmo 46, 1-2. 4-5. 7-8
Di dos Lektura : 1Korinto 3, 9c11. 16-17
Evangelio : Huan 2, 13-22


Fiesta di katedral di Roma, ‘kabes i mama’ di tur misa rònt mundu.

Awe nos ta selebrá un fiesta poko konosí: Dedikashon di e basílika di Letrán. Kiko e fiesta akí ta nifiká? Dikon nos ta selebr’é? Basílika di Letrán ta e katedral di Roma. Di Roma, nos tur konosé basta bon e basílika di San Pedro di Vatikano, edifiká riba e graf di e promé di e Apòstelnan, i ku e ta manera un símbolo di Iglesia universal, ku su kupel, su plasa, e dos brasanan ku ta sali for di basílika i ta parse ku nan ke brasa hinter mundu, lugá di tantu peregrinashon. El bira asina importante despues ku Roma a kai den man di Rei di Italia na aña 1870 i Papa a keda será, manera prezu na Vatikano.
Na Roma tambe tin un otro misa, no tan konosí pero tambe mashá importante, e mas importante, pasobra e ta e katedral di siudat di Roma i ‘kabes i mama’ di tur misa rònt mundu, e katedral propio di Iglesia di Roma, e símbolo i lugá di enkuentro di kristiannan di e siudat akí ku tabata, for di prinsipio, e lugá di referensia i sentro di unidat di hinter iglesia.

E katedral aki, manera nos a kaba di bisa, ta e basílika di Santísimo Salbador, yamá popularmente, Basílika san Huan de Letrán. I awe, ku ta selebrá aniversario di su konsagrashon -di su "dedikashon" eksklusivo na Dios-, hinter Iglesia universal tambe ta selebr’é, pa rekordá ku tur Iglesia, den tur lugá nos ta uní rondó di e misa mas importante na Roma. Den dje, nos ta haña e “kátedra”, esta e stul kaminda Papa ta kabes visibel di hinter Iglesia i for di dje e ta proklamá e dògmanan, esta e bèrdatnan di fe ku tur katóliko ta profesá. Konsilio Vatikano I a proklamá ku “ora Papa ta papia tokante fe i moral “ex cathedra” (for di su kátedra, esun ku ta na San Huan di Letran) e ta infalibel, e no por faya. Spiritu Santu ta gui’é”. P’esei Basílika di Santísimo Salbador òf Basílika di San Huan ta ‘kabes i mama’ di tur misa katóliko. E fiesta di awe ta reflehá e realidat akí. P’esei nos ta selebr’é ku solemnidat i ta hasi su selebrashon mas importante ku esun di djadumingu.

Durante e Aña litúrgiko, Iglesia diosesano ta selebrá tur aña e konsagrashon di katedral di kada Diósesis, meskos ku di e misanan parokial. Katedral ta e misa di Obispu, kabes visibel di Iglesia lokal. Tambe e misa parokial, pasobra e ta nifiká e asamblea kristian ku ta reuní den un lugá pa selebrá S.S. di Misa, otro Sakramentonan i bida kristian komunitario ta haña e sentro. Si nos no sa ki dia Obispu a konsagrá e misa parokial, nos Diósesis a establesé ku e dia ei ta riba 25 di òktober. Mara nos por kuminsá selebrá e fiesta importante akí den kada parokia!

Awe, ku ta e konsagrashon di katedral di Roma, e lekturanan ta invitá nos pa reflekshoná riba loke nan ta nifiká, i e balor ku nan tin, e edifisionan akí kaminda nos ku ta kristian ta reuní i ku nos ta denominá ‘misa'. I e reflekshon akí tin komo dos aspekto, dos kara: promé, e lekturanan ta invitá nos pa duna kuenta di ku e edifisio ta importante, ounke no ta esun di mas importante, pero e tin referensia ku e “edifisio spiritual, ku ta Iglesia Katóliko; despues, tambe nan ta invitá nos pa mira ku e edifisionan di Iglesia ta –lo mester tabata - un bon signo pa nos tur.

-Loke ta aserká Dios ta Hesu-Kristu i e komunidat bibu.

E promé aspekto nos ta mir’é mashá kla den e evangelio. Hesus, dilanti di e desaster ku tèmpel di Herusalèm tabata presentá, no ta limitá su mes únikamente na ekspulsá e bendedornan. Muchu mas: El a bisa nan ku, si nan ke, ya nan por basha hinter e edifisio ei abou, pasobra loke ta realmente importante, loke ta aserká realmente na Dios, no ta e piedranan magnífiko, sino Hesus mes. E, ku su fidelidat te na morto, ku e bida nobo ku el a brota for di su krus, ta e úniko ku ta uni nos ku Dios definitivamente, e úniko ku ta aserká humanidat na e bida dibino. No ta e piedranan, no ta e sakrifisionan material, no ta e ritonan: ta únikamente Hesus, ta únikamente e bon notisia di Hesus, pero nos ta hende i nos tin mester komo kreyentenan, komo komunidat bibu di edifisionan, di sakrifisionan, di ritonan pa por hasi di e kas di Dios un kas di orashon, di amor, di rèspèt kaminda pueblo ta reuní pa sinti ku nos ta komunidat di fe.

I San Pablo, den e di dos lektura, ta kompletá e reflekshon di e evangelio bisando nos: boso ta tèmpel di Dios.

Hesu-Kristu ta e fundeshi di e edifisio, e úniko fundeshi posibel. Pero, kada un di nos, kada kreyente ku ta siguiÉ, bibando den komunion kunÉ, ta konstruí e edifisio akí ku ta Iglesia. Kada un di nos ta e piedra bibu ku nos ta hasi presente meimei di mundu e forsa salbador di Dios, i nos ta e señal di e amor di Dios ku ta salba hinter humanidat.

Ta p'esei e edifisionan material no ta lo mas importante, ni nos mester mira nan manera nan tin un balor dibino, manera un lugá ku tin forsa spesial. Nò, e balor no ta bini di nan mes, ma pasobra nan ta e lugá kaminda komunidat kristian ta reuní, e lugá kaminda nan ta topa ku otro, konvoká pa medio di Hesu-Kristu. Kreyentenan ta e piedranan bibu ku ta forma e tèmpel di Dios.

- E kasnan di Iglesia ta señal di presensia di e Spiritu di Hesu-Kristu.

Nos por bisa ku esaki ku nos ta drenta den e di dos aspekto ku nos a papia: nos misanan, e edifisionan kaminda e Iglesia ta konvoká pa medio di Hesu-Kristu ta reuní, tin un balor importante komo signo di fe, komo señal di e komunidat ku nos tur huntu ta forma, edifiká riba e piedra prinsipal ku ta Hesu-Kristu.

Den e kas akí kaminda nos ta reuní aworakí pa selebrá Eukaristia, kuantu kos importante a pasa! Hopi di esnan ku ta aki sigur sigur a haña Boutismo den e kas aki, i a kuminsá nan kaminda kristian. Hopi tambe lo a risibí aki Eukaristia pa promé biaha, i for di promé biaha ei a kontinuá partisipando kada djadumingu -o kisas kada dia - na mesa di Señor, den komunidat di e rumannan. Kisas tambe nan a risibí Konfirmashon aki, òf a selebrá nan Matrimonio. I mas di un biaha bo a bini pa bisa e último ayó, i pa resa, pa algun parientek òf amigu defunto. Òf bo a drenta aki pa bo djis drenta den silensio dilanti e tabernakel.

E kas akí, e konstrukshon kaminda nos komunidat kristian ta reuní, ta un señal visibel di tur esaki. I nos tur, ora nos ta pasa den kayanan di nos bario (pueblo òf siudat) pa bai traha, òf pa bai kumpra kos, òf simplemente pa keiru, i nos pasa dilanti di misa, sigur nos lo por rekordá e bunita imágennan di kua Ezekiel tabata papia ku nos den e promé lektura i ku despues a ripití den e salmo: e misa aki, i tur misa, ta hasi visibel e santuario ku ta Hesu-Kristu mes, e santuario ku ta presensia di Dios meimei di hende; fo’i e tèmpel akí ta kore un riu di awa di bida i di salbashon, awa kapas pa saneá awanan salu i morto, kapas di duna bida, kapas di laga krese tur alimento, tur speransa; awa, den poko palabra, ku ta fe i komunidat di kreyentenan i Spiritu di Hesu-Kristu presente den nos.

Mare Santa Eukaristia ku nos ta selebrá awe por yuda nos biba ku mas fervor e fundeshinan di nos fe.
Mare ku semper ora nos drenta den e misa aki, òf den kualkier otro misa, òf ku semper ora nos ta pasa dilanti di e mes, nos por renobá nos fundeshinan, rekonosé e piedra prinsipal ku ta Kristu Hesus, e diesdos pilá ku ta Hesus su Apòstelnan, esta Iglesia i ku e murayanan por ta nos relashon ku tur otro hende pa nan tur haña un dak ku ta protehá nan.