zaterdag 25 juli 2009

DI DIESSHETE DJADUMINGU SIKLO B

Promé Lektura : 2Reinan 4, 42-44
Salmo : Salmo 145, 10-11, 15-18
Di dos Lektura : Efesionan 4, 1-6
Evangelio : Huan 6, 1-15


Kiko fe den HesuKristu ta aportá pa e kreyente?
Bon pregunta den un mundu kaminda semper hende ta buskando opheshon pa distansha personal.
Hendenan di e époka tabata sigui Hesus atmirá pa su milagernan i su fama, no pasobra nan tabata kere den djE, tabata mas bien pa kuriosidat i pa interes propio. Pa hopi hende fe mester tin un komponente útil.. Si fe no ta sirbi mi pa nada práktiko, si e no ta aportá ku algu material p’ami, e no ta fe berdadero... Hopi hende a pèrdè sentido sin interes i kontemplativo di siguimentu di Kristu.
E hendenan aya tabata sigui Hesus pero na sierto distansia. Evangelio no ta konta nos di ku ningun lo a kombertí pasobra Hesus a duna nan di kome; pero Hesus a sigui hasi bon. Por ta ku nos no a duna nos kuenta di ku mayoria persona ku ta topa ku Señor den e Evangelionan no a siguié, nan no a kombertí.
Ki sentido tin anto pa duna alimento na esnan ku ta bini serka djE?
Di mesun manera ku bida mester di sosten material pa medio di alimento, asina bida den Señor ta ser sostené pa enkuentro personal ku Kristu. Duna di kome ta señal di ke pa bo sigui dilanti, bibu i ku forsa. Sòru pa topa kuné i keda den Señor ta señal di amor ku Dios tin pa nos.
E hendenan ayá a haña alimentashon serka Hesus pero nan a keda t’e ei, na alimento material, i ta p’esei nan reakshon no tabata un di proklamá su dibinidat sino su papel di profeta. Nan no tabata sa di aksept’é komo Salbador di nan bida sino nan tabata ke hasié rei. Riba nos kaminda den fe nos ta topa hopi
hende ku ta reakshoná igual dilanti di Hesus. Ora nan sinti ku nan a ser yudá dor di Dios nan ta sinti nan mes den plenitut. Si nan logra loke nan ke, ta pasobra " Dios ta ku mi...", pero únikamente miéntras nan ta sigui logra nan ophetivonan material... Si nan no logra nan ambishon..... "mi ta rabia ku Dios..."
Den e Evangelio aki nos ta kontra ku un reflekshon profundo riba loke bida den siguimentu di Señor mester ta. Nos sa ku nos ta den mihó situashon ku e hendenan di antaño. Nos a eksperensiá resurekshon di Hesus; e ko-partisipantenan di e dia aki ainda no a deskubrí e forsa di presensia di Dios, ta p'esei lektura di e teksto ta hiba nos pa hinka nos mes ku mas profundidat den loke e komementu a nifiká.
Alimento ta algu prioritario pa biba, ta p'esei nos komo katóliko ta duna asina tantu importansia na Eukaristia. E dos pilánan di bida kristian ta Resurekshon di Hesus i Eukaristia. Tur sobra kos mester drei rondó di e dos kontestanan grandi aki. Den ámbos realidat Enkarnashon i Revelashon ta resaltá, entrega di Dios na e ser humano .
E kuminda ei a keda un tantu sin balor pasobra hopi di e ko-partisipantenan no a sa na kapta profundidat di e milager. Nan a keda den lo grandioso dilanti e kuminda, pero nan no tabata sa di profundisá den su nifikashon. Algu paresido ta sosedé awe ku hopi hende ku ta bisa ku nan ta kreyente.
E hendenan no a komprondé ku e kuminda ei tabata kompartí i ku e tabata símbolo di entrega di Hesus komo salbashon di e ser humano. Nan a keda den e pan i piská i no tabata kapasitá pa deskubrí ta ken i dikon el a duna nan esaki.. Ya boso sa ku kosnan di Dios tin ku lesa nan semper entre liñanan di bida...
Nos ta para na un di e frasenan di Evangelio di awe: "Hesus mes tabata sa bon loke e tabata bai hasi." I nos ta keda kontemplá Resurekshon i Eukaristia ku siguransa di ku si nos laga nos mes ser alimentá pa Kristu, semper lo por kompartí ku esnan ku ta rondó di nos, di manera spesial ku esnan mas pober i ku esnan den nesesidat.