DI DIESHETE DJADUMINGU SIKLO A

Promé Lektura : 1Reinan 3, 5. 7-12
Salmo : Salmo 119, 57. 76-78. 127-128
Di dos Lektura : Romanonan 8, 28-20
Evangelio : Mateo 13, 44-52

Tema di e evangelio di awe ta basta serka di nos mundu presente: kumpra i bende, rikesa i fortuna… Pero, sin duda, e ta ofresé nos un mensahe ku ta bai mas ayá di loke ta puramente material.
Promé laga nos mira ki nifikashon símbolonan usá den e evangelio aki tin:
E tesoro skondí bou di tera
Si awe bo tin algu di balor bo ta ward’é den un kaha fuerte na banko òf na kas; den époka di Hesus ora ku un hende tabata poseé algu di gran balor material e tabata skond’é bou di tera. Rabinonan di e époka ei tabata bisa ku no tabatin lugá mas sigur pa warda sèn: tera.
Den Iglesia di Edat Medio tabata simbolisá la Bírgen Maria artístikamente komo un tereno no kultivá, kaminda tabata warda e rikesa di mas grandi (Hesus) i ku, sinembargo, ningun hende a tochi’é ... klaramente refiriendo na su birginidat.
Unda NOS ta skonde balornan ku Dios a duna nos? Den miedu, den bèrgwensa…? Kiko nos ta hasi ku e tesoro di fe? Nos a skond’é di manera ku ningun hende por hòrt’é di nos?
E pèrla
Den tradishon di pueblonan antiguo nasementu di e pèrla lo mester a bini di erupshon di un rayo ku a kai di shelu den un kokolishi habrí. Den mundu antiguo un pèrla tabata e poseshon mas maravioso pa kua nan tabata kapas di hasi loke sea.
Den Tèstamènt Nobo pèrla ta imágen di loke ta dibino, di loke no ta terenal. Hesus ta bisa: no duna kachó loke ta sagrado ni tira pèrla pa porko. (Mt 7,6). Hesus ta referí na e pèrla komo símbolo di e Reino di Dios.
Den Iglesia mediaval ta representá la Bírgen Maria den forma artístiko manera un kokolishi den kua ta warda e tesoro mas precioso: .... Hesus.
Kiko abo ta konsiderá lo mas balioso di bo bida? Di kon? Kua ta e pèrla di bo bida tantu den forma material komo spiritual?
E reda
Den antigwedat reda, laso i trampa ta imáhennan pa indiká loke ta malu. Den Tèstamènt Bieu reda ta un arma di Dios.
For di final di siglo II tabata representá boutismo bou di imágen di un piská ku anzue i reda; e piskadó ta símbolo di esun ku ta batisá; e piská ta esun ku a ser batisá. E reda yen di piska chikitu ta símbolo di Iglesia. Laman ta imáhen di mundu.
Bo ta sintibo manera Iglesia? Kiko Iglesia ta p'abo, den bo bida diario?
Den e tres parabelnan aki nos ta mira diferensia kla relashoná ku esunan di simannan anterior. T’e na e momento ei Kristu a kompará Reino di Dios ku kosnan chikí, pero awor e ta kompar’é ku dos kos di gran balor: e tesoro derá den tera i e pèrla hañá.
Den tur dos ehèmpel nos ta deskubrí algu balioso pero entre nan dos ta eksistí tambe un diferensia kla:
E hòmber den e promé parabel pa kasualidat ta topa ku e tesoro.
E hòmber den e di dos ehèmpel ta buska pèrlanan fini.
Algu paresido ta sosodé ku sernan humano relashoná ku Dios. Na algun okashon nos ta haña dilanti nos propio bida e tesoro imenso di fe aki, kasi sin ningun esfuerso, ku únikamente mira… den hopi momentu di nos bida nos ta mira kon personanan ta buska sentido pa nan eksistensia, nan ta buska e tesoro ei ku ta laga nan sinti nan mes bibu i kompletu.. Bida di tur ser humano ta move entre buska i haña.
E parabelnan aki tabatin durante historia dos interpretashon:
E hòmber di kunuku ta akudi na Kristu ku a duna tur loke E tabatin, inkluso su bida pa salba nos.
E tesoro skondí ta “sirbishi” na Kristu. E tesoro no ta den hòfi será sino riba e tereno habrí di bida.
Hopi bia nos ta puntra nos mi mes si nos komo kristian ta mira fe i e echo ku nos ta pertenese na Iglesia komo e inmenso tesoro, e magnífiko regalu ku nos por tuma komo presensia di Dios.
Despues di e splikashon ku Hesus a hasi di e prinsipal parabelnan di e kapítulo aki, Ela puntra su disipelnan si nan a komprondé e kosnan aki, riba kua nan a kontestá den forma afirmativo. Awe nos tambe por komprondé tantu i tantu kos di Señor profundisando den djE, den su bida, den su orashon, den eksperensia konstante di enkuentro ku esun resusitá.
E ta terminá e evangelio bisando nos ku nos tin ku trese relashon entre e bieu i e nobo, loke Tèstamènt Bieu ku Tèstamènt Nobo a anunsiá na nos. Loke tin den nos for di fe risibí ora tabata chikí i e fe di adulto ku nos ta trata na biba. Den e enkuentro aktualisá ei ta kaminda nos fe i nos bida ta topa ku otro i mutuamente ta agradá otro…