SANTA MARIA, MAMA DI DIOS

Promé Lektura : Numbernan 6, 22-27
Di dos Lektura : Galatanan 4, 4-7
Evangelio : Lukas 2, 16-21

Kerido amigunan: Felis Aña Nobo!
Nos ta laga atras tur loke a forma opstákulo pa nos, ku a produsí insatisfakshon personal òf sosial pa nos i ku e promé kompasnan di Aña 2009, nos ta habri un poko portanan di nos bida pa speransa, pa fe i amor di Dios ku nos ta selebrando den sombra di Bètlehèm.
Santa Maria Mama di Dios, ta poné riba e promé dia di e aña ku a kaba di kuminsá, komo garantia i komo protektor di e 365 dianan aki. Teniendo, asina gran SER na entrada , nos no por enfrentá e promé meternan di e aña aki ku pensamentu pesimista òf kargando erornan di lunanan ku a pasa.
Santa Maria, Mama di Dios, ta kompañá nos riba tal biahe , riba dia ku nos tur, ku kèlki den man, ta brinda pa un mundu nobo, pa un famia mihó, pa amigunan ku no ta defroudá, pa un Iglesia mas santu i bon.
Pero ... ta únikamente deseo ? E sintimentunan aki lo ta fuertemente ankrá na nos deber di kristian òf únikamente sostené pa beheit pasahero di un anochi? Santa Maria, Mama di Dios, ta yuda nos i ta kombidá nos pa kuminsá e Aña Nobo aki ku bon pia. i si ta Aña Nobo, mester kita tambe e 12 páginanan ku nos a bin ta pasa den lunanan anterior:
Ban laga atras e página di tristesa. Kontemplando kara di Hesus, nos ta yamá pa disfrutá di bida. Un goso ku lo ta bon i eterno si nos hasié ku yudansa di nos fe. Dios a bini komo Señor di alegria.
- Ban laga atras e página di odio. Nos tur, na algun momento, a hisa hacha di guera den vários sirkunstansia i pa diferente motibu. E Reina di Pas, la Bírgen Maria, ta kòrdá nos ku komo kristian nos mester ta ponedó di pas i no sembradó di guera.
- Ban laga atras página di renkor. No ta bon pa akumulá mal momentu ni mal eksperensia. Laga nos rekordá kosnan bon i stimulá esakinan. Laga nos lubidá loke ta malu i drenta sin reserva den e Aña Nobo aki.
- Ban laga atras página di duda. Resien Kardinal de Sevilla a afirmá “un mundu sin fe ta para kaba na nada”. Laga nos gara na Dios. Kere únikamente den hende, den progreso i siensia, no ta sigurá nos di nada ni ta fasilitá mashá kos.
- Ban laga atras página di superfisialidat. Laga nos ta mas profundo. Si Dios a laga shelu pa TA ku hende, pa medio di bira hende e mes, kon nos no ta bai den kontra prestashon, pa laga nos paraisonan chikí pa konosé E mas i mihó?
- Ban laga atras página di kobardia. Un kristian ku no ta duna testimonio ta manera un skorsten ku ta dòrna un kas pero ku for di kua, nunka huma ta sali, ta laga mira ku ta eksistí poko kalor i ku kasi no tin kandela paden di e kas. Ta ora pa nos laga lòs e kapa di bèrgwensa apostóliko. Ser kristian ta nifiká komprometé nos mes ku fe, ku Kristu e 12 lunanan benidero.
- Ban laga atras página di nos defektonan. No ta sufisiente TA konsiente di nan; nos no por defendé nos mes bisando :“ ta ser humano nos ta i tur hende ta faya”. Un aña nobo ta oportunidat nobo ku Dios ta duna nos pa skirbi di nobo un istoria di speransa, di amor, ilushon i di alegria ku pèn di nos fe.
- Ban laga atras página di ingratitut. Laga nos ta mas gradesidu. Laga nos rekonosé, esnan ku ta rondó di nos òf ku ta traha huntu ku nos, detayenan chikí ku nan ta brinda nos kada dia.
- Ban laga atras página di violensia. Ku nos palabranan sea mas agradabel; ku nos aktitut por ta mas konstruktivo; ku nos krítika ta mas ophetivo ku ménos interes personal. Ku terorismo pronto lo ta un punto skur, pero den nos memoria.
Nos lo por a laga hopi mas página atras di loke tabata aña bieu , por lo tantu, laga nan sirbi nos pa mehorá den e presente 2009 ku nos ta drenta.
Ku Santa Maria, Mama di Dios, e muhé ku tabatin tur kos, lo yuda nos pa komprondé ku Dios, nos lo por tin TUR KOS den e aña presente ku awor nos ta inougurá. Sin Dios hende ta kore riesgo di hinka su mes den un túnel sin tempu ni salida. Ku Dios, ku e grasia i beyesa di Maria, nos por enfrentá e próksimo lunanan no únikamente ku bon deseo (ku por ta wardamentu sin ningun base) i sí ku e konvikshon di ku Dios ta kompañá nos na midí ku nos ta kapas pa lucha i traha pa pas, fraternidat i felisidat den e mundu ku ta toka nos na biba riba.

¡FELIS AÑA NOBO KU SANTA MARIA!