zondag 11 januari 2009

BOUTISMO DI SEÑOR

Promé Lektura : Isaiah 42:1-4, 6-7
Salmo : Salmo 29:1-4, 3, 9b-10
Di dos Lektura : Echonan 10, 34-38
Evangelio : Mateo 3, 3-17


Ku fiesta di Boutismo di Señor nos ta kulminá fechanan di Fiesta di Pasku di Nasementu. I sin tempu pa reakshoná, ku e delaster sunchinan pa e Niño den pesebre, nos ta haña nos ku un Hesus adulto. Ya e no ta un yuchi mas.
Esun ku wardadornan i reinan a rindi onor n’e ya no ta mucha mas; na horizonte, e strea a disparsé i awor e palabra ku ta bin di shelu: ... “Abo ta mi Yu”, ... a sustituí kanto di angelnan.
Tin un salto ku, leu di produsí intrankilidat paden di nos, ta yama nos na responsabilidat i madures.
-Dios no a nase pa keda drumí den yerba.
-Dios no a nase pa keda mucha eternamente , maske ku den mucha nos ta topa ku sierto aktitut ku ta mustra nos kaminda di shelu
-Dios no a nase pa la laga un strea permanente kologá na shelu.
Anto, pakiko Dios a bini? Pakiko Ela enkarná? Pa trese su amor pa nos, ku ta infinito, i pa kuminsá den Hesus un gran obra ku lo a kulminá ku su pashon, morto i resurekshon.
Sí, rumannan ... Hesus a bini na mundu entre palu (pa amor) i Hesus lo duna su bida riba palu (pa amor).
Awe bida aktivo di Hesus ta kuminsá. Ya e no ta mucha mas i toká pa Dios pa un Boutismo nobo, e ta sali na enkuentro di hende. Pa klarifiká nos ku su Palabra fértil, pa iluminá nos ku e forsa di altura i pa sana nos di mil i un fèrmidat.
Boutismo di Señor, den riu Hordan, ta pa nos motibu di inmenso alegria.
-Nos lo kuminsá pa sigui su pasonan.
- Asombrá nos lo bisa ....” Kiko lo bai para di e mucha ei ”!
-Nos lo mishi ku zòm di su mantel i nos lo yena ku fortalesa
singular.
-Nos lo risibié i nos lo sinti ku Dios ta drenta den nos kurason
Awe, Hesus, resien salí di maternidat di Bètlehèm , ta kuminsá dal su pasonan. Kiko nan lo puntra? Ki pensamentu lo pasa den su kabes? Kiko mundu ta spera di djE? Kiko nos ta spera di djE? Kiko Dios ta spera di djE?
Hesus ta pone su mes na punto “0” den posishon di sali dilanti. Atras a keda e portal rondoná di lus, awa, wardadornan i yerba
muhá. Awor, ademas di hende ku ta ador’é i kantikanan, E mester di mensahero di su Bon Notisia. E mester di koperadó pa su kousa. Su Boutismo, ta esun ku ta bai dilanti di esun di nos. Ku su Boutismo nos tur ta yamá pa pone nos mes den rei di salida pa mustra kara di Dios na e tantunan ku no konos’é òf , inkluso, esnan ku ta rechas’é.
I pa esaki nos ta konta ku abraso di e Spiritu i ku e sertesa di ku Dios nunka ta bandoná su amigunan.
Hesus ta laga katuna di Bètlehèm i ta enfrentá e mishon pa kua Dios a enkarná den hende.
Hesus a laga hanchinan smal i e karpinteria di Nazaret, i ta deskubrí ku boluntat di Dios, no semper ta ser aseptá ni kuidá pa medio di boluntat di hende.
Laga ku e fiesta aki di Boutismo di Señor, nos deskubrí i profundisá den nos tarea pa habri nos pa e palabra, ku kreatividat, ingenio i esfuerso p'asina ku Reino di Dios, leu di keda marginá riba tera, sea presentá komo garantia di felisidat i di e soñonan ku kada ser humano tin.