DI PROMÉ DJADUMINGU DI KUARESMA SIKLO A

Promé Lektura : Génesis 2,7-9, 3, 1-7
Salmo : 51, 3-6a, 12-14. 17
Di dos Lektura : Romanonan 5, 12-19
Evangelio : Mateo 4, 1-11


Den e historia di tentashonnan ta hasi uso di dos símbolo masha importante pa hudiunan: e desierto, kaminda di análisis i enkuentro di kada ken ku su mes i ku Dios; i e kuarenta dianan, tempu di purifikashon. Asina, nos lo por a bisa ku e kanamentu aki di Hesus den desierto a sirbié pa enfrentá tentashonnan ku lo por a strob’é pa kumpli ku su vokashon komo yu di Dios i salbadó di hende. Durante e kanamentu aki, Hesus ta buska konekshon ku birtutnan di fe, di speransa i karidat pa tentashonnan ku demoño a pone su dilanti durante su análisis personal. Di e manera aki nos lo por a splika e aplikashon ku Hesus a hasi di su birtutnan:

Karidat Hende no ta biba únikamente di Pan

Karidat òf mihó konosí komo amor ta e kapasidat pa biba pa otro i stima Dios den otronan. Ora ku Hesus no ta transformá e piedranan den pan, e tabata lagando na kla ku E no tabata ke usa don ku Dios a dun'é pa su mes. Ku E lo a biba únikamente pa otronan. Mas despues sí Ela multipliká pan, pero lo no tabata pa su mes sino pa hinter e multitut ku tabata rondon’é i ku tabatin hamber.
Kada un di nos tin diferente don i birtut ku Dios a duna. Sin embargo, awe sosiedat ta invitá nos pa nos hasi uso di nan pa benefisiá únikamente nos mes. Di e manera aki, nos ta kambia tur oportunidat ku tin pa nos biba mihó, pero poko bia pa otronan por biba mihó. Komo hóben nos ta yamá pa kompartí nos don i birtutnan , i pa nos no keda será den nos propio sirkulo sin yuda esnan ku mas tin mester.

Fe Lo bo adorá Señor Bo Dios I únikamente na Dje lo bo duna honra.

Hesus ta defendé e fe den su Tata i no ta laga Diosnan falsu ku ta primintié kosnan ku pronto lo kaba i hal’é bai kuné pa por hòrta su libertat. Un fe firme lo yuda Hesus pa disidí ku klaridat riba su konvikshonnan pa no lag'é ser hibá pa ofertanan ku demoño tabata hasi na djE.
Kuantu invitashon nos ta risibí,. hóbennan ku ta kombidá nos pa legumai tur kos i sigui nan.? Konsumo ta e prinsipal di tur , pero tambe tin e indiferensha, flohera, alkohòl, droga, sèks komo “diosnan falsu” ku ta pone nos fe na prueba i ku ta eksigí di nos un konvikshon firme den Dios, úniko persona ku a duna su bida pa nos.

Speransa Lo bo no tenta Señor Bo Dios.

E demoño ta pidi Hesus pone su speransanan den interpretashonnan falsu di Santa Skritura. Sin embargo, Hesus sa ku nos speransa den Dios tin ku bai kompañá di nos responsabilidat. Ke men, Dios ta yuda nos ku su grasia, pero nos tin ku pone di nos boluntat pa alkansá e felisidat ku Dios ta ofresé nos. E demoño tabata pidiendo Hesus pa e no ta responsabel i pa e laga tur kos na Dios.
Awendia konstantemente ta kombidá nos pa laga nos responsabilidat un banda i pone nos speransa den realidatnan falsu ku lo no hiba nos na e felisidat berdadero . Asina, den seksualidat ta bisa nos ku no ta importá kon nos ta bib’é , importante ta pa protehá nos mes. Ta pidi nos pa pone nos speransa den loke nos tin, pero nos ta duna nos mes kuenta ku esaki tampoko ta hasi nos felis. Ta bisa nos ku plaser egoista ta bon, ku ta
Dios a kre’é, pero no ta bisa nos ku Ela kre’é komo fruta di amor i di entrega di hende mes.

Na kuminsamentu aki di kuaresma, nos lo por kuminsá pa pone nòmber pa e tentashonnan ku mas ta frekuentá den nos bida i ta alehá nos di e kaminda ku Hesus a marka ku ta yega ku nos na enkuentro ku su Tata. Esaki ta masha importante, pues asina nos lo sa ku nos no ta lucha kontra di algun idea apstrakto òf “demoñonan falsu” sino kontra aktitutnan konkreto ku ta stroba nos di biba plenamente komo kristian.