DI BINTIOCHO DJADUMINGU SIKLO A

Promé Lektura : Isaias 25, 6-9
Salmo : Salmo 23, 1-6
Di dos Lektura : Filipi 4, 12-14. 19-20
Evangelio : Mateo 22, 1-14

Ku e Evangelio di e djadumingu aki nos ta sera un siklo di tres parabel di Hesus tokante aktitut ku nos mester tin si nos ke partisipá na su Reino. E promé parabel di e dos yunan, a invitá nos pa reakshoná ku nos obranan i no únikamente ku palabra; e di dos di e trahadónan asesino den e kunuku di wendrùif, a invitá nos pa sa di rekonosé ku e donnan ku Dios a duna nos ta pa enrikesé su Pueblo i su Reino, i no pa laga nan sirbi nos. i por último ku e parabel di e bankete di matrimonio, Hesus ta siña nos tres aktitut masha importante ku nos no mester pone un banda si nos ke ta “invitado” den su Reino; laga nos mira na kontinuashon kua nan ta.

E parabel tin vários personahe: e rei ku ta representá Dios; su yu ta representá Hesus; e sirbidónan ku ta representá e profeta i apòstelnan; e promé invitadonan ku tabata e hudiunan ku a rechasá e mensahe di Hesus; i e invitadonan di e kargadónan di krus i esnan di riba kaminda ku ta esnan pober, inválido esnan mankaron i siegu (Lc 14, 15-24). Laga nos rekordá ku Hesus ya tabata haña su mes den situashon di konfrontashon habrí ku e ansiano- i saserdotenan di Herusalèm; i nan rechaso tabata bisto. Ta p'esei den e parabel nos ta mira refleho di e hudiunan aki ku será pa e Bon Notisia di Hesus, ta rechasá gratitut i amor inkondishonal di Dios pasobra nan tabata sinti nan mes mashá sigur di tin salbashon den nan man.

Di otro banda tin e invitado ku “no a bisti su bistí di kasamentu” i ku e Rei a rechasá. E pasashi aki no ta pretendé di mustra un rei ku ta ekskluí , pues ya nos a skucha ku e a invitá esnan pober i mankaron, sino mas bien e pasashi ta buska pa laga bon kla ku apesar ku nos tur ta gratuitamente kombidá na e Reino i por lo tantu pa gosa di salbashon, nos no por laga di biba e eksigensianan ku e Reino aki ta fiha pa nos. Kier men, ku e bistí lo ta e obranan ku nos mester biba pa “no pèrdè” e salbashon ku ya a ser otorgá na nos den forma inkondishonal. Ta di kiko e bistí aki ta konsistí? Siguiendo siñansanan di Hesus, bisti e trahe lo a nifiká biba ku hustisia, ku solidaridat i amor pa e ruman, ademas di biba komo berdadero “yunan di Dios”. Esaki ta e bistí di kua e parabel ta papia ku nos.

Si e parabel ta un komparashon di e Reino di Dios, nos lo por bisa e ora ei ku den e Reino, Dios ta ofresé e salbashon (e bankete) den forma generoso, gratuito, amoroso, inkondishonal; pero apesar di e forma gratuito aki, salbashon por ser rechasá pa hende (manera a sosodé den tempu di Hesus i ta sigui sosodé awendia). Ta p'esei e promé kos ku Hesus ta pidiendo ta aktitut di simplesa, humildat i di disponibilidat pa “risibí” salbashon i biba den e Reino. E promé invitadonan tabata sinti nan mes asina sigur òf tabata asina okupá, ku nan no pensa di tin mester di salbashon i ta p'esei nan ta pèrdè nan bida.

Pero ademas di e apertura aki pa risibí e amor di Dios, Hesus ta pidi nos responsabilidat, kier men: sa di respondé ku nos bida na e amor asina grandi, ku obra i no ku palabra. Pasobra no por pertenesé na e Reino i gosa di su privilegionan (ser yu di Dios, ser stimá den tur momentu, pertenesé na su Iglesia) sin biba e kompromisonan ku e Reino aki ta kontené. Tin ku siña di tin e trahe bon bistí manera siudadanonan di e Reino ku nos ta.

Por último, e parabel ta invitá nos pa biba habrí pa e ruman, pues no ta importá su kondishon sosial, moral, òf ekonómiko… nos tur ta invitá pa biba e Alegria di e Reino di Dios.

Asina, nos por bisa ku pa biba plenamente komo ser humano i kristian, Hesus ta pidi nos ta : simpel pa sa ku nos ku nos mester di Dios, responsabel pa semper nos tin e “trahe” bistí, i fraternal, rekonosiendo ku kada persona ta un “invitado” mas na e gran bankete di Reino.

Laga e siman aki nos ta habrí pa e manifestashonnan di Dios den nos bida diario; p'asina bibando nos dianan ku mas konsientisashon, nos lo por respondé na Dios manera E ta pidi nos. Kuantu bia nos no ta rechasá Dios komo ku nos ta asina okupá ku nos trabou òf dibertishonnan?