DI KUATER DJADUMINGU DI PASKU DI RESUREKSHON

Promé Lektura : Echonan 4, 8-12
Salmo : Salmo 118, 1. 8-9. 21-23. 28-29
Di dos Lektura : 1Huan 3, 1-2
Evangelio : Huan 10, 11-18


E afirmashon akí di Hesus no mester straña nos hopi den e evangelio di san Huan; pues den djE, nos ta skucha Hesus Kende ta revelá su mes vários biaha: Ami ta e pan di bida, ami ta e lus, Ami ta resurekshon i bida, Ami ta e Bon Wardadó, entre otro revelashonnan di Hesus. Pero, ta kiko ta lanta e afirmashon akí? Algun versíkulo promé, Hesus a kura un siegu di nasementu, i e fariseonan a trata di minimisá e hecho akí bisando ku Hesus tabata un mentiroso, ku no ta bini di Dios. Ta p’esei, Hesus ta reakshoná dilanti di nan di e manera akí: e ta laga keda bon kla ku E ta e Bon Wardadó, ku E sí konosé su karnénan i ku inklusive ta dispuesto pa entregá su bida pa nan; en kambio nan, esta, e fariseo- i doktornan di lei no tabata konosé nan pueblo i ménos tabata dispuesto pa sakrifiká nan mes pa e pueblo.

E Evangelio akí ta revelá na nos e serkania ku Hesus tabata sinti ku su pueblo, e inmenso amor ku Hesus tabata sinti e pueblo di Israel; E tabata dispuesto na stima nos te na e ekstremo, pasobra su Tata a konfi’É e mishon akí na djE. E afirmashonnan akí di Hesus ta por lo tantu, un gran misterio di amor, entrega, serkania, konosementu íntimo di parti di Dios pa ku su Pueblo.

Pero, kiko e afirmashonnan akí ta bisa nos? E promé pregunta ku ta lanta ta: nos ta digno di un amor asina grandi? ¿Realmente Kristu ta nos Wardadó? Kua bosnan nos ta skucha mas den nos siguimentu di nos kaminda komo kristian? Lo ta e bos di Kristu? Nos tur a sinti nos mes pèrdí algun biaha den nos bida: pèrdí den nos kaminda komo yu, komo ruman, komo pareha, komo studiante, komo profeshonal, komo kristian, etcetera. Na ken nos lo rekurí pa haña e kaminda? Tin hopi wardadó falsu ku ke mustra nos e kaminda fásil: flohera, e músika ku ta krea un ambiente evasivo di e realidat, e trabou eksesivo, e miedu pa profundisá den e problemanan personal, falta di responsabilidat, plaser, seksualidat iresponsabel, etc. Hopi kaminda pa medio di kua ta invitá nos pa kana bai te na un felisidat falsu; pero e realidat ta ku ningun hende konosé nos asina bon manera Hesus, ningun hende lo ta dispuesto pa entregá su bida pa bo felisidat manera El a hasié. Ki otro prueba di amor nos mester pa kere den djE, pa konfia den djÉ, pa siguiE?! Hesus ta nos Wardadó, no pasobra e ta bisa esaki, sino pasobra E konosé nos den profundidat i a duna su bida pa nos.

E siman akí laga nos buska pa “skucha” Hesus; rektifiká nos kaminda i sigui e kaminda di Kristu, e kaminda di amor, di pordon, di rekonsiliashon, di solidaridat i felisidat profundo. Laga nos sali di nos mes, pasobra e kaminda di Kristu ta e kaminda ku ta hiba nos na nos próhimo.