DI DIESSINKU DJADUMINGU SIKLO B

Promé Lektura : Amos 7, 12-15
Salmo : Salmo 85, 8ab-13
Di dos Lektura : Efesionan 1, 3-14
Evangelio : Marko 6, 7-13

E teksto di awe ta presentá nos e promé mishon di e diesdosnan. E enkargo ku Hesus ta duna nan ta pa nan kontinuá ku e aktividat segun ehèmpel di loke Su bida i obranan tabata. Señor ta duna nan instrukshon tokante kon nan mester hasi tal trabou:
"El a kuminsá manda nan dos dos":
Un pareha ta e komunidat mas chikí ku ta eksistí. Si un kai e otro ta lant’é; si un ta desanimá e otro ta apoy’é; si e kibuká e otro ta korigié. Den e tempu aki ku ta pasando kaminda hende ta kaba mas ku fadá di otro i kaminda deskonfiansa den otro ta práktika komun, t’asina ta , pero ta bon ta bon pa kòrda e konseho pa semper tin por lo ménos un hende serka p’asina e por sirbi nos di apoyo sigur riba kaminda.
E kombershon na kua nos ta yamá no ta únikamente pa laga nos ser kompañá pa Dios, sino tambe esun di kana nos kaminda ku otronan, den komunidat.
"E ta duna nan outoridat riba maldat i su akshon den mundu":
Lucha di e kristian no ta kontra ideologia, persona òf suseso. E kreyente por pasa hopi haltu riba tur e kosnan aki. E outéntiko bataya di fe ta di kombatí maldat ku por hasi ku un ideologia ta inhumano i ta duna fruta di inhumanidat. Maldat ku ta aktua den e ser humano transformando su sintimentu i persepshon den forma negativo, hasiendo ku e ta kapta otro komo enemigu na lugá di ruman.
Susesonan ku ta interogá nos i kaminda maldat tin oportunidat inmenso pa alehá nos di Dios. Tur e situashonnan aki ke ta señal ku poder di Dios ta muchu mas ayá di podernan maligno ku ta rondoná nos kontinuamente. Superá maldat ta haña un sentido for di Dios pa e kosnan ku ta sosodé ku nos.
Yamá pa no bai ku nada.
Semper a bisa ku un di e pió propagandista di nos fe ta Señor mes E mishon pa kua nan ta yamá na lugá di duna indikashonnan oportuno tokante medionan pa usa, kurioso ta ku na ta bin ku medionan ku no mester hasi uso di dje. Ta komo si fuera ta hasi e mishon mas difísil. "No mester bai ku ni saku, ni ku pan ni plaka". Ta e tres elementonan ku por duna seguridat na esun mandá.Klaramente Hesus ta rechasá nan. Únikamente Dios mester ta e seguridat di esun mandá, tur sobra kos den bida mester keda supordiná na e mishon.
Esun ku tin hopi kos material, na lugá di evangelisá, loke e ta perkurá pa hasi ta di salba su interesnan. Riba kaminda di evangelisashon no mester kana ku hopi ekipahe.
Kos ta duna nos seguridat falsu. Maske kos material ta nesesario, ta únikamente Dios ta duna nos e seguridat mas pleno.
E ta duna nos instrukshon kon e ministerio mester ta:
Ki ora mester keda i ki ora mester bai. Si bo bai na un lugá i nan no ke risibíbo ni skuchabo, bai for di einan. Hopi bia ta importante pa nos bai ku kuidou den e tarea pastoral pa no gasta energia ora esnan ku mester skucha no ke risibí e mensahe. Un kos ta e perseveransia di e evangelisadó ku tin ku ta yen di amor i di sentido komun, i otro kos hopi distinto, kos di kabesura ku ta heridá e labor evangéliko mes anulando i ridikulisando libertat di e otro persona. E balansa pa logra ku e evangelio ta prediká lo ta basá riba amor, prudensia i sentido komun.
Kada un di nos komo kristian ta yamá pa ser e misioneronan di awendia den kas, na skol, na trabou. No semper nos sa kon aktua i dirigí nos mishon.
Hopi bia nos ta haña nos so den e proseso aki. Ta e ora ei kada be di nobo nos tin ku bai bèk na e evangelio aki i laga palabra di Hesus interogá nos.
Efikasia di evangelisashon no ta proporshoná ni kos ni medionan alehá di e evangelio. Nos no ta evangelisá ora nos ta hasi nos mes grasioso, pasa pa inteligente òf poderoso. Ta komuniká evangelio únikamente ora ta biba i tin Hesus komo kompañero di kaminda.