zondag 21 september 2008

DI BINTISINKU DJADUMINGU SIKLO A

Promé Lektura : Isaias 55, 6-9
Salmo : Salmo 145, 2-3. 8-9. 17-18
Di dos Lektura : Filipi 1, 20-24. 27
Evangelio : Mateo 20, 1-16



Mateo ta relatá dos parabel den kua ku Hesus ta laga bon kla e diferensia asina grandi ku ta eksistí den e skala di balor di outoridatnan religioso i esun di Su Tata. Den e promé di esakinan (ku nos no ta skucha awe) Hesus ta papia tokante e poko trasendensia di plaka pa yega na perfekshon humano; i e di dos parabel , esun ku nos ta skucha awe, ta atendé e tema di gratuidat di salbashon. E dos temanan aki tabata masha importante pa e hudiunan di tempu di Hesus, pasobra segun e outoridatnan religioso di e tempu ei, plaka (doktornan di lei) i kumplimentu estrikto di lei (fariseonan), tabata e dos formanan pa “gana” salbashon di Dios.
Tumando e konteksto aki komo punto di salida, nos por komprendé mihó e parabel di e siman aki. Den dje Hesus no ta pretendé di duna nos kátedra tokante hustisia salarial, sino mas bien, e ta hasi uso di e ehèmpel pa siña nos e forma gratuita ku kua su tata ta duna salbashon i e goso ku esaki mester kousa pa nos. Hesus ta purba pa tres elementu den e parabel aki resaltá: “e yamada” di Dios pa traha den su kunuku di wendreif (figura usá vários bia pa Hesus pa simbolisá e reino di Dios), e kontesta nesesario di hende na e yamada aki (sin importá e tempu), i e goso pasobra otronan ta risibí e salbashon.


Ku e tres elementunan aki, yamada, kontesta i goso, nos por trata na yega na un reflekshon tokante nifikashon di e parabel. Dios ta yama nos tur pa traha den konstrukshon di su Reino, i ta primintí nos tur ku e ta “rekompensá nos” ku bida eterno i felisidat di sa ku nos ta Yunan di Dios. E yamada aki, Dios ta hasié for di un prinsipio pa nos tur, tin algun ku ta skucha for di e promé momentu, otronan entre nos ku ta tarda un tiki mas pa kontesta, pero na final, tur esnan ku a rospondé lo tin bida eterno. E parabel ta un invitashon pa nos gosa i alegrá nos mes pa salbashon di tur hende i no kana ta keha pasobra nos próhimo a hasi ménos esfuerso. E ta tambe, un invitashon pa respondé na Señor ku a kombidá nos pa traha den su kunuku di wendreif, pa di tal forma por risibí nos pago, ku ta plenitut riba e mundu aki i bida eterno.

Kon difísil ta tin ora pa komprondé Dios ! Paga esun ku a traha 8 ora meskos ku esun ku a traha solamente UN ora ... lo a parse inhustisia òf un eror. Pero ta únikamente , Dios sa di duna tur kos. E no ta stima ku mitar kurason, ni paga “pa ora” òf midi su pordon. Dios ta stima i semper e ta hasié ku plenitut.
Awendia nos ta topa ku hopi kristian ku ta parse di no ta komprondé e parabel aki di Hesus. Bo ta mira nan ta biba nan kristianismo ku pesadia , manera hende ku ta risibí pago, ku a lubidá gratitut di e amor di Dios. Nan a pèrdè forsa di e yamada, di e kontesta i mas ku tur kos di e goso di biba manera kristian.
Ta papiando di e kristian ku ke kumpra Shelu dunando limosna limosna òf bayendo misa. E ta konfesá pasobra e tin miedu di kondená su mes i ta bai misa riba djadumingu pasobra e ta obligá.. Hopi matrimonio ku ta biba e moral kristian manera ta algu imponé i otro hóbennan ku ta pensa ku ser kristian ta limitá nan “libertat”. Tur e trahadónan ei di e kunuku di Señor, ku no a duna nan mes kuenta ku ya nan tin den nan man speransa di bida ku plenitut, di bida eterno.
Traha den e kunuku di wendreif , ta nifiká, kontestá amor di Dios, ta for di awor gosa di inmensidat di e amor gratuito di Dios. Nos lo por aseptá e goso inkondishonal aki den nos bida?

Laga nos biba ku goso. Alegre, ku aktitut positivo, yen di speransa no opstante difikultat ku hende i tempu ta pone nos dilanti. Finalmente komo parti di e kunuku di wendreif di Señor, ya nos por gosa di su amor, amor ku únikamente Dios por duna ku plenitut.