DJADUMINGU DI PENTEKÒSTER

Promé Lektura : Echonan 2, 1-11
Salmo : Salmo 104, 1ab, 24ac. 29bc- 31. 34
Di dos Lektura : 1Korinto 12, 3b-7, 12-13
Evangelio : Huan 20, 19-23


Mi tin impreshon ku pa hopi kristian fe ta suheto na teorianan mas o ménos akseptá i no un eksperensha konkreto. Laga nos splika. For di chikí ta bisa nos ku nos tin ku kere den loke ta formulá den Kredo. Ta realidatnan spiritual ku ta enserá historia di salbashon. Realidat ta ku pa hopi persona e frasenan aki únikamente esaki: frasenan bashí di kontenido. Di e manera aki nos ta mira ku por bisa hopi kos ku gran kontenido pero sin ku realmente Ta sinti plenitut di loke nos ta bisa.
Algu paresido ta pasa nos ku Spiritu Santu. Un biaha un saserdote a puntra algun mucha ken Spiritu Santu tabata i únikamente un di nan a kontesta bon: "Spiritu Santu ta Dios." Ta ku Dios ku ta keda ku nos, den nos bida diario, ta duna nos aliento den nos kaminda di tur dia komo kristian.
Abo ta un persona "spiritual"? Kiko ke men ta "spiritual"?
Pa hopi hende tras di e kalifikashon aki tin hopi komplikashon interior skondí. Por yama spiritual un karakter tímido, será, sin forsa, ku hopi biaha ta buska refugio den fe pa trata na splika su propio insertidumbre?..." Nada mas leu di bèrdat. Ser spiritual no ke men ser tímido, será, yen di miedu i ku kompleho. Ser spiritual ta nifiká ta laga Spiritu Santu guia bo i no di tin un karakter bou di nivel mínimo.
Ningun hende por duda ku san Pedro òf san Pablo tabata personanan spiritual, pero ningun hende por afirmá ku nan tabata personanan tímido, será, metí den nan mundu chikí, pèrtá.
Ser spiritual ta, tin un kurason den kua tin lugá pa tur hende. Loke ta e problema di hopi kurason ta ku nan ta sufri di falta di forsa spiritual. Ménos nan ta entregá nan mes na Señor, mas chikí i mas egoista nan ta bira. Ku tempu hasta nan lo yega na konfundí yamando kosnan bon malu i kosnan malu bon. Esaki ta kaminda di esun ku no ta biba den sintonia di Spiritu Santu. Ni ritonan religioso selebrá sin "alma" (sin bida) ta yena nan. Pa nan esaki ta palabra bashí ku no ta produsí resonansia spiritual. Nan ta eko muda di nan propio frustrashon. Hende ku ta bisa ku nan ta kreyente i ta biba asina, loke ta pasa ku nan ta ku nan ta mantené nan mes den infantilismo kontinuo ku den forma negativo ta disminuí tur loke tin di aber ku nan.
Nos ta yamá pa krese den Spiritu. Nos ta kombidá pa madurá humano i spiritual i pa esaki nos mester di presensia konstante di Dios den nos bida.
E Palabra ta kòrda nos ku e disipelnan tabata reuní (manera hopi biaha nos ta reuní awe), pero nan tabatin e portanan será (no ta referí únikamente na portanan físiko, sino na esun di nos kurason), pasobra tin miedu (mi tin ku deskubrí miedu ku ta rondoná nos bida i ku ta stroba mi krese komo persona i kreyente). Bon Señor sa ku pa e mishon titánica di krese i hasi Dios presente den mundu, ku yudansa propio di Dios ta nesesario. E ser humano no tin sufisiente forsa di su mes pa e mantené su mes den presensia konstante di Dios. Ta p'esei nos mester di su yudansa i su aliento.
Abo ta biba bou di e lei di e Spiritu?
Frutanan di Spiritu Santu ta e testimonio mas importante di su akshon den nos. Nos ta kristian na mdí ku nos laga Dios transformá i kapasitá nos pa ser su siguidónan.
Apesar di ku e kas ta será Hesus no ta kibra slòt ni e no ta skòp porta di e disipelnan ei. E ta drenta den forma silensioso. E ta pasa den muraya. Nan tabata yen di miedu, pero nan tabata huntu rekordando loke a pasa. Mira Kristu resusitá tabata asina impaktante ku miedu a disparsé i Iglesia a ser kreá. Iglesia ta aparesé por tantu ku e elementunan aki: nan tabata huntu- akseptando presensia di Kristu Resusitá- habriendo portanan di alma- superando miedu- risibiendo Spiritu Santu.
Iglesia ta patria di alma. TA Iglesia ke men, tin portanan habrí, reuní sin miedu. Esnan ku ta trata di biba Evangelio for di tal salida, ta esnan ku ta mira kon Spiritu Santu ta forma nan riba kada dia.
Hende ku ta biba yen di miedu òf ku insiguridat lo ta disipelnan inefikas, pasobra e Spiritu no ta produsí fruta den nan. Esun ku ta biba den kobardia únikamente lo transmití kobardia na otro. Esnan ku pa pensa ku fe ta algu tan íntimo ku no mester ser kompartí lo haña nan mes será den nan egoismo, nan so i sin presensia di Spiritu Santu.
Riba e dia aki di Pentekòster nos tin ku kuestioná nos mes riba e proseso di madures di nos fe.
Mi kurason durante tur e añanan a aserka e madures spiritual na kua ami ta yamá?
Kua ta e slòtnan mas difísil pa habri den mi bida i dikon?

Kua ta e miedunan ku ainda mi tin ku superá?

Mi ta akseptá Spiritu Santu den mi bida?