DI SHETE DJADUMINGU DI PASKU DI RESUREKSHON

Promé Lektura : Echonan 1, 12-14
Salmo : Salmo 27, 1, 4, 7-8
Di dos Lektura : 1Pedro 4, 13-16
Evangelio : Huan 17, 1-11


Hesus ta kuminsá su orashon na Tata deklarando ku “e ora” tan deseá, na kua masha hopi biaha el a referí den su bida, a yega. Ta trata di ora di su testimonio i di su morto, di kumplimentu di hinter boluntat di Tata i di salbashon di hende. Su promé petishon ta pa Tata kombertí e ora aki den ora di su glorifikashon, pues e gloria di e Yu ta uní n’e glorifikashon di Tata.
E glorifikashon ku Hesus ta deseá no ta mas ku e konsekuensia lógiko di e poder ku E a risibí "riba tur karni" (kier men, riba tur hende), ora di ser distinguí ku e vokashon mesiániko, Hesus ta ehersé e poder aki salbando hende i dunando bida eterno na tur esnan ku ta kere den djE. Esaki ta su gloria i esun di Tata.
Pero salbashon di hende i bida eterno ta konsistí presisamente den rekonosementu di Dios i akseptashon di Esun ku El a manda, Hesukristu. No ta probabel ku Hesus lo a yama su mes "Hesukristu".
Ora ku Huan ta skirbi su evangelio, nòmber di "Hesukristu" tabata usual entre kristiannan; seguramente ta Huan ta esun ku ta introdusié den e teksto.
E "yu di hende", esaki ta, e mesun Yu di Dios ku a bira hende, ta pidi Tata p’E revelá tur gloria di divinidat den su naturalesa humano, despues di a kumpli e obra ku kua E lo a konfia na djE.
Hesus ta bisa di ki manera El a kumpli ku su obra den e disipelnan i ta hasi presentashon di esakinan na Tata, di kua E a risibí nan . Hesus ta yama e disipelnan aki i a saka nan di un mundu inkrédulo, a elihí nan i a manifestá nòmber di Tata na nan: ken ta Dios i kon Dios ke ta pa hende.
El a revelá nòmber di Tata na nan den tur su palabra i obranan, i e mesun Tata invisibel a manifestá su mes den kara di Hesus. I e disipelnan ku a risibí revelashon di Dios dor di Hesus i den Hesus, a kere den Dios i den esun ku El a manda i a permanesé den fe.
I p’e presentashon di e disipelnan na Tata, Hesus ta intersedé ekspresamente pa nan den su orashon. E no ta bai pidi p’e mundu inkrédulo, sino pa esnan ku a kere. Hesus ta apoyá su petishon den tres punto: e disipelnan tambe ta di Tata, pues i di djE nan a risibié: nan a aksept’é komo esun mandá dor di Tata, i awor nan ta bai keda nan so den mundu sin Su presensia. Ta p'esei E ta konfia nan na kuido di Tata.