zaterdag 3 oktober 2009

DI BINTISHETE DJADUMINGU SIKLO B

Promé Lektura : Génesis 2, 18-24
Salmo : Salmo 128, 1-6a
Di dos Lektura : Hebreonan 2, 9-11
Evangelio : Marko 10, 2-16


Ora ku hende konosé postura di Iglesia tokante divorsio, e reakshon mas komun ta skandal: "... e ora ei ta kiko Iglesia ke, ku si nan NO ta felis ... pa nan sigui sufri huntu ?..." ; " Iglesia ta mashá inhustu ku esnan ku a divorsiá..."; "Sigur ku Hesus lo tabatin mas mizerikòrdia...".
Nos amigunan no sa ku Hesus tabata infinitamente mas radikal. Señor a yega di bisa ku si un hende kasá tabata mira un otro anto deseá esaki den su kurason —ripará a ku ni sikiera e ta referí na e parti físiko—, .... ya ela kometé adulterio...
Asina inhumano nos fe ta ku sernan humano? Nos ta biba den un fe ku no ta komprondé problema i difikultat di hende di awe?
Ta e tema di semper. Hasi pa Dios ta presente den nos bida ta nifiká asumí un estilo di bida segun e Evangelio.
Ora un pareha ilushoná ta bai kasa na Misa, nos ta deskubrí ku den mayoria kaso anteriormente nan no ta biba un bida di fe. Di e manera aki kontenido real di loke matrimonio ta nifiká ta keda algu ménos ku ignorá.
Dikon hende ta kasa na Misa?
No laga nos pasa pa ingenuo, nos tur sa esaki. Den mayoria kaso e loke ta bin dilanti komo ménos importante ta esun di fe. Ta bai kòmbersashonnan prematrimonial ku poko mal gana, nan ke kombèrtí Iglesia den un mondi tur na flor, i ora nan ta parti karchi di invitashon pa kasamentu, nan ta lubidá na kombidá Dios na e selebrashon mes. No ta kestion di ta katastrofista simplemente realista. Semper loke a hala atenshon ta e fasilidat ku nos tin den Iglesia pa hasi ménos kaso di interesnan di Evangelio. Nos ta bira kara den otro direkshon, nos ta bin ku èksküs, pero akshon di e Evangelio hopi biaha ta keda un poko “tapá” bou di nòmber di "prudensia" ku den fondo ta refleho di un kobardia mal disimulá.
Dikon hopi saserdote no ta duna balor na e forsa ku ta regenerá i humanisá Evangelio?
Por ta ku nan mes lo no a deskubrié. Nos ta asina pegá den loke ta mundano ku Evangelio pa hopi a bira un molèster ankrá den tempu di ántes.
Dikon e religiosonan no ta eksigí Iglesia un akshon mas kristian dilanti personanan ku ta aserká pa pidi un sakramentu?
Probablemente pasobra nan lo aserka tambe den e mesun kondishonnan pa risibié...
Hesus, provoká pa esnan ku tabata papia kuné ta toka e tema di divorsio, un tema mas ku difísil pa e peso di sufrimentu ku tal situashon ta trese kuné. Den poko tema manera divorsio nos mester di e agentenan pastoral ku mas amor, mas akohida i... ku hopi sentido komun. Laga nos bai den parti.
Ku intenshon di prepará un trampa p’e nan a puntr’é si ta permití e esposo separá di su esposa. Hesus a kontesta nan ku un pregunta: "Kiko Moises ta ordená boso ?" Nan a kontest’é ku e teksto den Dt 24,1.
Hesus ta kontesta nan ku debí na nan tèrkedat di kurason Moises a duna nan tal órden. Pero e Maestro ta bai bek na kuminsamentu bisando ku na prinsipio no tabata asina...
Den Iglesia e ehersisio aki pa aktualisá e mensahe aki na tempu aktual nos tin ku sigui un método paresido. Nos no por biba
den pasado, pero tampoko nos por ignor’e sin mas Semper ta gusta hende ku sentido komun pasobra nan sa di balansa na tur dos banda i si nan ta kreyente, nan lo sa di aktualisá e mensahe di un manera asina natural ku e lo no kreá sufrimentu.
Ki nesesidat di sentido komun nos tin mester den Iglesia i den matrimonio.
Ni esnan tradishonalista ni esnan progresista lo mantené e mensahe aki di Kristu bibu den nan mente, únikamente amor i sentido komun di e santunan ta hasi
e posibel e interkambio aki di tempu i moral, di tempu i hustisia.
Esposonan nan ta yama "cónyuge", nifikashon di e palabra aki ta "esun ku ta uní na e mesun yugo". Hesus tambe a papia un dia di un yugo: "Tur esnan ku ta kansá i kargá , bini serka MI i Ami lo duna boso sosiegu. Tuma mi yugo riba boso skouder i siña di Mi, pasobra Mi ta mansu i humilde; i boso lo haña sosiegu. Pasobra Mi yugo ta suave i Mi karga ta lihé." (Mt 11, 28-30)
Den fondo, loke e teksto ta bisando nos ta ku siendo "cónyuge" di Hesus nos lo por establesé otro komunidatnan kaminda por ta berdaderamente felis.
Divorsio no ta e remedi pa matrimonio ku ya no ta funshoná, esaki nos tur sa, inkluso esnan ku ta forma parti di esaki... Pero nos mester ta balente i sinsero na ora di denunsiá ku hopi matrimonio lo no mester a ser selebrá na Misa, pero nos ta buska argumentu mental pa hustifiká nan. Ser balente pa bisa e hendenan ku únikamente ta mira den matrimonio na Misa un eksposishon mas di banidat, pa nan spera, pa nan reflekshoná i pa nan aserká Kristu, ku nos lo yuda nan riba tal kaminda. Probablemente e hendenan aki lo bisa nos”legumai ko’i kèns , ku e úniko kos ku nan ke ta kasa...
Esnan divorsiá di nos sosiedat den nan mayoria ta katóliko i nos tin ku reflekshoná riba esaki profundamente. Ora nos ta papia di un matrimonio un i indisolubel den un mundu plural i soluble, nos no mester pèrdè nunka di bista ku matrimonio no ta un institushon inventá pa medio di hende, sino algu ku Dios tabata ke. Si pa nos komo katóliko esaki no ta bon kla, nos lo pensa i bisa meskos ku esnan no kreyente. Pero e klaridatnan aki no mester ta na nivel dògmátiko o teóriko sino un eksperensia profundo di bida.
Prepará hóbennan pa un eksperensia real di Kristu resusitá i pa matrimonio ta e mihó remedi kontra divorsio. Tur hende sa ku esaki ta difísil pero no imposibel. Skohementu di e cónyuge por ta desasertante si no a hasié ku orashon, ku madures i ku diskreshon. Esnan namorá ta bai huntu pa kumpra apartamentu, pa kumpra artefakto pa e bibienda nobo, pa invitá amigunan. Mester puntra nos mes kuantu pareha namorá ta bai huntu serka Dios... kuantu a resa huntu pa nan matrimonio... kuantu a buska den lus di e Evangelio e amor ku Dios a pone den nan kurason... i...kuantu a kombidá á Dios na nan kasamentu den Misa...?
Kiko ta e loke den fondo e Evangelio di awe ta bisa nos den profundidat? Ku nos mester haña un sentido moral den nos bida diario, un moral ku ta bini for di Dios; fayonan di situashonnan den bida ta pasobra, probablemente, ainda nos no ta e persona ku e Spiritu por transformá.
Bida kristian ta un konstante siñamentu for di amor i sentido komun. Fayonan den bida diario ta produsí segun ta parse pa tres motibu fundamental:
Ousensia di Dios pasobra nos a kore kuné di nos bida diario.
Ousensia di amor den tur su amplitud i sentido.
Falta di madures tantu humano komo spiritual, pa por tin e bon bista pa sa di interpretá loke Dios ke di nos.
Hende lo duna su mes kuenta ku hopi di esnan namorá di otro ora nan ta bai kasa na Misa, nan ta bisa nan amigunan: "si bo no por bai Misa, bini na e selebrashon..."; e ekspreshon ta basta gráfiko: den Misa ta hasi e ritual, algu alehá di bida; ta manera algu añadí sin importansia pa e bida diario. Pero kaminda nos ta bai selebrá ta kaminda nos ta hasi fiesta, tin alegria, kaminda nos ta balia i kanta, kaminda nos ta deseá tur kos bon i nos ta felisitá, kaminda nos ta hari i soña huntu... Ta posibel ku e tema di divorsio entre katólikonan lo kuminsá disparsé, ora nos ta kapas di transmití na nos rumannan, ku kaminda realmente e fiesta ta, ta kaminda ta pone Dios komo testigu di e amor ku nan tin pa otro i di dia pa dia yen di fruta di Spiritu Santu...

Benedict XVI: The protection of life cannot be abandoned