DI DIESEIS DJADUMINGU SIKLO A

Promé Lektura : Sabiduria 12, 13. 16-19
Salmo : Salmo 86, 5-6. 9-10. 15
Di dos Lektura : Romanonan 8, 26-27
Evangelio : Mateo 13, 24-43


Vários ta e parabelnan ku Hesus a kompartí ku nos pa trata na splika kon Reino di shelu ku ya ta asina serka tabata. Algun di esakinan nos ta haña den vários evangelista, pero esaki di trigo i yerba shimaron ta eksklusivo di Mateo. SA esaki ta sirbi nos pa guia nos un poko den nos reflekshon. Mateo ta skirbi pa un komunidat hudiu i por lo tantu, e no ta spar signonan ku ta komun pa hudiunan, pero sinembargo pa algun di nos nan por ta straño.

Si nos analisá e teksto di awe, nos ta haña tres parabel i un splikashon: e trigo i e yerba shimaron; e simia di mòster; e zürdeg ; i e splikashon di e promé parabel. E parabelnan di e simia di mòster i zürdeg parse di ta referí na e simplesa ku kua presensia di Reino ta kuminsá, i di otro banda, e enorme mishon na kua esnan ku ta buska pa konstruí e reino aki ta yamá. Asina nos ta haña, pasenshi, simplesa, e parti chikí dilanti mundu manera komienso di Reino; di otro banda, e grandesa, plenitut, totalidat di e Reino de Dios.

E parabel di e trigo i yerba shimaron, nos lo por reflekshoná riba dje mas profundo. Den dje nos ta haña imágennan semehante na esun di siman pasá: un sembradó, algun simia i kresementu di esakinan; mas e mensahe awe ta mas amplio. Awe Hesus ta papia ku nos tokante di eksistensia di e bon i e malu mará na otro den konstrukshon di su Reino. Nos lo por a mira den dje un toleransia, kasi den sentido di fatalidat (“pues no tin moda, e mester eksistí”) di eksistensia di loke ta malu; sin embargo, si nos ta mas atento den nos lesamentu di e parabel, Hesus ta hala nos atenshon nos pa tin prekoushon den nos desaroyo komo kristian, pasobra fásilmente“miéntras nos ta drumi”,yerba shimaron por krese den nos kontesta òf den nos komunidat. Di otro un banda, Hesus ta siña nos pa tin mas pasenshi i no destruí e bon ku ta eksistí tumando posishon intolerante dilanti loke ta malu. Ken lo por proklamá su mes simia puru di manera ku e por señalá yerba shimaron?

Un aplikashon den nos bida nos lo por a haña den nos relashon ku Dios i ku otronan. Kuantu biaha den nos relashon ku Dios nos lo tabata ke mira ku nos ta perfekto, ku nos no ta kometé ningun piká? Ma sin embargo, nos ta enfrentá un realidat masha distinto: nos ta mira kon nos ta kai kada bia den e mesun erornan , den e mesun fayonan sin por kibra ku nan apesar di a purba esaki pa hopi aña. Tin biaha nos lo tabata ke Sali di e realidat aki i buska otro kaminda pa biba, otro famia kaminda nos por desaroyá nos mes, kuminsá ku un relashon nobo, bolbe biba adolesensia òf hubentut di nobo pa no kometé e mesun erornan ets. Pero Hesus ta yama nos pa tin PASENSHI, konfiá mas den Dios ku den hende, pa permití ku e bon den nos ta krese i e malu ta bai ta disparsiendo. Tambe e ta yama nos pa tin KUIDOU dilanti e malu ku ta buska pa desanimá nos, kita nos pas i speransa di e viktoria final di bida riba morto; i alabes e ta reta nos na KRESEMENTU manera e simia di mòster òf zürdeg.
Ku otro palabra, den konstrukshon di nos felisidat i esun di nos rumannan, den konstrukshon di e Reino, nos tin ku akseptá pa biba den tenshon eterno entre loke nos ke i mester ta i loke nos ta alkansá pa realisá; rekordando semper ku kristianismo ta un kaminda ku nos tin ku kana hinter nos bida; ku nunka nos por bisa: "ya mi ta Un kristian kompletu" sin ta te ora ku nos alkansá enkuentro definitivo ku Señor.

Den nos relashon ku Dios i ku otronan, kier men, den nos kolaborashon pa konstruí e Reino di Dios, nos a kai den hopi bisio ku ya nos no ta alkansá na mira pasobra e okupá ku nos ta ku nos dianan no ta permití nos esaki. E siman aki, laga nos hasi un "inventario" di nos relashonnan (ku Dios i ku otronan) i laga nos trata pa REKONOSÉ, kon e yerba shimaron a krese, pues talbes nos bida lo parse mas un tereno di yerba shimaron ku a invadí e trigo!. Laga nos konvensé nos mes di e importansia di nos aporte pa konstrukshon di e Reino