DI DIES DJADUMINGU SIKLO A

Promé Lektura : Hoséas 6, 3-6
Salmo : Salmo 50, 1. 8. 13-15
Di dos Lektura : Romanonan 4, 18-25
Evangelio : Mateo 9, 9-13


Nos ta biba den sosiedat di " tantu bal esaki o esaya ...." Loke nan ta yama relativismo moral. Ta parse komosifuera realidat konstantemente ta sakudí pa konfushon i indefinishon. Kiko ta pasando ku nos sosiedatnan?
Hesus ta aserká Mateo ku tabata masha okupá ku su trabou i ke- haser nan . E ta kombid’é pa siguié i Skritura ta bisa ku e "el a lanta i a sigui’É". Tin hopi hende ku tambe lo ta skucha invitashon pa sigui Señor pero loke ta pasa ta ku nan no ta ni lanta di nan bida ni muchu ménos nan ta siguié. Loke ta fiho i inmovibel no ta kana bon ku e Evangelio. Bida ta un kaminda riba kua semper nos tin ku move. Stanka den pasado no ta evangéliko.
Señor semper ta riba kaminda, nunka E ta keda sintá na un solo sitio. Bida di e kristian mester ta mesun kos. Kana ta kere den presensia di Dios den nos eksistensia. Esun ku ta kana sa ku e palabranan di Hesus bisando nos: "Lo mi ta ku boso tur dia t’e na fin di mundu" ta palabra yen di bèrdat. Keda sintá ta nifiká biba stanká den pasado i den miedu. Lanta para ta enfrentá bida propio , enfrentá loke tin nos mará na pasado i na nos miserianan humano. Lanta ke men ta libra nos di nos pikánan.
Realidat di piká pa hopi hende ta skur i sin kontenido. Mas bia nos ta skucha "mi no tin piká..." ku "mira Señor mi miseria..." Hende ta asina. Ta parse manera bon kla nos ta mira a e piká ku ta presente den otronan pero ta kosta nos hopi pa deskubrí nos propio miserianan moral i spiritual. Dilanti di esaki Hesus ta laga kla pa nos ku Dios Tata no ta aktua asina.
Nos a kustumbrá di husga otronan. Nos ta hues i burdugu di otronan sin ku ningun hende a nombrá nos komo tal. Señor sa nos forma di ta ... i di aktua i ta laga nos mira ku E a bini no komo hues ni komo burdugu sino komo nos salbador. Hesus Ta rekòrda nos e palabranan : " Mi ke pa boso ta kompasivo i no pa boso ofresémi sakrifisio." Bon rekordatorio pa esnan ku ta kere ku Evangelio ta un kumplimentu mas ku un fuente di kompashon pa otro i inkluso pa bo mes. TA humano ta nifiká mira nos mes ku kompashon i ku kurashi i mes momentu ta kapas di mira otro ku mesun wowo yen di mizèrikòrdia.
Ora nos aserka pekadornan no ta pa nos partisipá den nan miseria i den nan piká.
Nos mester tin e mesun estilo di Hesus. E Maestro ta aserká e pekadornan ku un ophetivo: yama nan pa arepentí, un yamada pa kambia nos mentalidat i nos kaminda. Hesus no ta di akuerdo ni ku piká ni ku e pekadó; loke E ke di bèrdat ta libra i pordoná hende di kadena di nan miseria.
Kon nos por relashoná nos mes ku esnan ku ta biba hogá den piká? Ki aktitut nos mester tin ku esnan ku ta leu di Dios? Kon ekilibrá serkania na realidat di piká i sigui siendo siguidónan iluminá di Hesus?
Bon pregunta pa nos hasi nos mes ku frekuensha riba nos peregrinashon di bida. E Maestro ta siña nos ku aserka e realidatnan aki no ta aprobá su aktonan sino semper lo ta un invitashon mizèrikòrdioso pa lanta i sigui Kristu. Nos pastoral i nos bida ta invitashon pa superá nos miseria i pikánan i esun di otronan?