DI DIESDOS DJADUMINGU SIKLO B

Promé Lektura : Job 38, 1. 8-11
Salmo : Salmo 106, 23-26, 28-31
Di dos Lektura : 2Korintio 5, 14-17
Evangelio : Marko 4, 35-41


Tin sirkunstansia, akontesimentu i suseso den bida ku ta laga nos sinti nos mes felis i alegre. Ta parse ku tur kos ta sali nos bon, ku tur kos ta koperá na nos felisidat. Nos ta gosa di bon salú, nos tin plaka, no tin problema den famia. I e alegria aki ta desbordá, e ta lusi pa otro mira, nos ta komuniká esaki ku esnan rondó di nos. Na otro okashon ta parse ku tur kos ta bai malu pa nos. Apesar di nos bon boluntat, nos no tin éksito den loke nos kuminsá kuné. Ta parse ku tur kos ta bai den nos kontra . I nos ta kulpa loke ku sierto superstishon nos ta yama destino òf Dios mes. Tin bia, ora kos ta bai malu pa nos, nos ta kòrda riba Dios i nos ta pidié pa yuda nos. Sikologia humano ta asina kompliká ku, fásil nan ta pasa di un sintimentu pa otro: di alegria pa tristesa, di plaser pa doló, di kurashi pa miedu.
Ambiente di lekturanan djawe ta konta nos di e grandesa i poder di Dios i di chikí di e ser humano; di sufrimentu i inkapasidat humano i di e forsa di Dios ku por libra nos di tur prekupashon. Nos konosé esena di e evangelio. Ta nochi. E apòstelnan ta move ku nan rema den laman. Kristu, kansá di trabou di den dia, ta na soño. Direpente ta lanta un tormenta, olanan ta pasa riba e barku, ku peliger di ku e apòstelnan por bai awa, spantá nan ta spièrta Kristu pa pidié yudansa i Kristu ta realisá e milager. Laman ta bira kalmu.
Den Tèstamènt Bieu ta konsiderá laman komo serial i sentro di mal poder i di skuridat. Ta Dios so por domin’é. Ta loke e promé lektura den buki di Job ta indiká na nos. Dios a sera laman denter di sierto límite ku e lo no traspasá i ku ta manifestá omnipotensia di Dios. Kristu ta ordená laman i esaki ta bira kalmu. E apòstelnan ta keda tur asombrá dilanti tal poder i a puntra otro: "Ta ken e hòmber aki ta, ku asta bientu i laman ta obedesé"? Ta únikamente Dios por dominá laman. Di manera ku e hòmber aki ku a ordená i a logra ku laman a trankilisá, ta Dios. Kristu ta Dios. Por ta ku t’e na e anochi ei e disipelnan no a duna nan mes kuenta di ken Kristu tabata realmente. Nan tabata atmir’é komo un personahe importante. Pero sigur nan no a mira Dios den dje.
Laga nos tuma nota di un detaye den e episodio. E milager ta realisá komo konsekuensia di e petishon, di orashon di apòstelnan. Nan ta spièrta Kristu pa lag'é mira e peliger den kua nan tabata aden i nan a pidié pa salba nan. Kristu ta reprochá nan pa nan kobardia i nan falta di fe. Nan a akudí na orashon, na pidimentu, ora nan tabata den peliger. Lamentabel ta ku frekuensia nos ta kòrda riba Dios únikamente ora nos ta haña nos den situashon di ansha: ora nos ta malu, ora un ser kerí ta den hospital, ora kos no ta bai segun nos gusto. Nos, komo apòstel, ku frekuensia ta lubidá di ku Kristu, di ku Dios ta ku nos, i ku di tal forma nos no mester preokupá nos pa kos, sino trata di saka mayor probecho posibel di tur kos. Nos ta enbolbí nos mes asina profundo den e mundu ku ta rondoná nos, negoshi, dibertishon, ku nos ta lubidá ku Dios ta huntu ku nos, ku Dios ta dirigí susesonan den nos bida, di ku Dios tin su providensia ku ta rigi nos destino i destino di mundu. Nos falta fe i entrega na Dios. Nos ta lubidá di biba bou di bista di Dios. Ta p'esei nos ta desanimá i nos ta sinti miedu dilanti di kualke difikultat ku bida presentá na nos.
Nan a kompará bida humano ku un barku. Mundu ta e laman kompliká i hundu riba kua nos tin ku move, yen di peliger, di mònster, di animalnan gigantesko dispuesto pa kaba ku nos. Hopi ta e difikultatnan ku nos ta haña nos aden, hopi e peligernan ku ta rondoná nos i ku ke stroba nos di yega na nos destino, na kas di e Tata. Tin ku pasa den laman di bida no ta kos fásil. Nos tin ku riska i sigui Kristu riba e kaminda ku E a mustra nos. Tentashon, enemigunan di nos alma, forsa di maldat ku ke difikultá nos peregrinashon, ku ke stroba nos di yega shelu, na e felisidat ku nos ta buska i ku nos no ta haña riba e mundu aki. Tur esaki ta nesesario. Na final di nos bida nos lo haña e laman kalmu, trankil, felisidat, Dios. I den nos marcha, Kristu ta bai ku nos. Aparentemente, hopi biaha e parse di ta na soño sin ta preokupá ku nos lucha, nos esfuerso i nos difikultatnan. Pero djaleu e ta mira tur loke nos ta hasiendo pa keda den su grasia, pa no pèrd’é, pa sigui kuné. I den tal esfuerso E ta premiá nos. Ta p’esei nos mester biba den e speransa aki.
Kristu ta enbolbí den nos bida; E ta biba ku nos i den nos pa medio di boutismo. Amor di Kristu a transformá nos. I San Pablo ta bisa nos den e lektura di awe ku " amor di Kristu ta urgí nos". I e ta urgí nos pa kontest’é ku e mesun amor. "Si Kristu a muri pa tur hende, tur hende a muri". Loke ta importante di morto no ta morto mes; importante ta ku e ta habri kaminda pa nos, e ta duna nos akseso na otro bida, e ta proyektá pa nos eternidat felis. Nos tur a muri di piká p'asina nos por biba pa e grasia, pa e amistat di Dios, pa santidat, pa felisidat. Pa e boutismo ku Kristu a regalá nos, pa su morto, nos mester ta kriaturanan nobo ku no ta biba sino pa Kristu, ku nos ta dirigí tur kos na Kristu, ku tur kos ta hiba nos na Kristu. E mandamentunan, e sakramentunan, kumplimentu ku nos debernan komo mayor di famia, komo yu, den nos dibertishonnan, tur ta hiba nos na Kristu, ta yuda nos biba pa Kristu. Mundu ta spera un sonrisa di komprenshon, un man di amigu, entrega di e katóliko, di e yu di Dios, di esun ku ta biba pa Kristu. Laga nos no defroudá humanidat, laga nos no defroudá Kristu.
Laga nos pidi Kristu pa nos biba p’E, pa nos akseptá Su mensahe, pa E ta semper den nos.