DI BINTIOCHO DJADUMINGU SIKLO B

Promé Lektura : Sabiduria 7, 7-11
Salmo : Salmo 90, 12-17
Di dos Lektura : Hebreonan 4, 12-13
Evangelio : Marko 10, 17-30


E esena di e hòmber riku ku nos a skucha awe a laga nos, sin duda, ku un sentimentu di duele. Tabata un enkuentro kasi kasual, esun di e hòmber ku a kore bai kontra Kristu pa puntr’é: "Maestro, kiko mi mester hasi pa mi haña bida eterno?” Na promé momento, nos ta sinti nos mes konmoví pa e pregunta aki. Sinseridat i generosidat di e hòmber ei bon i honrado ta impreshoná nos den forma grato. Kristu ta kontest’é ku pa alkansá bida eterno mester kumpli ku mandamentunan di Dios, i E ta menshoná nan. E hòmber ta kontesta ku semper for di su hubentut ela tené su mes na nan. E ora ei Kristu ta mir’é ku amor i ta bis’é: "Un kos so bo falta. Bai i bende loke bo tin i duna hende pober e plaka i lo bo tin tesoro den shelu. Despues bin i sigui Mi". Pero ora e hòmber a tende e palabranan aki ela bira tristu i a kana bai, pasobra e tabatin hopi rikesa. Loke a kuminsá siendo un esena felis, a konkluí ku un final tristu. Di e hòmber riku ei evangelio no a ni sikiera a warda e nòmber. Tabata un vokashon frakasá, un potensial santu, un ehèmpel ku awe nos lo a proklamá, si su reakshon riba e invitashon di Señor tabata otro.

Pa ser kristian no ta sufisiente pa ta bon, honrado, den sentido di kumpli ku mandamentunan di Dios. Tin un dimenshon nobo, ku mester preokupá nos i ta e generosidat di e kurason na kua Kristu ta yama nos. Evangelio ta un vokashon eksigente ku no ta kumpli únikamente ku atené na mandamentu. Kristianismo ta poseé un dimenshon sosial, hopi bia ignorá, ora nos limitá nos mes na un simpel pietismo, fe komprondé komo simpel práktika di e debernan religioso. Awe nos mester puntra nos mes ku tur sinseridat: kon mi a yega na e bienesnan ku mi ta poseé i ki uso mi ta duna nan? Inhustisia di plaka ta sintá hopi biaha tantu den orígen komo den fin ku nos ta dun'é.

Despues di e esena e hòmber riku ku a alehá su mes tur tristu, Kristu ta pronunsiá un di e frasenan mas fuerte di e evangelio: "Ki difísil ta pa esnan ku tin rikesa drenta den e Reino di Dios". No tin resentimentu den e palabranan aki. Ni tampoko nan ta un yamada insensato pa un lucha di klase, sino un atvertensia serio pa duna rikesa su berdadero dimenshon sosial i kristian. Di akuerdo ku pensamentu di Kristu, na unda malisia esensial di plaka ta sinta? Dikon "ta mas fásil pa un kamel pasa dor di wowo di un angua ku pa un riku drenta den Reino di Dios"? Peliger di plaka ta ku fásilmente e ta hasi kurason di hende egoista, e ta hasié insensibel pa doló di otro, e ta hasi ku no ta preokupá mas pa suerte di otro, e ta priva hende di sentido di hustisia. Plaka ademas ta profundamente malu si a yega n’e a kosto di doló di e próhimo òf si e ta fruta di inhustisia òf eksplotashon. Si ami ta gosa di komodidat, si mi tin un bon kuenta di banko, pero si e ta a kosto di a paga insufisiente salario, mi no tin ningun derecho riba uso di e bienesnan ei. Den e kaso aki, ya no ta kestion di perfekshon, sino di hustisia pa duna bèk loke no ta pertenesé na mi. Pero, ken ta kapas di rekonosé ku nan rikesa ta fruta di un piká sosial? Mashá poko ta esnan ku tin e kurashi pa rekonosé esaki i pa aktua konforme tal konvikshon. Reakshon normal di e riku dilanti e palabranan aki di Kristu ta di ignorá nan, talbes sinti su mes tristu i den hopi kaso, di tilda esun ku ta proklamá e doktrina di Kristu relashoná ku rikesa komo ekstremista.

Rumannan, e hòmber riku a alehá su mes ku tristesa for di Kristu pasobra e tabata biba mashá mará na su rikesa. E no tabata mal hende, e tabata tené su mes na e mandamentunan, e tabata ke poseé Reino di Dios, pero e tabata katibu di su plaka. Kristu ke pa nos ta liber, pa nos sa di kompartí i duna, no pegá na bienesnan ku ta pasa. Awe, ku tur sinseridat di nos kurason, laga nos hasi nos mes e pregunta aki: Ami ta biba e disposishon interior aki di generosidat, di renunsia.... mi por kompartí mi poseshonnan ku otro. Laga nos siña biba manera e promé kristiannan, a lo ménos den spiritu, ku nan no tabata konsiderá nada komo kos propio, sino ku nan tabata poseé tur kos den komun. Solamente asina, siendo liber di paden, nos lo ta riba kaminda di e Reino di Dios i nos lo logra e berdadero pas di kurason.