Diósesis

Diósesis ta e distrito òf teritorio kristian den kua e tin un outoridat ku ta ehersé hurisdikshon eklesiástiko. E outoridat ta: arsobispu, obispu, etc. E nòmber ta bini di tempunan di romanonan, ya e nòmber di diósesis tabata asigná na divishonnan atministrativo promé ku siglo III. Un tèmpel ta pertenesé na un parokia. Vários parokia agrupá ta forma un dekanato, Tur e parokianan agrupá ta pertenesé na un diósesis. Diósesis por ser agrupá, a su bes, den provinsianan eklesiástiko, den kua na su kabes tin un arkidiósesis.

Ora un diósesis ta karesé di pastor (e obispu), nan ta bisa ku e ta vakante.

E término diósesis ta ser utilisá dor di distinto iglesia kristian, siendo Iglesia Katóliko esun mas ekstendé, kua Kódigo di Derecho Kanóniko ta definié den kanon 369 komo:

“Diósesis ta un porshon di e pueblo de Dios, kua kuido pastoral ta ser enkomendá n’e Obispu ku kooperashon di e saserdotenan, di manera ku, uní na su pastor i kongregá dor di djE den Spiritu Santu mediante e Evangelio i Eukaristia, ta konstituí un Iglesia partikular, den kua berdaderamente ta presente i ta aktua e Iglesia di Kristu, un, santu, katóliko i apostóliko.

E palabra "diósesis" i su derivado "arkidiósesis", ta evidentemente tumá di e sup-divishon di e Imperio Romano i den su mes tabata asosiá na un gran unidat teritorial. E ta bini di Latin dioecesis ku na su turno ta bini di Griego διοίκησις i ku nos ta tradusí komo "atministrashon".

Iglesia Katóliko a adoptá struktura di diósesis di e Imperio Romano durante siglonan V i VI ora kada obispu a asumí totalmente ròl di e anterior prefekto romano. E transferensia di outoridat aki di un ofisio sivil na un lider eklesiástiko a keda fasilitá pa e práktika kristian di establesé áreanan di atministrashon eklesiástiko ku ta pas ku esnan di e atministrashon romano. Den tempunan moderno hopi diósesis antiguo, ounke dividí segun tempu den diósesis menor, a konservá delimitashonnan di e Imperio romano.

Awe Diosesis di Willemstad ta slebra su hubileo di oro

Dia 28 Aprel 1958 Papa a elevá "Vicariato Apostolico di Curacao" na e status di Obispa­do. Ántes aya kaba laikonan a aserka Mgr. Zeppenfeldt pa e pidi Roma pa hasi e Vicariato un obispado "outónomo". Entre 1957 i 1958 tur e Vikariatonan den Caribe a bira obispado. Esei tabata "den aire" anto. Ántes e obispunan (vikarionan apostóliko) tabata goberná nos islanan na nòmber di e Sede Apostóliko. E palabra "vicaris" ta nifiká representante. E instituto aki ta eksistí den mishonnan kaminda no ta eksistí ainda un organisashon diosesano o kaminda e no ta eksistí mas. For di 1592-1727 vikarionan apostóliko a goberná na Hulanda; entre otro Sasbout Vosmeer. Aki nos mester re­marka ku nan posishon tabata diferensia un poko for di esnan ku awor ta traha den mishonnan. Monseigneur Johannes Michael Holterman O.P. anto den un "communicandum" di 28 di Yüni 1958 a skirbi: "Nos Vikariato a bira outónomo. Su Obispu, ku komo susesor berdadero di Apòstelnan ta ehersé un kargo instituí pa Kristu mes, lo ehersé awor su predominio na su nòmber, bou di supremacía di papa di Roma. Durante su 116 aña di eksistensia nos Vikariato a desaroyá su mes di tal manera ku e ta posedé awe tur loke mes­ter pa hasié digno di wòrdu elevá na obispado­
E solemnidatnan a tuma lugá entre 14 i 19 di Òktober 1958. E "Programa ofisial" a haña komo kabes "WILLEM­STAD BISSCHOPSSTAD". Den e prólogo nos ta lesa: "Djasabra 18 di Òktober 1958 un periodo históriko di e historia eklesiástiko di Antia nan Hulandes lo keda será y un nobo lo habri. Riba e dia ei nos isla­nan lo keda elevá na un diósesis ku su mes sede episkopal y komo tal Roma a indiká Willemstad. E komunidat katóliko riba nos islanan no ta pará mas bou di direkshon di un Vikario Apostóliko. E ta haña su mes Obispu: Obispu di Willemstad.
Awe nochi lo tin un Santu Sakrifiso di Misa Solèm ku asistensia di kardinal Simonis di Hulanda, mgr. Kasteel di Vaticano i varios obispu di e.o. Santo Domingo, Venezuela i Surnam. Tame tur e saserdotenan di e obispado di Willemstad tambe lo ta presente.