DI DIESOCHO DJADUMINGU SIKLO B

Promé Lektura : Eksodo 16, 2-4. 12-15
Salmo : Salmo 78, 3-4, 23-25. 54
Di dos Lektura : Efesionan 4, 17. 20-24
Evangelio : Huan 6, 24-33

Hendenan ta buska Hesus. Asin'aki e Evangelio di awe ta kuminsá. Hesus ta aserká e hendenan, pero e biaha aki ta hustamente nèt kontrali.
Tambe tin hende ku ta aserká nos parokianan, mayoria di nan no ta hasié pa inkietut evangéliko òf pa deseo pa konosé Hesus mas, sino mas bien pa pidi yudansa di alimento i plaka.
Señor ta risibí e hendenan pero e ta laga nan mira intenshon di su serkania. Nan no ta busk'é pasobra nan a deskubrí su dibinidat òf su mishon, nan ta busk'é "pasobra nan a kome te harta".
Tin momento den bida di kada hende ku e ta eksperensiá ku forsa realidat di donnan Dios. Ta e momentonan alegre durante kua kurason i pulmon ta krese. Nos ta mira kon Dios ta aktua den nos eksistensia yenando nos ku pas, amor i sentido di bida. Pero tin momento totalmente distinto. Soledat i e bashí humano tei presente ku asina forsa ku nan ta nubla presensia di Señor. Ta e momentonan di debilidat spiritual pa kua nos tur tin ku ta atento p'asina nos bida no apartá totalmente di Dios.
Bida ta un kaminda, riba kua nos mester alimentá nos mes pa sigui padilanti i Hesus ta rekordá nos ku E ta e alimento ku no ta kaba i ku ta duna bida eterno.
E mundu riba kua nos ta biba tin falta di hopi sentido, pero kisas esun mas grave ta e falta di sentido di bida.
Hopi hende ta biba pa biba, nan ta tira dia di bida tras di lomba sperando morto yega serka nan. Den fondo, tras di hopi frakaso humano ta eksistí un lugá di un "Dikon?", un "pa kiko..." Hende por tin splikashon pa lokual ta pasado ku nan, pero por ta ku nan no tin motibu pa superá esaki. Nan ta bisa "pakiko mi ta bai ta sigui lucha si tur kos ta sigui igual..."
Nan ta puntra Hesus: "Kiko nos tin ku hasi pa nos obranan ta obra di Dios? Òf loke ta mesun kos: "Kon nos por tin Dios semper presente den nos bida diario?"
E kontesta di Hesus ta revelá di nobo pa nos e serkania di Dios. E personanan tabata puntr’é kua tabata kosnan ku nan mester a hasi, pero Señor ta kontesta nan ku sigui Tata no ta únikamente hasi kos, sino kere den djE. Un dia un hòmber di edat mediano a konta kon den su infansia na un skol religioso na a oblig’é bai misa tur dia; nan mester a bai ku un sorto di karnèt ku nan tabata stèmpel na entrada di Misa... E tema di siguimentu di Señor no ta únikamente hasi kosnan, tal i manera e hudiunan di e époka di Hesus tabata pensa. Sigui e Maestro ta aksept’é den profundidat di nos bida, únikamente e ora ei nos lo bai den e asuntunan di Dios sin ku ningun hende ta obligá nos. Hesus ta ofresé su mes komo alimento pa nos bida. Si kuminda ta mantené nos físikamente bon, e alimento spiritual di Señor ta laga nos pasa for di nos realidat material pa esun spiritual. Nos mester di e dos alimentonan, esun material i esun spiritual.
E gran debilitamento spiritual di hopi hende (falta di sintimentu, falta di amor, falta di fe i di speransa, falta di solidaridat ku esnan mas débil...) ta debí ku nan no ta alimentá nan mes den forma adekuá, nan tin pobresa spiritual i debil di speransa.
Hesus a laga su bida, su Iglesia i su kurpa pa nos, p'asina nos tin bida i bida abundante.