DJADUMINGU MUNDIAL DI MISHONNAN

Promé Lektura : Isaias 2, 1-5
Salmo : Salmo 19, 1-4a
Di dos Lektura : Echonan 1, 3-8
Evangelio : Mateo 28, 16-20


E Evangelio aki ta marka fin di e Evangelio segun Mateo i kuminsamentu di bida di e Iglesia di Kristu. Maske ku semper ta indiká dia di Pentekòster komo prinsipio di Iglesia, nos no por laga e señal aki ku Kristu a hasi na su disipelnan pasa sin dun’é atenshon nesesario, pasobra e ta representá un di e pilánan mas importante riba kua Iglesia ta sostené su mes: e mandato misionero. Laga nos analisá esaki ku atenshon. E lugá kaminda e ta tuma lugá ta algu masha signifikativo, Galilea. Pa Mateo tabata masha importante kumplimentu di e Skrituranan hudiu, pero awor e ta pone Herusalèm un banda i ta señalá Galilea, tera di Hesus, komo e lugá for di kua mester kuminsá e gran tarea aki di siguidónan di Hesus. For di aki nos por persibí universalidat di e mensahe di Hesus, i su apertura na otro pueblo- i kultura.
Unabes rekonosí, Hesus ta rekomendá e mishon di mas grandi ku Iglesia hamas a risibí: hiba e testimonio ku Hesus a risibí di e amor di Dios Tata, e serkania di Dios Yu i e forsa di Dios Spiritu Santu. Ku otro palabra Hesus a pidi su disipelnan pa nan hasi presente e Reino di Dios, i e forma pa introdusí e Reino aki lo tabata pa medio di boutismo. Boutismo tabata un práktika ku ya algu hudiu a bini ta realisá i ku lo tabata ke nifiká kambio di bida, kombershon; pero Hesus ta añadí na e nifikashon aki introdukshon na bida di Dios, ke men kuminsamentu den bida di e Spiritu.
E mensahe aki no mester ser hibá únikamente pa e pueblo hudiu, sino pa tur nashon. Asina, Hesus ta revelá su mes komo salbadó universal di hinter humanidat. E simia ku a sembrá den e Pueblo Israelita lo mester a duna fruta i kombertí su mes den salbashon pa hinter komunidat den Kristu Hesus. I pa kumpli ku e mishon kolosal aki, Hesus ta hasi un promesa ku el a kumpli kuné na hopi manera.: “Lo mi ta ku boso t’e na fin di mundu”. Di mil manera nos a mira Hesus aktua den e dos mil añanan aki di evangelisashon. Den e mandamentu di Spiritu santu, den su presensia kada bia ku ta lesa Evangelio, pa medio di e sakramentunan, kaminda ta aktualisá su presensia salbador. Asina, Hesus no laga nos keda so, sino ku E ta sigui kompañá nos pa kumpli ku e mishon aki di kua Iglesia ta konsistí: duna testimonio di Hesukristu i establesé su Reino rònt riba tera.

Awe nos ta selebrá Djadumingu Mundial di Mishon, i Palabra di Dios ta invitá nos pa reflekshoná riba e tarea asina importante aki pa hinter Iglesia. Di tal importansha, ku si nos no kumpli ku e tarea aki di evangelisashon aki nos no ta Iglesia. Ningun hende por risibí Hesus i no duna testimonio di e amor risibí pa medio di dje, di e salbashon ku den forma gratuito E a buska pa nos.
Tal manera San Pablo ta bisa, "ai di mi, si mi lo no evangelisá".
Awor nos mester hiba e evangelisashon aki sin perwisio t’e na e delaster skina di Tera. Nos por kuminsá ku nos “mundu” chikí ku ta rondoná nos. Kon mi ta dunando testimonio di Hesus den mi kas, ku mi amigunan, na mi trabou? O mi no ta sinti mi mes inkómodo partisipando den otro kosnan ménos bon ku ta biba den mundu rondó di mi ? Pió ainda, ta penami duna testimonio di e amor i di e balornan ku Hesus a siña mi! Laga nos NO lubidá ku e mandato aki di evangelisá no ta un opshon, ta algu ku ta konstituí nos komo kristian, siguidónan di Kristu.

Laga nos resa e djadumingu aki pa vokashonnan misionero, laga nos yuda ku loke nos por pa sostené nan i hasi un saminashon di konsenshi riba nos propio vokashon misionero.