DI BINTIKUATER DJADUMINGU SIKLO B

Promé Lektura : Isaias 50, 5-9a
Salmo : Salmo 116, 1-9
Di dos Lektura : Hakobo 2, 14-18
Evangelio : Marko 8, 27-35


E pasashi aki ta aparesé den e Evangelio di Marko, despues di a konta di hopi milager i palabranan sabí di Hesus. E ora ei ya Hesus a multipliká pan, ela kana riba awa, a resusitá e yu muhé di Jairo, a laga doktornan di lei i fariseonan keda ketu, a kura e esnan siegu i surdu; tur kos tabata sali Hesus bon! Tabata opvio ku tur e susesonan aki tabata spièrta den e apòstel- i hendenan ku tabata kana ku Hesus un espektativa di liberashon, di salbashon. I ta p'esei nan tabata puntra nan mes , ken esun ei ta ku ta realisá tur e milagernan ei ?

Den e pasashi aki Hesus ke aklará na nan kiko ke men siguiE.
Pa esaki ta importante e situashon inisial ku e Evangelio ta trese. “Riba kaminda Ela hasi nan e pregunta aki”. Hendenan tabata sigui Hesus i E tabata ke ta sigur ku nan lo tabata sa tras di ken nan tabata kanando, ken nan tabata siguiendo. Sentro di e pasashi aki ta den e aklarashon ku Hesus ta hasi di e palabra Mesias. Mesias no tabata nifiká poder, violensia, i dominio. Todo lo kontrali, Hesus ta kibra ku e strukturanan di violensia ku tabata hasi asina tantu daño na su pueblo i ta mustra otro manera di ta Mesias. Hesus tabatin ku sufri, muri pa e ora ei por biba den plenitut, resusitá. Esaki tabata e Bon Notisia di su Reino! No e interkambio di poder (entre Romano i Hudiunan), sino e abolishon di poder di esun riba e otro komo kaminda di realisashon di hende.

Ta p'esei Hesus ke aklará na nan: esun ku ke siguiE, mester renunsiá e set di poder i di vengansa, e mester pone un banda tur deseo di imponé su mes riba otro; e kristian (siguidó di Kristu) tin ku hisa su krus, ke men, brasa su realidat i kana den solidaridat, den karidat i pordon. Kiko Hesus ta primintí nos ora nos hasi esaki? Definitivamente ku no ta gloria di mundu, sino si gloria di Dios.

Den kuantu struktura di poder nos ta envolví! For di mucha nos ke ta grandi p'asina nan no manda riba nos; di soltero, kasá p'asina nan no bisa mi kiko mi tin ku hasi ku mi pareha; di hóben nos ke ta “liber” p'asina nan laga nos pa pas; i kasá nos no ke pa nos pareha bisa nos kon nos tin ku stim’é. Ora toka nos biba algun momento difísil pa motibu di malesa, di finansa òf amor, nos ta sufri pasobra nos no tin poder pa kambia e situashon.

Ta parse ku no semper nos ta komprondé nos papel komo kristian: nos salbashon ta den duna na kada ken “poder” di disidí i pa biba. Tal manera Kristu a bisa na e dòktòrnan di lei i e fariseonan, maske esaki lo a nifiká su morto. Nos no mester asumí krusnan di otro p'asina nos karga ku tur; esun ku ke sigui Señor, hisa su krus, esun di dje mes, esun ku realidat ta presentá na dje i asina ei lo e ta siguiendo Hesus. Laga nos habri nos kurason pa amor, laga nos purba risibí di otro loke nan ke duna nos i no loke nos ke ranka di nan ku chantahe i inklusive violensia (físiko òf moral).

Awe nos tur sa ku Hesus ta e Mesias, e Kristu, esun Ungí, e Yu di Dios, Nos Salbador. Pero kua Mesias nos ta kere ku E ta?

Ta sugerí pa nos duna nos mes oportunidat pa risibí di otro loke nan ke duna nos , pa akseptá realidat i asumí su goso i tambe su sufrimentu; pa stima manera Kristu a stima nos.