DI BINTIUN DJADUMINGU SIKLO A

Promé Lektura : Isaias 22, 19-23
Salmo : Salmo 138, 1-3. 6. 8
Di dos Lektura : Romanonan 11, 33-36
Evangelio : Mateo 16, 13-20

E pasashi aki ta un ku e Evangelistanan Mateo, Marko i Lukas a referí n’e ; nan tres ta papia di Hesus komo Mesias, pero Mateo ta e úniko ku ta pone e konfeshon di “Yu di Dios bibu” den boka di Pedro. Esaki no ke men ku Mateo ta gañando, únikamente e ta laga reflehá na nos e fe di e komunidat for di unda Mateo tabata skirbi. E título aki den e Evangelio di Mateo ta hala mashá atenshon pasobra e personanan na kua e tabata dirigí su mes tabata hudiu, i pa nan, Dios tabata UN i no tabata konsebibel un “Yu di Dios” (pa nan esaki tabata zona komo mitologia griego). Ta p'esei , e echo ku Simón Pedro ta proklamá Hesus no únikamente komo Mesias, sino komo e Yu di Dios, únikamente por ser spliká si e realidat aki tabata revelá pa Dios.
E liderazgo aki ku Pedro a mustra i e inspirashon pa medio di kua e tabata influenshá , ta yuda nos komprendé e di dos parti di e Evangelio: Hesus ta yama (e ta duna vokashon ) na Pedro pa ta “fundeshi, piedra” di Iglesia (komunidat) ku a kuminsá ta konsolidá rondó di Hesus; ta keda kla ku no ta otorgá e vokashon aki na Pedro pa su gran santidat, sino pa inspirashon di Dios ku lo a gui’é pa kumpli ku e funshon aki di ta fundeshi den fe. E siguiente dos signonan ku Hesus ta hasi uso di dje, ta derivá di kustumbernan semítiko segun nos tin ku interpretá nan: “lo Mi duna bo yabinan di Reino di Shelu”; esun ku tabata den poseshon di e yabinan tabata e mayordomo, esun responsabel pa esnan ku tabata drenta i sali di kas di su hefe. E siguiente palabranan: “tur loke bo mara riba tera lo ta mará den shelu, i tur loke bo lòs riba tera, lo keda di lòs den shelu tambe”, ta hasi referensia na un kustumber rabíniko ku kua nan ora di aprobá òf no un interpretashon òf aktualisashon di Lei i di Profetanan, tabata hasié marando o lòs un sinta. Por lo tantu, nos por mira den e pasashi aki ku e funshon di Pedro komo “fundeshi di fe” di e komunidat di siguidónan di Kristu ta un vokashon dibino, ku ta ser guiá pa Dios mes; i e vokashon aki tin e tarea di ta guiá pa hinter Iglesia, ku su testimonio i su palabra; lus ku ta mustra nos e kaminda pa e enkuentro definitivo ku Hesukristu. Den e sentido aki, e susesor di Pedro tin e vokashon dibino pa guia e komunidat kristian den fe.

Dilanti un personahe manera Hesus ningun hende por keda indiferente; e ta un hende dilanti kua bo tin ku definí bo mes, sin por bisa simplemente: “no ta importá mi ken bo ta”. Personahenan manera Ghandi a bisa: “Mi ta bisa e hindúnan ku nan bida lo ta imperfekto si nan no ta studia respetuosamente bida di Hesus”. Ta mesun kos tabata pasa ku hendenan ku tabata kombibí kuné; parse ku tur tabata ke posishoná Hesus ku algun personahe bíbliko: “Algun ta bisa ku Bo ta Huan Boutista; otronan, Elías; otronan, Yeremías òf un otro profeta”. Inkluso, despues di su morto, e hendenan a sigui ta buska kon deskribí Hesus: .........
E Mesias; e Yu di Dios; e Yu di Hende; e Señor; e Maestro; e Palabra di Dios; e Pan di Bida; e Kaminda, e Bèrdat i Bida; e Hende den plenitut; e Señor di historia; e Rei di Reinan; e Gran Profeta.
Pa algun Hesus tabata esun ku a yama nan pa laga tur kos un banda pa biba kun’E i p’E; pa otronan e ta ehèmpel bibu di amor den nan matrimonio; otronan ora nan a mira su ehèmpel a entregá nan mes pa salba mundu; i otronan ku e mesun ehèmpel aki a retirá nan mes pa resa hinter nan bida; pa algun e ta símbolo di liberashon; i otronan a hasi uso di su nòmber pa kometé violensha.
Enfin, manera nos por duna nos mes kuenta, no ta sufisiente kere den Hesus, sino ku ta nesesario profundisá den - “ken nos ta kere ku Hesus ta”. For di kuminsamentu , e apòstelnan a krea un Kredu den kua nan ta proklamá ken Hesus ta pa e kristiannan. Les’é i komprondé lo ta un bon manera pa komprendé mihó “ken Hesus ta pa nos”.
Pero no ta sufisiente “resitá” un kredu, sino ta pidi nos pa duna testimonio di esaki. Aki ta kaminda e kontradikshonnan grandi den nos fe ta sali na kla. Ta p'esei nos a skucha hende ku ta bisa, “mi ta kere den Kristu, ma no den kristiannan”.

Laga e siman aki nos proponé nos mes pa lesa i MEDITÁ riba nos kredu . Kon mi ta bibando e bèrdatnan aki tokante Hesus i su mensahe?