DI BINTISEIS DJADUMINGU SIKLO B

Promé Lektura : Numbernan 11, 25-29
Salmo : Salmo 19, 7, 9, 11-13
Di dos Lektura : Hakobo 5, 1-6
Evangelio : Marko 9, 38-43. 45. 47-48

E nòmber ku nos a duna nos Iglesia "katóliko", òf sea, "universal", ta konstansia di e bunita evangelio di awe. Nos ta katóliko na midí ku nos no ta sera nos mes den nos gruponan; ora nos ta kapas pa mira ku Dios ta den kurason di sernan humano ken sea ku nan ta i di unda ku nan ta bin. Por ta ku nos ta masha fásil na ora di huzga otro. Nos no ta kompetente pa huzga sin mas, ken ta di Señor i ken no.
Hesus no ta prohibí e hòmber ei pa sigui hasi bon. Esun ku ta bon, i den loke e ta bon, no mester ser strobá pa hasi e bon ku e ta hasi, maske ta parse ku nos ta mira algun defekto i algun iregularidat den e forma di hasié. No laga nos difikultá tarea di esun ku ta hasi bon, maske e no ta "un di nos". Un di e kualidatnan ku ta parse ku un berdadero siguidó di Kristu mester tin ta libertat di kurason. Tin un kurason liber ta sa ku inklusive esnan ku no ta ku nos den nos Iglesia por hasi kos di Dios. E doktornan di lei i e fariseonan tabata papia malu di Hesus. Ta suponé ku esun ku ta usa su nòmber no ta papia malu di djE. Esnan ku ta lucha kontra maldat for di amor, tá ku Dios, maske nan no ta di nos Iglesia.
Por ta ku algun hende ta skandalisá di loke ta bisa i ta di puntra si tras di tantu "radikalismo" hopi biaha no ta skonde imadures, falta di seguridat i di pertenensia, opseshon, trouma, i ta kibrá paden... Rekonosé Dios den e otro ta eksigí separashon interno di un kurason yen di miseria humano i biba den libertat di Spiritu. Pa e personanan aki di skandalisashon fásil lo bisa nan ku ser kristian no ta ser i biba manera nan ta kere. Tin hopi ruta pa yega na Dios pero un solo kaminda: amor.
Un di dos momento di e Evangelio ta rekordá nos pa ku mester tin mashá kuidou pa no kai den maldat. Nos ta keha pasobra nos ta bisa ku ta e otronan ta esnan ku ta laga nos sufri, ta laga nos peka, etc. Den bèrdat ku por tin den e afirmashon aki, Hesus ta enfrentá nos ku nos mes. E ta hasi uso pa komparashon ku partinan di kurpa. E kurpa ta lo mas íntimo ku nos tin, ta lugá for di kua akshonnan ta sali. No ta e piká ku ta bini di pafó ku ta preokupá Hesus, e ta e piká ku ta nase di paden, di nos interior, di nos mes. Ku otro palabra: sigui Kristu sin piká ta nifiká bandoná e malu ku ta sali di nos mes.
Por ta ku bira lomba pa piká pa sigui Kristu ta laga nos manera batí, manera ku nos falta algu den nos bida, asina tantu ta e sklabitut na kua ta someté nos; pero mas grandi ta libertat di esun ku ta liberá nos. Òf nos ta mata piká den nos òf piká ta mata nos. Nos tin ku destruí e loke ta sklavisá nos.
Kua ta nos sklabitutnan?
Kada ken tin di dje. Ya na otro okashon a komentá ku ta únikamente un shelu tin, pero fièrnunan ta hopi, kada ken tin di dje. Pa esun fièrnu por ta den su kobardia i kompleho, den su imadures i den su seksualidat, den su envidia i renkor... Kada hende mester mira su mes pidi kombershon outéntiko ku ta nase di un bon kurason.
Loke ta mas tristu di un kreyente ta ku e ta konformá su mes den e situashon di piká i no ta anhelá superashon di su defektonan spiritual pa entregá su mes kompletu na Kristu.
Vatikano II ta rekordá nos ku Dios no ta privilegio di algun hende. Tur ser humano, no únikamente kristiannan, den forma ku Dios so konosé, ta partisipá den e misterio Paskual di Kristu. Ora ku egoismo di grupo aparesé, ku ta reklamá poder de Hesus komo herensia pa nan so, Hesus i kun’ E nos propio Iglesia, ta rechasá tal forma di pensa. Spiritu Santu no ta keda prezu den grupo i institushonnan, sino ku e ta infinitamente liber pa yega na kurason di kada ser humano i biba aden.
Mantené bo mes alerta; kaminda ménos bo ta pensa i ku kende ménos bo ta kere lo bo por tin un enkuentro ku Hesus.