zondag 16 november 2008

DI TRINTITRES DJADUMINGU SIKLO A

Promé Lektura : Proverbionan 31, 10-13.; 19-20. 30-31
Salmo : Salmo 128, 1-6
Di dos Lektura : 1Tesalonika 5, 1-6
Evangelio : Mateo 25, 14-30


E parabel akí ta pertenesé na un grupo di parabelnan ku tin relashon ku e di dos binida di Kristu. Den dje tin un alushon kla di e promé primera komunidat ku tabata biba wardando e akontesimentu aki. Ta parse, na ora di rekordá e palabranan akí di Hesus, e evangelista tabata ke laga bon kla ku no tabata por a warda e di dos binida di Kristu ku man krusá; e wardamentu akí tabata un wardamentu aktivo, generoso i solidario ku e ruman. Laga nos analisá e personahenan.
E interpretashon di e parabel por ta mas o ménos esaki: E shon di e empleadonan ta Kristu Hesus; su ousensia, asenshon; i su di dos binida, e Parusia, ke men, su binimentu glorioso na fin di tempu.. E empleadonan ta e kristiannan na kua a enkargá e vigilansia aktivo i yen di fruta durante e tempu di espera, ke men, miéntras Señor “ta bini bèk”. E empleado negligente ta e kristian ku ta floho, ku no ta kumpli ku su mishon di “instalá e Reino de Dios” pa motibu di miedu i miedu di flohedat. E plaka ta e donnan di Dios ku Dios a entregá na nos tur pa ta na servisio di Reino di Dios.
E akshon, e dunamentu di kuenta ku e shon, ta representá e huisio definitivo, den kua nos lo tin ku duna kuenta di nos donnan. E sentensia ta partisipashon òf no partisipashon di e biennan selestial. I e frase ku e parabel ta kompartí ku nos komo konklushon: “Esun ku tin hopi, lo haña mas, i lo e tin asta na abundansia. Ma esun ku no tin nada, asta e tiki ku e tin, nan lo kit’é”. Esaki ke yuda nos komprondé ku na e momentu ku nos ta topa Hesus na un manera definitivo na final di nos bida, si nos tin un relashon profundo, komprometí i sinsero kunÉ, pues esaki lo oumentá i lo ser hibá na plenitut; pero si nos relashon ta débil, di negoshi, superfisial òf bashí, e relashon akí no ta sirbi di nada y nos lo pèrdè e salbashon ku Dios a ofresé nos.

Imaginá nos mes ku nos tin un empresa, i den dje tin un direktor, vários gerente, hopi empleado, etc. Kada un na a duna algun fakultat p'asina ku e empresa por operá ku efisiensia. Kiko lo a pasa si kualkier di e empleadonan akí ta kuminsá di utilisá nan fakultatnan, òf e konosementunan ku nan puesto ta ofresé nan pa nan bienestar personal i no esun di e empresa?… Mes kos ta sosodé ku Reino di Dios: Señor a planeá instalashon di su Reino, i su Yu Hesu-Kristu a siña nos e “manual di operashon”, pero si nos no pone nos na servisio di otro e “fakultat òf donnan” ku Dios a otorgá na nos, kiko nos por spera di e Reino? Ku e ta krese? Ku e ta desaroyá? Mi no ta kere.
Ta p’esei, awe Señor ta rekordá nos ku a duna nos hopi don na kada un: bida, salú, libertat, fe, inteligensia, trabou, hustisia, pas, ets. Pero, kiko nos ta hasiendo ku nan? Ken nos ta sirbiendo ku nan? Nos mes interes, e sosiedat konsumidó, e kantante di moda, nos empresa, nos famia, su Pueblo? Laga nos meditá esaki bon, pues e donnan akí e donnan ku Dios a duna nos pa desaroyá nan i enrikesé e Pueblo di Dios, i talbes nos a falta konsiensia komunitario na momentu di tuma desishonnan. Lo yega un dia den kua ku nos tin ku duna kuenta di e donnan akí i si nos no tabata sa na desaroyá nan pa motibu di miedu, egoismo, pichiri, flohera, inkonsiensia, òf “seguedat”, ainda e poko aki lo ser kitá di nos i nos lo no por gosa eternamente di e salbashon ku Dios a ofresé nos.

Talbes e siman akí ta bon pa bo kumpli ku e propósitonan pa yuda otro i ku bo a laga pasa bai; òf tambe lo bo por a saminá bo konsenshi pa duna kuenta na bo mes si realmente bo ta hasiendo esfuerso pa desaroyá e donnan ku Dios a dunabo.